Өнгөрсөн долоо хоногт Украины дайныг дуусгах 28 зүйл бүхий төлөвлөгөөний эх бичиг олонд ил болсон. Тэрхүү АНУ, ОХУ хоёр хэлэлцэж гаргасан юм. Украин болон Европын холбоотнууд эх бичгийг Москвад хэтэрхий ээлтэй байна гэж дүгнэсэн билээ. Уг явдлын дараа Европын холбоо 28 зүйлийг шинэчилсэн өөрсдийн хувилбараа танилцуулсан. Мөн АНУ, Украины албан тушаалтнууд хэлэлцэж шинэчлэн эх бичгийг 19 зүйлтэй болгосон юм.
ОХУ-ын Ерөнхийлөгч Владимир Путин пүрэв гарагт /2025.11.28/ хэлэхдээ шинэчилсэн эх бичиг нь Украинд энх тайван тогтоох хэлэлцээний суурь болох боломжтой гэжээ. Тэрбээр Киргизэд айлчлах үеэрээ "Ерөнхийдөө бид үүнийг ирээдүйн хэлэлцээний суурь болгож болно гэдэгтэй санал нэг байна. АНУ-ын тал бидний байр суурийг харгалзан үзэж байгааг харлаа" хэмээсэн юм.
Ирэх долоо хоногт АНУ-ын тусгай элч Стив Виткофф Москвад айлчилна. Түүнийг ирэх үед нухацтай хэлэлцүүлэг хийхэд бэлэн гэж тэр хэлсэн байна.
Сүүлийн өдрүүдэд АНУ болон Украины хооронд өрнөсөн дипломат яриа хэлэлцээний дараа Путин энхийн төлөвлөгөөний талаар олон нийтэд анх удаа ам нээж байгаа нь энэ юм.
Одоогийн байдлаар 19 үндсэн санал болгон багасгасан гэх энэхүү төслийг Украин урьдчилсан байдлаар дэмжсэн бололтой.
Мягмар гарагт /2025.11.25/ Абу-Даби хотод АНУ-ын албан тушаалтнуудтай хэлэлцээ хийсэн Украины төлөөлөгчид шинэчилсэн төлөвлөгөөг урьдчилсан байдлаар дэмжсэн бололтой гэж олон хэвлэл мэдээлсэн. Гэхдээ нарийн ширийн асуудлууд шийдэгдээгүй хэвээр байна.
Нэгэн нэрээ нууцалсан АНУ-ын албан тушаалтан "Украинчууд гэрээг зөвшөөрсөн" гэж хэлсэн ч цэгцлэх шаардлагатай асуудлууд үлдсэнийг дурджээ. Украины Ерөнхийлөгч Володимир Зеленский мягмар гарагийн орой холбоотон орнууддаа хандаж үг хэлэхдээ Киев энхийн үйл явцыг урагшлуулахад бэлэн гэсэн аж.
АНУ-ын Ерөнхийлөгч Дональд Трамп мягмар гарагт "Бид гэрээ байгуулахад маш ойрхон ирж байна гэж бодож байна. Удахгүй яах нь мэдэгдэх байх. Бид ахиц гаргаж байна" гэж хэлжээ.
Дараа нь Трамп өөрийн сошиал хуудас дээрээ "Санал зөрөлдсөн хэдхэн зүйл л үлдсэн" гэж бичсэн байна.
Сүүлийн үед дипломат үйл ажиллагаа эрчээ авч АНУ-ын эх сурвалжууд ам сайтай байгаа ч гэсэн Украины эх сурвалжууд өөр дүр зургийг үзүүлж байна. Украины нэгэн эх сурвалж “CNN” агентлагт хэлэхдээ “Украин хүлээн зөвшөөрч буй хувилбартай болсон гэж хэлэх нь маш буруу” гэжээ. Украины Үндэсний аюулгүй байдлын нарийн бичгийн дарга Рустем Умеров хэлэхдээ төлөөлөгчид зөвхөн нийтлэг ойлголцолд хүрсэн гэжээ.
Лхагва гарагт /2025.11.27/ Путиний ойрын зөвлөх Юрий Ушаков хэлэхдээ, ОХУ хамгийн сүүлд боловсруулсан тохиролцооны албан ёсны хувилбарыг хараахан хүлээж аваагүй, харин албан бус хувилбарыг нь харсан гэсэн юм.
