“Хүүхдүүдийн минь заяа түшиж, амьд мэнд гарч чадлаа”

Өнөөдөр өглөөний Сонгино хайрхан дүүргийн есдүгээр хороонд айлын байшин шатсан хэрэг гарсан талаар бид өмнө нь мэдээлсэн. Түймэрт өртсөн өрх ослын талаар дэлгэрэнгүй мэдээллийг өгч тусламж хүсэж байна. Тэрбээр:

“Бид өглөө унтаж байсан. Охин маань биднийг сэрээсэн. Дараа нь нөхрөө сэрээгээд цонхоороо үсэрч гарсан. Шөнө охин маань гэнэт яргалаад байсан. Хөлд байсан нь санаанд ороод татаж авсан. Намайг сэрэхэд үүдний амбаар битүү униартай гал харагдаж байсан. Хүүхдүүдээ аваад цонхоороо үсрээд гарсан. Гараад ирэхэд хоёр настай нэг хүүхэд маань дутуу байсан. Улаан дүрэлзсэн гал үүдний амбаарт оволзож байхад гадаа хүүхдүүдээ бүртгэсэн. Тэр үед хоёр настай хүү минь байгаагүй. Хүүгээ алдсан гэж бодсон ч, сүүлд олсон.

Гарч ирээд нэг хэсэг айл амьтан нүдэж дуудлага өгсөн. Онцгой байдал таван минутын дотор л ирсэн. Манайх гал түлээгүй.

Одоогийн байдлаар бидний хоолой аргаж байна. Зургаан сартай хүүхэд маань мээмээ идэхгүй байна. Амь мэнд гарч чадсаныг хүүхдүүдийн минь заяа түшлээ гэж бодож байна.

Гал хүчээ авсан бол дийлддэггүй юм байна. Энэ хавийн айлууд бүгд л унтраах гэж үзсэн. Бараагүй. Онцгойхон их хурдан ирж унтраасан. Тэд сайн ажилладаг юм билээ. Одоо бидэнд очих газар байхгүй. Бичиг баримт ч үгүй. Урд айлынхны хувцсыг өмслөө. Түймрээс нүцгэн гарч ирсэн.

Би ногоо тариад эхний ургацаа аваад ажил хийж байсан. Харин нөхөр маань Эмээлтэд туслахын ажил хийдэг. Нэг сэрэхэд л ийм юм болчихдог юм байна. Хүмүүс минь сэрэмжтэй байж, тог цахилгааны монтажаа сольж байгаарай гэж захья. Хүүхдүүдээ авч гарсандаа баярлаж байна. Түүнээс гар хөл минь бүтэн хойно болно бусад нь болно доо” гэлээ.

Иймд тэд сайхан сэтгэлт иргэдээсээ хандив хүсэж буй юм. Данс: 5069002253 - А.Алтантуяа

Энэ мэдээнд өгөх таны үнэлгээ

Хуваалцаарай Жиргээрэй