Монгол Улсын Засгийн газраас цар тахлын үед айл өрх бүр болон аж ахуйн нэгжүүдийн хэрэглээний эрчим хүч, дулаан, ус, усан хангамж, хогны төлбөрийг 2020.12.01-нээс 2021.07.01 хүртэл төр хариуцах шийдвэрийг гаргасан.
Гэтэл эрчим хүчний хэрэглээ огцом нэмэгдэж, доголдол үүсч, энд тэнд цахилгаан тасарч эхэллээ.
Тиймээс өнөөдрийн Засгийн газрын хуралдаанаар айл өрх, ААН-үүдийн цахилгааны хэрэглээнд тааз тогтоож, түүнээс илүү гарсныг иргэн, ААН хариуцахаар асуудлыг хэлэлцэхээр болжээ.
Энэ талаар Засгийн газрын Хэвлэл мэдээлэл олон нийттэй харилцах албаны дарга Ц.Ганзориг “Засгийн газраас шийдвэр гаргахдаа эрчим хүчний хэрэглээ 10-20 хувь өсөх тооцоог ч хийсэн байсан. Ус, дулаан, уур, цахилгаан, хог гээд зардлууд нь суурь үнэд нөлөөлдөг тул иргэн аж ахуй нэгжээ бодож ганц удаагийн буюу вакцинжуулах хугацаанд төр хариуцаж байгаа шийдэл. Бусдаар бол төгс 100 хувь алдаагүй шийдвэр гаргасан гэж хэлэхгүй. Учир нь эрсдлээс айгаад суугаад байвал халдварын үеийн аж амьдрал илүү дордох том эрсдэлтэйг бодолцсон шийдвэр байсан” хэмээн сошиал хуудастаа бичжээ.
АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.