Тодруулга: Сагил сумын нутагт баавгайн бамбарууш нохойнд бариулж үхсэн байдалтай олдсон

0 1 минут уншина

Увс аймгийн Түргэн сумын нутаг "Шивэр" гэх газар баавгай харагдсан гэх мэдээлэл цахим орчинд гарсан. Тэгвэл энэ талаар тус сумын байгаль хамгаалагч Б.Баньдиас тодрууллаа.

-Танай сумын "Шивэр" гэх газар баавгай байсан гэх мэдээлэл байна?

-Энэ сарын 25-нд "Шивэр" гэдэг газраас урьд өмнө харж байгаагүй мөр харлаа. Баавгай мөр юм шиг байна" гэсэн мэдээлэл нутгийн малчдаас ирсэн. Зургийг нь цахимаар илгээсэн байсан. Маргааш нь буюу 11-р сарын 26-нд тус мөрийг шалгахаар сумаас баг гаргаж явсан. Тус газар очиж, мөрний зураг болон бусад холбогдох зүйлсийг хавсаргаж Увс аймгийн Байгаль орчны газарт хүргүүлсэн. Удалгүй тухайн мөрийг "баавгайн мөр мөн байна" гэх хариу ирсэн.

-Тухайн баавгайг хаанаас ирсэн болохыг олж тогтоосон уу?

-11-р сарын 27-ны өдөр Сагил сумын нутаг дэвсгэр "Өндөр мод" гэдэг газар "баавгай үхсэн байна" гэх мэдээлэл аймгийн Байгаль орчны газраас ирсэн. Мэдээллийн дагуу хоёр сумын байгаль хамгаалагч нарыг очиход баавгайн бамбарууш үхсэн байдалтай байсан. Тус бамбаруушийг дөрвөөс таван нохой зэрэг дайрч, цавь, гуя, хүзүү, улаан хоолой зэрэг газарт нь шархдуулж улмаар үхүүлсэн нөхцөл байдал тогтоогдсон. Үхсэн бамбаруушийг аймгийн Байгаль орчны газарт яаралтай хүргүүлж ажилласан.

-Бамбарууш ганцаараа хил давж ирэх боломжтой юу, өөр баавгайн мөр олдсон зүйл байгаа болов уу?

-Бид нарын үзэж буйгаар бол тус бамбарууш ганцаараа яагаад ч орж ирэх боломжгүй. Тэгэхээр эх баавгай нь монголын хилээр орж ирсэн байх. Оросын нутгаас манай нутаг руу орж ирсэн гэж таамаглаж байгаа. Тиймээс дахин баавгай байж болзошгүй учир хяналтын байдалд шилжсэн байна. Нутгийн иргэдэд заавар зөвөлгөө өгч, "ямар нэгэн мөр илэрвэл яаралтай мэдээлэл өгөөрэй" гэж хэлсэн. Манай сум энэ жилийн тухайд зундаа гандуу байсан тул, энэ өвөл зудын байдалтай байгаа. Гэтэл "харь орны амьтан ирэх зун ногоо элбэг болохыг нь мэдээд тус нутагт нүүдэлж ирдэг" гэж нутгийн иргэд бэлэгшээж байгаа.

Энэ мэдээнд өгөх таны үнэлгээ