Нохойныхоо баасыг цэвэрлэх гэж хүрз барьж явсан гэж мэдүүлжээ

Үндэсний цэцэрлэгт хүрээлэнд дасгал хийж байсан хэсэг залуус руу нэгэн иргэн чимээ шуугиан гаргалаа хэмээн дайрч буй бичлэг олон нийтийн сүлжээнд ил болсон.

Эх сурвалжийн мэдээлснээр хүрз барьж дайрсан гэх уг иргэн нь 45 настай Б гэгч байсан бөгөөд гэр нь цэцэрлэгт хүрээлэнгийн ойр байдаг байжээ. Улмаар өглөө 5 өнгөрөөд маш их чимээ гарч, хөгжим дуугарч эхэлсэн учраас уур нь хүрэхдээ гэрээсээ гарч эл танхайрах үйлдлийг хийсэн байна.

Яагаад хүрз барьж гарч ирсэн талаараа тэрбээр мэдүүлэхдээ “Нохой тэжээдэг. Өглөө бүр нохойгоо салхилуулдаг. Дуу чимээ сонсоод, нохойгоо салхилуунгаа очиж сануулга өгье гэж бодоод цэцэрлэгт хүрээлэн орсон. Хүрзний хувьд нохой нь хаа сайгүй бааж, шээдэг учраас амьдрах орчноо цэвэр байлгах гэж хүрзээр баасыг нь авч хогийн сав руу хаядаг. Нохойн баасаа авч хаях гэж барьж гарч ирсэн хүрзээрээ далайсан. Гэнэт уурласнаас тийм үйлдэл гаргасан. Буруугаа хүлээн зөвшөөрч байна” хэмээжээ.  

-ЦЭЦЭРЛЭГТ ХҮРЭЭЛЭНД ДАСГАЛ ХИЙЖ БАЙСАН ЗАЛУУСТ ХАРИУЦЛАГА ХҮЛЭЭХ ҮНДЭСЛЭЛГҮЙ-

Цэцэрлэгт хүрээлэнд дасгал хийж байсан залуусын хувьд долоо хоногийн гурван өдөр ийн эртлэн хөгжмийн аянд дасгал хийдэг байсан гэж мэдүүлжээ. Улмаар зориулалтын олон нийтийн газар учраас Зөрчлийн хуулиар тэнд байсан залууст арга хэмжээ тооцох ямар ч үндэслэлгүй юм байна.

Зөрчлийн тухай хуулийн 5.5 дугаар зүйлд “Нийтийн зориулалттай орон сууцны оршин суугчдын амгалан тайван байдлыг алдагдуулвал хүнийг нэг зуун нэгжтэй тэнцэх хэмжээний төгрөгөөр, хуулийн этгээдийг нэг мянган нэгжтэй тэнцэх хэмжээний төгрөгөөр торгоно” гэж заажээ.

-ТАНХАЙРСАН ИРГЭН Б-Г 100 МЯНГААР ТОРГОХ ЮМ УУ 7-30 ХОНОГ БАРИВЧИЛНА-

Харин хүрз барьж, длайсан залуу эсрэгээрээ хариуцлага хүлээхээр болж байна. Тодруулбал, түүнийг Зөрчлийн хуулийн 5.2 буюу танхайрах зүйл ангиар шалгуулж байна. Цагдаагийн байгууллагаас түүний хэргийг прокурорт шилжүүлж, прокуророос түүнийг шүүхэд шилжүүлэх юм.

Ингэснээр шүүхээс түүнд 100 мянган төгрөгөөр торгох юм уу 7-30 хоног баривчлах ялаар шийтгэх юм.

5.2 дугаар зүйл.Танхайрах

1.Олон нийтийн газарт, эсхүл орон байранд:

1.1.хэрүүл маргаан үүсгэж;

1.2.бусдыг өдөөн хатгаж;

1.3.бусдын амгалан тайван байдал алдагдуулж;

1.4.олон нийтийг үл хүндэтгэж;

1.5.үйлчилгээний болон дарааллын журам зөрчиж биеэ авч явах нийтээр хүлээн зөвшөөрөгдсөн хэм хэмжээг зөрчсөн, эсхүл аж ахуйн нэгж, байгууллагын хэвийн үйл ажиллагааг алдагдуулсан бол хүнийг нэг зуун нэгжтэй тэнцэх хэмжээний төгрөгөөр торгох, эсхүл албадан сургалтад хамруулж долоогоос гуч хоногийн хугацаагаар баривчлах шийтгэл оногдуулна.

Энэ мэдээнд өгөх таны үнэлгээ

Хуваалцаарай Жиргээрэй