Өчигдөр /2021.11.12/ Монголбанкны вэб сайтыг Иракийн “1877 team” хакеруудын бүлэглэл хакердсан. Тэд сайтын нүүрэн бүтцэд өөрсдийн нэр, лого бүхий мэдээллийг байршуулж, “Бид хакердсан” гэсэн утгатай бичвэр өлгөсөн юм. Үүний дараа Монголбанкны сайт хэсэг хугацаанд унтарсан билээ.
Тэгвэл өнөөдөр олон улсын хакеруудын сүлжээ платформ дээр 2.3 сая монголчуудын хувийн мэдээллийг 700 ам.доллараар худалдах зар тавигдсан нь хэвлэлд мэдээлэгдээд байна. Энэ нь 2 сая орчим төгрөг болох юм.
Уг асуудлыг Тагнуулын ерөнхий газраас шалгаж эхэлсэн гэдэг мэдээлэл бий. Энэ зар 2021 оны аравдугаар сарын 6-нд тавигдсан байх бөгөөд өнөөдөр хайлт хийж үзвэл алга болжээ.
Харин зургадугаар сард недерландчуудын 6 сая утасны дугаар, 3.7 сая и-мейл зэрэг мэдээллүүдийг 4 мянган ам.доллараар худалдах зар харагдаж байх юм.
Харин манай улсад холбогдох зарын мэдээлэл харагдахгүй байгаа нь зарагдсаных уу, эсвэл устгасан уу тодорхойгүй байгаа юм.
Raidforums.com платформ 2015 онд үүсгэн байгуулагдсан. Үүнд хакерууд олж авсан мэдээллээсээ гадна хэрхэн байгууллагуудын дотоод сүлжээ рүү халдах гарц, арга техникүүдээ ч наймаалцдаг байна.
Г.САНСАРМАА
АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.