Японы Ерөнхий сайд асан Шинзо Абэ бусдын гарт харамсалтайгаар амиа алдсан. Үүнтэй холбогдуулаад Энэтхэг улс энэ сарын 9-нийг үндэсний гашуудлын өдөр болгон зарлажээ.
Ерөнхий сайд Нарендра Моди твиттер хуудастаа энэ талаар жиргэсэн байна.
Тэрбээр “Шинзо Абэг гүнээ хүндэтгэж байсны илрэл болгон 2022 оны долдугаар сарын 9-нд нэг өдөр үндэсний гашуудал зарлаж байна” гэж бичжээ.
Шинзо Абэг буудсан гэмт этгээд нь Нара хотын оршин суугч, 41 настай Тэцүя Ямагами гэгч. Тэрбээр Японы Өөрийгөө хамгаалах хүчний офицер байсан гэдгийг засгийн газрын хэд хэдэн албан тушаалтан хэлжээ. Өөрийгөө хамгаалах хүчин гэдэг нь Дэлхийн хоёрдугаар дайны дараах Японы арми юм. Дэлхийн хоёрдугаар дайны дараа Японы Энх тайванч үндсэн хуулийн есдүгээр зүйлд, “Япон улс дайнаас татгалзаж, хуурай газар, далай, агаарын хүчинд хэзээ ч цэрэг армитай байхгүй” гэдэг заалтыг оруулсан. Гэвч Шинзо Абэ энэ заалтыг өөрчилж, Японы цэргийн хүчийг нэмэгдүүлж, НҮБ-ын мандаттай үйл ажиллагаанд оролцох боломжтой болгосон. Үүнийг Японы зарим иргэн хүчтэй эсэргүүцэж байсан юм.
Цагдаа нар хэргийн нөхцөл байдлыг нарийвчлан шалгаж байна.
АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.