Ил болсон гэрээ №2: “Бодь интернэшнл” $734.6 саяыг нүүрсээр “бартердаж”, $670 сая хэрхэх нь тодорхойгүй

Засгийн газрын шийдвэрээр “Эрдэнэс тавантолгой” ХК-ийн байгуулсан есөн оффтейк гэрээг улсын нууцаас гаргаад буй. Манай редакц тэдгээрийг цувралаар танилцуулж буй бөгөөд хоёрдугаар цувралдаа Богдхан төмөр замын гэрээг танилцуулж байна.

Урьдач мэдээлэл: Монголыг Евразийг холбосон транзит улс болгох ач холбогдолтой хэмээн тодотгогддог эл төмөр замын ажил яригдаад мөн л арван оныг үдэж буй. "Богд уулыг нүхэлнэ, нүхлэхгүй" гэж маргалддаг. Өнгөрөгч наймдугаар сард газар чөлөөлөлтийг ажил дөнгөж эхэлж байсан билээ.

-Гэрээг Б.Ганхуяг, Н.Удаанжаргал, Б.Долгормаа нар үзэглэжээ-

"Богдхан" төмөр зам төслийн хүрээнд:

• Богдхан төмөр зам төслийн туннел болон эстакадан гүүрний зураг төсөл, худалдан авалт, барилгын ажлын: /2022.06.27-нд байгуулсан/

• Богдхан төмөр замын төслийн суурь, бүтцийн барилгын угсралтын бүтээн байгуулалтын /2022.06.28-нд байгуулсан/

Гэрээнүүдийг: ЭТТ ХК талаас Б.Ганхуяг, “Тавантолгой төмөр зам” ХХК талаас Н.Удаанжаргал, "Бодь интернэшнл" ХХК талаас Б.Долгормаа нар үзэглэжээ.

Тоон мэдээллүүд: 12.2 сая ам.долларыг "Бодь интернэшль"-ийн нүүрсний гэрээнд сар бүр төлнө-

Төмөр замын нийт урт 130 км. Төслийн нийт санхүүжилт 1,404,863,059.38 ам.доллар юм. Үүний:

• Төмөр замын суурь бүтцийн барилгын ажилд 670,243,235.71 ам.доллар

• Туннел, эстакадан гүүрний зураг төсөл, худалдан авалт барилгын ажилд 734,619,823.67 ам.доллар

хэмээн тус тус хоёр гэрээ үзэглэжээ.

ТӨЛБӨРӨӨ ЯАЖ ХИЙХ ВЭ: ЭТТ ХК төлбөрөө нүүрсээр хийх ёстой. Нүүрсний үнийг хэрхэн тооцох вэ, хэдий хугацаанд төлж дуусгах вэ?

нүүрс нийлүүлэх гэрээнд дурдсанаар:

• Суурь үнийг 113.46-114.56 ам.доллар гэж тооцно. Ингээд “CR China Coking Coal Price Index”, “Metal Bulletin Coking Coal Index”, "Hard Coking Coal CFR Jingtang USD per tonne" зэрэг олон улсын мэдээнд үндэслэж, улирал бүр индексжүүлэхээр тохирчээ. Өөрөөр хэлбэл улирал бүр нүүрсний үнийг шинэчлэн тогтоож, тооцож явна гэсэн үг. 
•  2022 оны наймдугаар сараас эхлэн 2027 оны долоодугаар сар хүртэл нийт таван жилийн хугацаанд сар бүр төлөлт хийхээр тохирчээ.

Өөрөөр хэлбэл, ЭТТ ХК нь таван жилийн турш сар бүр 12.2 сая ам.доллар буюу нийт $734.6 саяыг “Бодь интернэйшнл” ХХК-д төлөх үүрэг хүлээжээ.

