Дохионы хэлний хэлмэрч С.Бямбацэрэнд зориулж шүлэг бичжээ

Мэргэжил бүхэн сайхан. Тэр тусмаа мэргэжилдээ эзэн нь байх, тултал нь эзэмших, түүндээ бүхнээ зориулах бүр ч сайхан. Мэргэжилдээ хэчнээн хайртай, дуртай нь үйл хөдлөл, алхам бүрээс нь илт мэдрэгддэг, бусдаас ялгардаг шилдгүүдийн нэг нь С.Бямбадэлгэр. “Дохионы хэлний хэлмэрч хийхэд хөлийн хуруу минь хүртэл хөдөлдөг” гээд инээмсэглэх түүнийг монголчууд андахгүй. Коронавирусийн халдвар аюулын харанга дэлдэж, хаалга тогшсоноос хойш ЭМЯ-ны өглөө бүрийн хэвлэлийн хуралд тэрбээр оролцон, дохионы хэлний хэлмэрчээр ажиллаж буй.

Оюутан байхдаа сонсголгүй найз нараасаа дохионы хэл сурч, 25 жил хэлмэрч, орчуулагч хийж буй С.Бямбадэлгэр Хөгжлийн бэрхшээлтэй хүний хөгжлийн ерөнхий газар (ХБХХЕГ)-ын дэргэдэх Сэргээн засах сургалт, үйлдвэрлэлийн төвийн Мэргэжлийн ур чадвар олгох сургуулийн дохионы хэлний багшаар ажилладаг. Мөн МҮОНТ-ийн “Цагийн хүрд” мэдээллийн хөтөлбөрийн дохионы хэлний хөтлөгч. “Цагийн хүрд”-ийг 20.00 цагт шууд нэвтрүүлдэг учир тэрбээр өдөр бүр гэртээ орой харьдаг гэнэ.

Ховд аймгийн Мянгад сумын харьяат, яруу найрагч Ц.Отгонбаатар С.Бямбадэлгэрт зориулан шүлэг тэрлэжээ.

БУРХАНААС ИРСЭН БЭЛЭГ

Аниргүйхэн орчлонг аргадах гэж та ирээ юу
Арван хуруундаа аялгуу шингээж та төрөө юмуу
Бусдын зүрхэнд мөрөөдлийн дууг нь эгшиглүүлэх гээд
Бурханаас та бэлэг болон мэндлээ юу
Чимээгүйхэн хорвоод аялгуу нэмэх гэж та ирээ юу
Чийгтсэн сормуус арчих салхи болон сэвэлзээ юм уу
Өрөөлийн сэтгэлд хайр түгээж амьсгалахаар
Өөрөө та бэлэг болон мэндлээ юу
Инээд дутах дэлхийг хөглөх гэж та ирээ юу
Ижий хайрын совинг харцандаа гэрэлтүүлж яваа юм уу
Бүтэн биш хүмүүний амьдралыг гүйцээхээр
Бүсгүй биеэрэй та бурхан болж мэндлээ юу
Чихээрээ сонсохгүй хэн нэгнийг сэтгэлээрээ сонсог гэж
Чин зүрхэнд нь та сонор нь болон аж төрдөг юм уу
Бусдын төлөө энэ биеэ зориул хэмээнэ
Бурхан таныг элч болгон илгээгээ юу
Сэтгэл зүрхээрээ орчлонг чагнахад ямархан өнгөтэйг та л мэднэ
Сэтгэл зүрхэнд ямархан эгшигээр хорвоо аялгуулдагийг та л сонсоно
Таны нүдээр амьдрал ямархан гэгээнээр оршино вэ
Та бурханы бүтээсэн хайр юм аа.

Энэ мэдээнд өгөх таны үнэлгээ

Хуваалцаарай Жиргээрэй