Кремль албан бус хувилбарын зарим хэсгийг эергээр хүлээн авсан ч хэд хэдэн зүйл заалтад нь ноцтой дүн шинжилгээ шаардлагатай гэж Ушаков хэлсэн байна.
ОХУ-ын Гадаад хэргийн дэд сайд Сергей Рябков Москва АНУ-ын энхийн санаачилгыг сайшаажээ. Гэхдээ тэр Украины асуудлаарх гол зүйлүүдэд буулт хийхгүй гэж мэдэгдсэн нь энхийн тохиролцоонд хүрэхэд нэлээд зай байгаа гэдгийг харуулсан юм.
Кремлийн хэвлэлийн төлөөлөгч Дмитрий Песков лхагва гарагт /2025.11.27/ дайныг дуусгах талаар яаран дүгнэлт хийхгүй байхыг анхааруулсан байна. Түүнээс сэтгүүлч ОХУ, Украин хоёр энхийн гэрээ байгуулахад хамгийн ойртсон мөч ирсэн эсэхийг асуусан аж. Үүнд тэр хариулахдаа "Түр хүлээгээрэй. Тэгж хэлэхэд хэтэрхий эрт байна" гэжээ.
Мөн Путин шинэчилсэн төлөвлөгөө нь Украинд энх тайван тогтоох хэлэлцээний суурь болох боломжтой гэсэн ч Украины цэргүүд гол бүс нутгууд дахь байрлалаасаа ухарсан тохиолдолд л байлдаан зогсоно гэсэн юм.
Хэрэв тэгэхгүй бол Оросын хүчин зорилгодоо хүчээр хүрэх болно гэж тэр нэмж хэлжээ. Энэ нь Москва дайны гол зорилгын нэг болох Украины зүүн хэсгийн Донбассын бүс нутгийг бүрэн хяналтдаа авах амбицаасаа татгалзах хүсэлгүй байгааг харууллаа.
Украины талыг баримтлагч эх сурвалжуудын мэдээлснээр ОХУ-ын хүчин Украины газар нутгийн 19 гаруй хувийг эзэмшиж байгаа. Энэ нь хоёр жилийн өмнөхөөс нэг хувиар өссөн үзүүлэлт.
Путин мөн Украины удирдлагыг хууль бус гэж үзэж байгаа тул Киевтэй гэрээ байгуулах нь хууль эрх зүйн хувьд боломжгүй зүйл гэж мэдэгдсэн. Тиймээс аливаа хэлэлцээрийг олон улсын хамтын нийгэмлэг хүлээн зөвшөөрөх, тэр дундаа ОХУ-ын хяналтдаа авсан газар нутгийг олон улс хүлээн зөвшөөрөх нь чухал болохыг тэр онцолсон юм.
Путин нэмж "Тийм учраас, ерөнхийд нь авч үзвэл мэдээж бид эцсийн дүндээ Украинтай тохиролцоонд хүрэхийг хүсэж байна. Гэхдээ яг одоогийн байдлаар энэ нь практикийн хувьд боломжгүй зүйл. Хууль эрх зүйн хувьд ч боломжгүй" гэж хэлжээ.
ОХУ-ын албан тушаалтнууд хэлсэн зүйлсээс харвал одоо өрнөж буй дипломат ажиллагаа тэвчээр нь алдагдаж буй Трампт л зориулсан тоглолт байх магадлалтай байна. “New American Security” төвийн ахлах судлаач Жим Таунсенд "Al Jazeera" агентлагт хэлэхдээ, ОХУ Трампыг тэвчээргүй, тогтворгүй нэгэн гэж харж байгаа тул буулт хийхээс зайлсхийхийн тулд цаг хожих тактик ашиглах магадлалтай гэсэн юм.
Таунсенд нэмж "Энэ бүхэн зүгээр л маш том будлиан болж хувирч мэднэ. Оросууд ямар ч дарамт шахалт мэдрэхгүй байгаа. Тэд хангалттай удаан тэсэж чадвал ялалт байгуулна гэж тооцоолж байна" хэмээжээ.
Эх сурвалж: NBC News, CNN, Al Jazeera
АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.
Оросын КГБ-гийн хүний үгэнд ерөөсөө итгэж болохгүй! Путин бол Гитлер цаашаа фашист шүү !!!
Хаха