Анхаарал татах өнцөгүүд:

Гэрээг нийтэд нь авч үзвэл:

Суурь бүтээн байгуулалтын 670 сая ам.доллар хаанаас гарах нь тодорхойгүй

Суурь бүтээн байгуулалтын ажлын 670.2 сая ам.долларын өртөг бүхий гэрээг Б.Ганхуяг, Н.Удаанжаргал нар үзэглэсэн. Үүний санхүүжилт чухам хаанаас гарах нь гэрээнд бүдэг. Харин 734 сая ам.доллларыг нүүрс бартерийн гэрээгээр төлөх нүүрсний гэрээ нь хийгджээ.

Нүүрсний бартерийн сар бүрийн төлөлт наймдугаар сард эхэлжээ

"Бодь интернэшнль"-ийн нүүрсний гэрээнд 734.6 сая ам.долларыг төлөх төлөлтөд сар бүр 12.2 сая ам.долларыг төлөх бөгөөд эл төлөлт бүр хуваарь ёсоор бүр өнгөрөгч наймдугаар сараас эхэлжээ.

Бартерийн нүүрсийг Гашуунсухайт, Замын-Үүд боомтуудаар экспортолно

"Худалдагч нь энэ гэрээний дагуу нийлүүлэх нүүрсийг Гашуунсухайт боомтоор экспортлох тохиолдолд FCА-уурхайн ам нөхцөлтэй хатуу коксжих нүүрсний 20222 оын хоёрдугаар улирлын үнэ нэг тонн тутамд 113.46 ам.доллар, Замын-Үүд Эрээн боомтоор экспортлох тохиолдолд FCA-уурхайн ам нөхцөлтэй үнэ нэг тонн тутамд 114.56 ам.доллар байна. Өөр боомтоор экспортолсон тохиолдолд талууд суурь үнийг шинээр тохиролцоно" хэмээсэн байна.

Энэ гэрээнээс тусдаа 1.2 сая тонн нүүрс экспорт

Энэхүү гэрээний хүрээнд тусдаа гэрээгээр хамгийн багадаа 650,000 тонн бусад давхаргын коксжих нүүрс, 650,000 тонн исэлдсэн /эрчим хүчний/ нүүрс нийлүүлэх худалдан авах ба Худалдагчийн Нүүрс баяжуулах үйлдвэр ашиглалтад орсны дараа баяжмал нүүрс нийлүүлж, худалдан авна.

Улстөрийн ньюансууд:

"Бодь интернэшнл" эл төмөр замын бүтээн байгуулалтыг авсан нь анхаарал татдаг. Гашуунсухайтын төмөр замыг барьсан туршлагатай гэдгээр нь өгсөн ч гэдэг. Экс Ерөнхийлөгч "Голомт"-ын Д.Баясгаланд Гашуунсухайтаас нь эхлээд төмөр замын ажил өгөхдөө ээлж дараалан нууцын зэрэглэлд оруулж ирсэн.

Эл төмөр замын ажилд хойд хөрш оролцохыг хүсч ирсэн. Өнгөрсөн онд гэхэд хоёр талын уулзалтаар дэлгэрэнгүй мэдээлэл хүсч байв.

Харин ТЭЗҮ-д Солонгос, Монголоос тус тус нэг, нийт хоёр компани тунаж үлдээд байж. Тухайн үед эх сурвалжийн мэдээллээр сонгон шалгаруулалтын ажилд Монголын эрх мэдэлтнүүд нөлөөлж, эцсийн шатанд шалгарсан хоёр компанийг хоорондоо зохицон, санхүүжилтээ хуваагаад авчих гэх утгатай тулгалт үзүүлж буй аж. Улмаар тендерт тунаж үлдсэн  хоёр компанийн дунд зөрчилдөөн үүссэнээс Богд хан төмөр замын ТЭЗҮ боловсруулах ажил удаа­ширчээ.

Уншигч та санхүүжилтийн гэрээг нь ЭНД, нүүрс нийлүүлэх гэрээг нь ЭНД танилцаарай.

Бидний өмнө нь нийтэлсэн Ил болсон гэрээ №1: “Бодь интернэшнл” $895.6 саяыг нүүрсээр “бартердаж”, $110 саяыг урьдчилж авчээ контентийг ЭНД дарж уншина уу.

Энэ мэдээнд өгөх таны үнэлгээ

Хуваалцаарай Жиргээрэй