Айдастай ч бүлгийн кноптоо найдаж буй АРМИ

Улсын Ерөнхий Прокурорын зүгээс УИХ-ын нэр бүхий гишүүдийг бүрэн эрхээс нь түдгэлзүүлэн шалгах хүсэлт оруулна гэх мэдээлэл бий. Улс төрийн хүрээнд, нийт 12 УИХ-ын гишүүнийг бүрэн эрхээс нь түдгэлзүүлэн шалгах талаар яригдаж байгаа ч энэ нь шууд нотломжгүй байна.

Ерөнхий сайд Л.Оюун-Эрдэнэ "УЕП түдгэлзүүлэн шалгах гишүүдийнхээ нэрийг хурдан оруулж ир. Үүнийг хамтдаа шахацгаая" гэж залуусын тайван жагсаалын үеэр хэлсэн нь анхаарал татсан юм. Өөрөөр хэлбэл, эрх баригч намын даргын зүгээс "болохгүй" түүхтэй гишүүдээ түдгэлзүүлэн шалгах хүсэлтэй байгаа гэсэн үг юм.

Өнөөдөр УИХ-аас яг хэн хэнийг ямар хэрэгт хамруулан, түдгэлзүүлэхээр яригдаж байгааг онцолж байна.

А.Адъяасүрэн, Б.Бейсен нарт авлигын хэргээр яллах тогтоол үйлджээ

УИХ-ын гишүүн А.Адъяасүрэн нь өөрийн компанидаа тээврийн хэрэгслийн С зөвшөөрөл авахын тулд АТҮТ-ийн Тээвэр зохицуулалтын хэлтсийн дарга Г.Доржпаламд 100 мянган ам.долларын авлига өгсөн хэрэгт холбогддог. Түүнийг яллагдагчаар татах тогтоол үйлдэгдсэн ч танилцахгүйгээр, УИХ-ын бүрэн эрхээр халхавчлан хугацаа авч буй.

Б.Бейсен гишүүн нь Баян-Өлгий аймагт иргэдийг группт оруулах нэрээр бусдаас авлига авч, хуурамч онош тогтоосон хэрэгт холбогддог. Түүнийг 49 хүний хамт АТГ-аас мөн яллагдагчаар татан шалгасан бөгөөд Б.Бейсен нарт тусад нь яллах тогтоол үйлдэн, шүүхэд шилжүүлэхээр болсон гэх мэдээлэл бий.

Н.Алтанхуяг, Ж.Эрдэнэбат нарыг ХБ-ны хэрэгт татах агуулга

Хөгжлийн банкны асуудлаар Ерөнхий сайд асан Н.Алтанхуяг, Ж.Эрдэнэбат нарын бүрэн эрхийг түдгэлзүүлэн шалгана гэх мэдээлэл бий. Гол шалтгаан нь, тэднийг засаг барьж байх үед Хөгжлийн банкны Гүйцэтгэх захирлаар ажиллаж байсан Н.Мөнхбат, Д.Батбаяр нарын үед хамгийн муу, чанаргүй зээлүүд гарсан түүхтэй.

33 тэрбумын гурван гишүүнийг яллагдагчаар татах уу

Хөгжлийн банкнаас 33 тэрбумын зээл авч, сонгуулийн зардлаа босгосон гэгддэг Г.Амартүвшин, Г.Дамдинням, Х.Ганхуяг нарыг түдгэлзүүлэн шалгах асуудал нэлээд эртнээс яригдсан. Тэдний хувьд "Энгийн иргэн байхдаа авсан зээл" гэсэн тайлбарыг өгч буй. Г.Амартүвшин гишүүний хувьд бүрэн эрхээс түдгэлзэх боломжгүй байдлаар мэдэгдэл хийж, олон нийтийг төөрөгдүүлсэн шүүмжлэлд өртөөд байгаа юм.

С.Бямбацогт, Л.Энх-Амгалан, Ё.Баатарбилэг нар айдастай явна

УИХ-ын гишүүдийг эргүүлэн татах асуудал яригдаж эхлэнгүүт Хөгжлийн банкны асуудалтай нэр холбогдсон гишүүд битүү айдаст автсан. Прокуророос хүсэлт орж ирсэн тохиолдолд УИХ-ын гишүүдээ найрч, кнопоор өршөөгдөх боломжтой. Тэдний хувьд энэ боломж дээрээ ажиллаж эхэлсэн гэх мэдээлэл байгаа юм.

Жагсаалтаас Г.Занданшатар, Ж.Мөнхбат тэргүүтэй гишүүд чимээгүй сугарав

Хөгжлийн банкны чанаргүй зээлдэгчдэд нөлөөлсөн байж болох улс төрчдөөс хэд хэдэн хүн нэр цэвэр сугарчхаад байгаа. Тухайлахад, Хөгжлийн банкны дэд захирлаар ажиллаж байсан Б.Чойжилжалбуу нь Ж.Мөнхбат гишүүний ангийнх нь хүүхэд. Тэд Т.Бадамжунайгаар дамжиж Архангайнхан агуулгаар хамаг том зээлүүдэд нөлөөлсөн гэх логик харагддаг. Гэвчиг Ж.Мөнхбат гишүүн ангийнх нь найз саатуулагдчхаад байхад ч чимээгүй бүгэж байгаа юм.

УИХ-ын дарга Г.Занданшатарын хувьд Баянхонгорын гаралтай нэг компанитай нэр холбогдсон ч Ерөнхийлөгч асан Х.Баттулгын хүн гэх утгаар "бухаад" өөрөө чимээгүй үлдсэн. Түүний томилгоотой хүмүүс ч Хөгжлийн банканд өндөр албан тушаал хашиж байсан. Эдүгээ Хөгжлийн банкны асуудлаар хариуцлага ярьж суугаа хамгийн зохимжгүй дүрүүдийн нэг нь яах аргагүй Г.Занданшатар билээ.

Г.ИТГЭЛ

Энэ мэдээнд өгөх таны үнэлгээ

Хуваалцаарай Жиргээрэй