МАН Н.Энхбаярт "шагнал"-аа өгч, Үндсэн хуулийг шинээр бичих лоббигоо эхлүүлэх үү

ҮХНӨ-ийн асуудлыг судлах ажлын хэсгийг уг нь өнгөрөгч хавар УИХ-аас байгуулсан. Тус ажлын хэсгийг УИХ-ын гишүүн, Хууль зүйн байнгын хорооны дарга С.Бямбацогт ахлахаар болсон билээ.

Гэтэл Засгийн газраас чиглэлтэй ажлын хэсэг дахин байгуулчихжээ. Тодруулбал, хоёрхон долоо хоногийн өмнө буюу өнгөрөгч долдугаар сарын 27-нд Ерөнхий сайд Л.Оюун-Эрдэнэ захирамж гаргаж, ҮХНӨ-ийн асуудлаар Засгийн газрын дэргэд дахин нэг ажлын хэсэг байгуулжээ. Сонирхолтой нь, тус ажлын хэсгийг Н.Энхбаяраар ахлуулсан байгаа юм. Түүнчлэн "Иргэний зориг ногоон нам"-ын дарга Ц.Ганхуяг, "Монголын уламжлалын нэгдсэн нам"-ын дарга Б.Батболд, "Монголын үндэсний ардчилсан нам"-ын дарга Б.Цогтгэрэл, "Шинэ" намын дарга Ц.Гантулга нарыг багтаажээ.  

Ийн олон сар чимээгүй байсны эцэст Н.Энхбаяр хийх ажилтай болчихжээ. Тэрбээр МАН-тай сонгуульд хамтарч хүч үзсэн шагналаа аваагүй байсан билээ. ҮАБЗ-ийн дэргэдэх судалгааны хүрээлэнгийн захирлын суудал өгсөн ч өдий хүртэл очоогүй байв.

Ажлын хэсгийн ерөнхий чиг үүрэг нь, ҮХНӨ хийх асуудалд улс төрийн намуудын байр суурийг нэгтгэх. Мөн боловсруулсан саналаа есдүгээр сард танилцуулах. Ажлын хэсгийн ахлагчаар түүнийг тавьсан нь дараах хардлагыг төрүүлж байна.

НЭГДҮГЭЭРТ: Н.Энхбаярыг оруулж ирж байгаа нь "Эцэг хууль"-ийг өөрчлөх биш шинээр бичих гэснийх байж мэднэ". Учир нь Н.Энхбаяр бол Үндсэн хуулийг өөрчлөх биш, шинээр бичье гэдэг үзэл бодол баримталж, байр суурь илэрхийлдэг хүн.

ХОЁРДУГААРТ: ҮХ-ийг эрх баригч нам дангаар өөрчлөх нь ёс зүйгүй үйлдэл гэдэг логик дээр тулгуурлаж, тооны хувьд олон жижиг намуудыг шинэчлэгч үзэлтнээр удирдуулаад "Ард түмний санал дээр хүч нэмэрлэе" гэж сэтгэснийх буй за.

Шинэчлэх биш, өөрчлөөд өнгөрье гэхээр, нэгд, саяхан өөрчилсөн, хоёрт, өөрчлөлтийг гардаж хийсэн нөхдийн ихэнх нь УИХ-д одоо ч сууж байгаа учраас ард түмнийг сонгуулийн өмнө хуурч, саналыг нь зальдаж авсан нь (Өмнөх өөрчлөлтөөр "Давхар дээл"-ийг хязгаарлах гэх мэт иргэдэд таалагдсан заалтууд оруулсан) мэдэгдчих гээд "Хүний гараар могой бариулах" гэж байж мэднэ. Энэ үнэн бол яалт ч үгүй мигуйн санаа мөн.

ҮХНӨ оруулах биш шинээр бичих хувилбар "Хөшигний ард" яригдсан гэх мэдээллийг Н.Энхбаярын томилгоо улам лавшруулж байна.

УИХ-ын хаврын чуулган хаалтаа хийхийн өмнө УИХ-ын гишүүдийг хөдөө орон нутаг руу томилолтоор явуулж ҮХНӨ-ийн танилцуулга хийлгэсэн. Гэтэл үнийн өсөлтөд бухимдсан иргэд юун ҮХНӨ манатай, УИХ-ын гишүүдийг барьж идэх шахсан. Улмаар томилолтоос ирсэн гишүүдэд “Үнийн өсөлттэй холбоотой асуудлаар зуны цагт ч идэвхийлэн ажиллаарай” хэмээгээд хаврын чуулганаа хааж байв. Харин зун цагт УИХ-ын ээлжит бус чуулган зарлан хуралдуулж, ҮХНӨ-ийг хэлэлцэнэ гэсэн мэдээлэл урьдаас яригдсан. Гэвч гишүүдийг тойрогтоо ажиллаад ирсний дараа энэ магадлал унасан. Ээлжит бус чуулганы сураг өдгөө ч таг чиг.

Зуны уйтай улс төрийг цочоосон Н.Энхбаярын гэнэтийн томилгоо ийнхүү "Эрх баригчид "Эцэг хууль"-д өөрчлөлт оруулах биш, шинээр бичихээр сэтгэл шулуудахдаа ийн алгуурлаж байж мэднэ" гэж таамаглахад буруудахааргүй нөхцөл байдал үүсгэчихлээ.

Энэ мэдээнд өгөх таны үнэлгээ

Хуваалцаарай Жиргээрэй