Тангарагтай өдрийн ЗАХИАС

Өнөөдөр /2021.06.25/ 11.40 цагт У.Хүрэлсүх Монгол Улсын Ерөнхийлөгчийн тангараг өргөнө.

Үндсэн хуулийн нэмэлт өөрчлөлтөөр энэ удаагийн Ерөнхийлөгч зургаан жил төрийн эрхийг барина гэдгээрээ онцлогтой. Төрийн бодлого тодорхойлж, ард түмний эв нэгдлийн хангах үүрэг хүлээсэн хүнд зургаан жил гэдэг багагүй хугацаа юм. Монгол Улс хэдийгээр парламентын засаглалтай ч Ерөнхийлөгчийн байр суурь төрийн бодлогод багагүй үүрэг гүйцэтгэдэг. Шинэ Ерөнхийлөгч хуучин Ерөнхийлөгчийн хийж дуусгаагүй ажлыг үргэлжлүүлж, хийх чадаагүйг нь эхлүүлэх хариуцлагатай хугацаа ирж  байна.

Хамгийн эхэнд “Оюутолгойн асуудал ба Рио-Тинто”-гийн ажил нэрлэгдэж байгаа. Х.Баттулга суудлаасаа буухдаа зориуд Рио-Тинтог дараагийн төрийн тэргүүнд захьсан утга дайсан. У.Хүрэлсүх Ерөнхийлөгчид нэр дэвшсэн мөрийн хөтөлбөртөө Дубайн гэрээг цуцлах чиглэлээр УИХ, Засгийн газартай хамтран ажиллана гэдгээ яг таг тусгаж өгсөн. Мөн Оюутолгой төслийн үр өгөөжийг нэмэгдүүлэх чиглэлд хатуу шаардлага тавьж, Монгол Улсын эрх ашгийг хангаж ажиллана гэж тусгасан билээ. Үнэхээр ирээдүй хойчийнхоо төлөө чөмгөө дундартал зүтгэхээр шийдсэн бол хамгийн түрүүнд Рио-Тинтотой ажиллаасай, шинэ Ерөнхийлөгч.

Ерөнхийлөгч Х.Баттулгын өнгөрсөн дөрвөн жилийн хугацаанд хэрэгжүүлсэн хамгийн том төсөл нь төмөр замын бүтээн байгуулалтын ажил. Эл дуусаагүй ажлыг Ерөнхийлөгч У.Хүрэлсүх яалтчгүй үргэлжлүүлэн дуусгаж таарах нь. Хоёр жилийн өмнөөс эхэлсэн Үндэсний хэмжээний томоохон төслийн ажил үндсэндээ дуусах шатандаа ороод буй. Монгол Улсын экспортын гол бүтээгдэхүүн болох нүүрсийг дэлхийн зах зээлд гаргахад том түлхэц болох Тавантолгой-Зүүнбаян, Тавантолгой-Гашуунсухайт чиглэлийн төмөр замын төслийг цааш үргэлжлүүлэх нь эдийн засагт хамгийн оновчтой бодлого болох юм.

Монголоор дайруулах хийн хоолойн төсөл хэрэгжсэнээр манайд жилд нэг тэрбумын ашиг  өгөх өгөөжтэй хэмээн тодорхойлоод буй. Иймд хийн хоолой барих төслийг хэрэгжүүлэхэд Ерөнхийлөгчийн гадаад бодлого, хамтын ажиллагаа нэн чухал. 20 жил яригдсан эл асуудлыг 2019 онд Х.Баттулга В.Путинтай уулзах үеэрээ сөхсөн. Үүнийг үргэлжлүүлэхийг хэвлэлд өгсөн ярилцлагадаа мөн дурдаж захина лээ.

Дорвитойхон гурвыг нэрлэхэд л ийм байна. Харин ойрын хугацаанд бол улс төрийн хэрүүл, зодоон, ковид, хөл хорионоос залхсан ядарсан иргэдийн хүсч байгаа зүйл нь ажилтай, орлоготойгоо л үлдэх. Тиймээс улс орныхоо сайн сайхан амьдралын төлөө чөмгөө дундартал  зүтгэх ч яахав. Хамгийн  гол нь нэг намын дарангуйлал тогтоочихгүйг анхаарвал сайшаалтай юм шүү, Ерөнхийлөгч өө.

Энэ мэдээнд өгөх таны үнэлгээ

Хуваалцаарай Жиргээрэй