ЭДИЙН ЗАСАГ

Монголчууд төгрөгийн картаар олон улсад гүйлгээ хийх боломж ойртлоо

Монголбанканд Азийн хөгжлийн банкны санхүүжилтээр хэрэгжсэн “Төлбөрийн системийн шинэчлэл” төслийн хүрээнд Үндэсний төлбөрийн системийн дэд бүтэц, Банк хоорондын төлбөр тооцоо, Төлбөрийн картын программ, техник хангамжийг хөгжүүлж олон улсын жишигт хүрснээр дэлхийн томоохон банк, санхүүгийн байгууллагын төлбөрийн системтэй санхүүгийн болон санхүүгийн бус гүйлгээ саадгүй дамжуулах боломж, нөхцөл хэдийн бүрдээд байна.

Төлбөрийн системийн шинэчлэлийг амжилттай нэвтрүүлснээр Үндэсний брэнд ₮ картыг хилийн чанадад бусад төлбөрийн картын сүлжээнд хүлээн авах гарцыг бий болгох зорилт тавьж ажиллаж ирсэн.

2023 оны нэгдүгээр сарын 26. БНСУ-ын КТ группийн "БиСи карт" байгууллагатай хамтран ажиллах гэрээнд гарын үсэг зурлаа. ГЭРЭЛ ЗУРГИЙГ Б.БЯМБА-ОЧИР/MPA

Энэ зорилтын хүрээнд Монголбанк болон БНСУ-ын КТ Группийн охин компани болох “BC Card (БиСи карт)” байгууллага хооронд Харилцан ойлголцлын санамж бичгийг байгуулсан.

Санамж бичгийг байгуулснаар манай улсын төлбөрийн картын зах зээл нэлээдгүй тэлэх, иргэд дотоодын ₮ картаараа олон улсад гүйлгээ хийх хөгжлийн дараагийн шатанд шилжих чухал алхам болсон гэж үзэж байна. Хамтын ажиллагааны энэ хүрээнд Монголбанкны Ерөнхийлөгч Б.Лхагвасүрэн болон БиСи карт байгууллагын Ерөнхийлөгч Вон Сок Чой нар “Хамтран ажиллах гэрээ”-д 2023 оны 01 дүгээр сарын 26-ны өдөр гарын үсэг зурж, баталгаажууллаа.

Тус гэрээг байгуулснаар Үндэсний брэнд ₮ картыг Солонгос Улсад, БиСи картыг Монгол Улсад харилцан төлбөрт хүлээн авах боломж бий болоход нэг алхам ойртлоо.

Нэг талаас хоёр орны хамтын ажиллагааг сайжруулахын зэрэгцээ бизнес, хөдөлмөр эрхлэгч, аялал зуучлалаар хоёр улсад зорчих иргэд дотооддоо ашигладаг картаараа төлбөр тооцоогоо түргэн, шуурхай, найдвартай гүйцэтгэх нөхцөл бүрдэнэ. Нөгөө талаас ямар нэгэн хууль, эрх зүйн орчны хязгаарлалтгүйгээр санхүүгийн үйлчилгээ авах ач холбогдолтой юм. Энэхүү хамтын ажиллагааг амжилттай гүйцэтгэснээр, БиСи карт байгууллагын 3.2 сая ширхэг мерчант байгууллагаас үйлчилгээ авахдаа дотоодын ₮ картаар төлбөр төлөх боломжтой болно.

Монголбанк нь Үндэсний брэнд ₮ картыг үндэсний мөнгөн тэмдэгт төгрөгийг бэлгэдэн нэрлэж, банкуудтай хамтран гаргах ажлыг 2012 онд амжилттай зохион байгуулсан. 2022 оны байдлаар 2.4 сая ширхэг ₮ карт ашиглагдаж байгаа бөгөөд энэ нь нийт картын зах зээлийн 55 хувийг дангаараа эзэлж байна.

Б.БАЯРТ

Энэ мэдээнд өгөх таны үнэлгээ
Like
Love
Haha
Wow
Sad
Angry

АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.

guest
1 Сэтгэгдэл
Хуучин
Шинэ Шилдэг
Inline Feedbacks
View all comments
Зочин хнөмхийнүүд гэнэ
Зочин хнөмхийнүүд гэнэ
2023-01-26 13:55

ЗӨВХӨН СОЛОНГОСТОЙ Л ЮМ БАЙНА ҮХСЭНИЙ НЬ ОЛОН УЛСЫН ТӨЛБӨР ТООЦООНД ВЭ

Холбоотой мэдээ

Back to top button