Төсөв нь 2 их наядаар тасалдсан ч, Г.Занданшатарын ЗГ томилгооноос өөр зүйл бодохгүй явна

Төрийн сангаар дамжих гүйлгээ зогсонги байдалд ороод, ер нь их удчихлаа. Сангийн яамнаас тодруулахаар "Бараг л хэвийн байгаа" гэх гөлийж, гүлдийсэн хариулт өгдөг.

Гэвчиг төрийн өчнөөн ажил үйлчилгээ хийчхээд, мөнгөө авч чадахгүй байгаа ААН-үүдийн тоо ихэссээр байна. Орон нутгуудад төсвийн байгууллагууд өнгөрсөн сарын цалингаа тавиагүй нөхцөл байдалтай сууцгааж байгаа. Төсвийн орлогын тасалдал 2 их наяд даваад явчихсан нь тодорхой болов.

Гэтэл МАН-ын бүлгийн мэдээллийн үеэр Эдийн засаг, хөгжлийн сайд Ж.Энхбаяр "Төсвийн орлого тасарсан талаар бусад улс төрийн намууд их ярьж байна. Энэ их хор уршигтай" гэж авч байна. Олон жил нэг нам засаглахаараа ингэж ичих ичгүүрээ гээдэг ажээ. Орлого тасарсан тул бусад улс төрийн намууд энэ талаар ярих нь, асуудлаа хөндөх нь байх үйл явц, харин ч эрүүл үзэгдэл. Байтлаа одоо бусад намууд нь юу гэж ярихаа МАН-аар заалгах юм гэнэв.

АН саяхнаас татварын өршөөлийн хууль санаачлах асуудлыг хөндөв. Гэтэл Сангийн яамнаас "Учиртайхан улс төрж" ухааны мэдэгдэл О.Цогтгэрэлд зориулж гаргаж байх жишээтэй. Бүртгэлтэй ААН-үүдийн тал хувь нь Х тайлан өгч, 16 мянган компанийн дансыг татвар төлөөгүй гэдэг шалтгаанаар эрх баригчид хаачхаад байна. Тэгэхээр сөрөг хүчин ингэж дуугарах нь зүй ёсны хэрэг.

Ер нь улс төрчид хулгай хуудуугаа шуудхан эвсэн нэгдэх замаар, уучилж өршөөж, нам дарж болж байна. Зэрэгцээд нийгмийнхээ дундаж давхаргыг бүрдүүлж яваа хэдэн ААН-үүдээ чиглүүлж, өршөөл хэрэгжүүлэхэд яадаг юм.

МАН-д одоо ерөөсөө төсөв нь 2 их наяд даваад цоороод явчихсныг бодож байгаа хүн алга. Бүгд томилгооны хөөс рүүгээ шунган орцгоожээ. Авлигын хэргээр шалгагдаж явсан Баянхонгор аймгийн Засаг дарга асан С.Мөнхсайхан Ерөнхий сайдын зөвлөхөөр ирж, хаврын жагсаалтыг Ухаа худагийн захиалгаар дэглэсэн гэгддэг Д.Болд, Р.Чингис нарт Цагдаагийн байгууллагыг атгуулж, ЭТТ-гоос бийлэгжсээр яваа Сангийн яамны фракцдаа ганц нүүрсний ордоо бариулах лобби гэхчлэн бүгд томилгоондоо л улайрцгаав.

ТӨХК-иуд дээр ямар ч сонгон шалгаруулалт явуулсангүй. Ганц ЭТТ дээр сонгон шалгаруулалт зарласан нэртэй ч яасан ч мэдэгдэхгүй замхрав. ЭТТ дээр эдүгээ МАН-ын ирэх сонгуулиудын зардал босох учир хэн авах нь хамгийн их маргаан дагуулж байгаа нь тодорхой.

МИАТ ТӨХК-ийн захирлыг халж байгаад, Г.Занданшатарын танхимыг хамгаалсан гишүүний хүнийг томилж, Эрдэнэс Монгол дээр бас эх адаггүй уралцаанаа эхлүүлэв. Энэ бүх томилгооны дараа элчингүүд, дипломат албадын томилгоо явагдахаар эхнээсээ МАН дотооддоо үзэлцээд эхэлжээ.

Энэ зуур 2025 оны төсвийн жилд хичнээн ААН-үүд төрөөс төлбөрөө авч чадахгүй он давуулах бол. Тэдний өдөр тутмын үйл ажиллагааны доголдолд МАН санаа зовохгүй юм. Ирэх оны төсвийг ингэж оны эхнээс л бөөн ачааллаар булж, 2027 оны сонгуульдаа эг маггүй бэлтгэх ажилдаа дахин орно оо. Төлбөрийн урсгал хүндрэх тусам л улсад хортой. Улс төрчид яахав, яаж ийгээд амьд мэнд үлдэж, дараачийн сонгуульдаа бэлдэнэ.

Г.Занданштарын тэргүүлсэн танхим 2026 оны хавар эдийн засгаа үүрч дийлэх үү. Бүр унагаж орхиод дараачийнхдаа өгөх үү. Баахан шоудаж байгаад, хасах балансаа Үндсэн хуулийн бус аргаар орхиод зугтах зэрэг цөөхөн хэдхэн сонголтын цонх л тэдэнд харагдаж байгаа юм.

Г.ИТГЭЛ

Энэ мэдээнд өгөх таны үнэлгээ

Хуваалцаарай Жиргээрэй