УИХ-ын гишүүн Л.Оюун-Эрдэнэ, Х.Нямбаатар, Т.Аюурсайхан, Л.Болд, Ж.Батзандан нарын гишүүд өнгөрсөн долоо хоногийн баасан гаригт “Монгол Улсын Их Хурлын дарга Миеэгомбын Энхболдыг үүрэгт ажлаас нь чөлөөлөх тухай” тогтоолын төслийг өргөн мэдүүлсэн. Энэ дагуу УИХ-ын даргын дэргэдэх зөвлөл хуралдаж, энэ долоо хоногийн  байнгын хороо, чуулганы нэгдсэн хуралдаанаар хэлэлцэх асуудлын дараалалд оруулсан.

Улмаар уг тогтоолын төслийг өнөөдөр УИХ дахь МАН-ын бүлгийн хуралдаанаар хэлэлцэхээр төлөвлөөд байна. Тогтоолын төслийг УИХ-д өргөн мэдүүлэхийг дэмжиж, Л.Оюун-Эрдэнэ, Т.Аюурсайхан тэргүүтэй 39 гишүүн дэмжиж, гарын үсэг зурсан юм. Тогтоолын төсөлд гарын үсэг зурсан гишүүд байнгын хороо, чуулганы нэгдсэн хуралдаан дээр 100 хувийн ирцтэйгээр дэмжсэн тохиолдолд  батлагдах боломж бүрдэнэ.

УИХ-ын Тамгын газрын дарга Ц.Цолмон “УИХ-ын даргын дэргэдэх зөвлөл хуралдаж, Мягмар гаригийн 10:00 цагт Төрийн байгуулалтын байнгын хороог хуралдуулах, түүний дараа чуулганы нэгдсэн хуралдаанаар УИХ-ын даргыг үүрэгт ажлаас нь чөлөөлөх асуудлыг оруулахаар товлолоо. УИХ-ын даргын зүгээс энэ асуудлыг нэн яаралтайгаар хэлэлцэх, захирамж гаргасан" гэсэн тайлбар өгсөн юм.

Г.ИТГЭЛ