Нийслэлийн Онцгой байдлын газар, Мэргэжлийн хяналтын газар, Эрүүл мэндийн газар, Агаарын бохирдолтой тэмцэх газрын төлөөллүүд цаг үеийн асуудлаар мэдээлэл хийлээ.
Энэ үеэр НМХГ-ын дэд дарга С.Даваасүрэн “ Иргэд угаар мэдрэгчээ салгаж унтаад угаартах тохиолдол их гарч байна. Өнгөрсөн хугацаанд угаарын хийнд 12 хорооны 12 өрхийн 35 хүн хордсон байна. Үүнээс 20 насанд хүрэгчид, 15 нь хүүхэд байсан. Агаарын температур өөрчлөгдөж байгаатай холбогдуулан зуухныхаа бүрэн бүтэн байдлыг хангах, яндангаа хөөлөх шаардлагатай байна. Бид хөл хорио тогтоосонтой холбогдуулан товчоодоор орж, гарч буй иргэдийг шалгаж байгаа. Үүний хажуугаар түүхий нүүрс оруулж ирэхийг завдаж буй зөрчлүүд гарч байна. Тухайлбал, Гүнтийн даваагаар 50 кг, Гачууртаар 2.4 тонн түүхий нүүрс оруулж ирэхийг завдсан. Үүнийг тухай бүрт хурааж, арга хэмжээ авч байгаа” хэмээн мэдэгдлээ.
НОБГ-ын мэргэжилтэн Э.Эрдэнэбаатар “ Хөл хорио тогтоож, зам хаасны улмаас иргэдээс ар гэр рүүгээ очиж чадахгүй байна гэсэн гомдол их ирж байна. Үүний хүрээнд тухайн орон нутагт зорчих зайлшгүй хүндэтгэх шалтгаантай дараах тохиолдолд нэвтрүүлж байна.
- Ар гэрийн гачигдалтай,
- Өвчтэй хүн асарч сувилах,
- Албаны тусгай үүрэг гүйцэтгэх, жижүүрийн үүрэг гүйцэтгэх зэрэг хүндэтгэх шалтгаантай иргэдийг тусгай зөвшөөрлийн бичгээр нэвтрүүлнэ.
Нэвтрэх зөвшөөрлийн бичгийг иргэнд болон ААН-д олгож байгаа. Иргэд хүндэтгэх шалтгаанаа нотлох баримтын хамт хүсэлтээр өгөх ба Нийслэлийн Онцгой комисс зөвшөөрлийг олгож байна” гэв.
Б.УЧРАЛ
АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.