"Бид буцаж очоод уулзсан бүх хүндээ "Монгол руу явж үзээрэй" гэж хэлнэ"

Монгол Улс "Welcome to Mongolia" хөтөлбөр хэрэгжүүлж, энэ жил 1 сая жуулчин эх орондоо хүлээж авахаар зориод байна. Статистик мэдээгээр, өдөрт дунждаар 3 мянган жуулчин Монголд ирж байна.

Харин энэ долоо хоногт БНСУ-ын модель, загвар өмсөгч дөрвөн эмэгтэйн аялал монголчуудын анхаарлыг татлаа.

Тэднийг "Tourade" аялал жуулчлалын компани санал тавин, авчирчээ. Тэд анхлан говь нутгаар аялж үзэх хүсэлтэйгээ хэлсэн байна. Энэ дагуу Дундговь аймагт голчлон төвлөрөхөөс гадна боломжит маршрутаар аялж байгаа аж.

Модель эмэгтэйчүүд Дундговь аймгийн "Цагаан суварга" байгалийн үзэсгэлэнт газар зураг авалтаа хийж байхад нь бид сурвалжлахаар очиж, ярилцсан юм.

ВИДЕО ЯРИЛЦЛАГА:

Тэднийг товч танилцуулъя.

Модель Biki нь Инстаграмд хагас сая дагагчтай, 171 см өндөр.

Харин Key нь Инстаграмд 30 мянган дагагчтай, 164 см өндөр. Foxeyon-ий хувьд 169 см өндөр, 15 мянган дагагчтай. Тэгвэл Gopa Noona нь 170 см өндөр, 200 мянган дагагчтай юм байна.

Тэд Plus Size ангиллын моделиуд.

"Хүмүүс Монголд очвол хэцүү гэж анхааруулж байсан. Хэцүү зүйл байхгүй байна"

 -Монголд ирээд хамгийн ихээр таалагдсан зүйл юу вэ?

-[Key] Тал нутаг. Үнэхээр гайхалтай байсан. Учир нь манай оронд ийм тал нутаг байдаггүй.

-[Foxeyon] Өчигдөр шөнө тэнгэр лүү харахад од нь үнэхээр гоё байсан. Солонгост одод тэгж харагддаггүй.

 -[Biki] Хамгийн гоё нь хоолнууд. Би уг нь бичлэгтэй үедээ хоол ихээр иддэггүй юм. Энэ удаад идэхээ зогсоож чадаагүй. Хонины мах гэж тийм гоё амттай байдаг юм уу?

 -[Gopa Noona] Янз бүрийн амьтдыг ойроос харсан нь гоё санагдсан. Бас Монгол хүмүүс их эелдэг, найрсаг юм байна. Би лав энэ эелдэг занг нь хэзээ ч мартахгүй байх аа.

-Монголд ирээд хэцүү санагсан зүйл байгаа юу. Байгаа бол юу вэ?

-[Biki] Би яг ирэхийнхээ өмнө Монголын талаар их мэдээлэл авсан. Тэгэхэд хүмүүс Монгол бол хэцүү, хоол нь шорвог, их ядардаг, 00 олддоггүй шүү гэж анхааруулж байсан.

Яг ирсэн чинь хэцүү зүйл байгаагүй. Хоол нь гоё амттай, зочид буудлууд нь гоё, 00 нь нь ч бас гоё байсан. Харин хол замд байгальд бие засаж үзсэн. Энэ миний гадаа бие засаж үзсэн анхны тохиолдол. Хэцүү гэхээсээ илүү сонирхолтой, шинэлэг байсан.

-[Gopa Noona] Яах вэ, Өмнөд Солонгос, Монгол хоёр соёлын хувьд ялгаатай учраас хэцүү зүйл байсан. Гэхдээ гоё сайхан зүйлс нь их тул муу тал нь ерөөсөө харагдахгүй байна.

"Солонгосын үндэсний "гэр" соёл бараг устсан. Харин монголчууд өвлөн тээж байна"

 -Монголчууд бол нүүдэлчин ард түмэн. Монголын мал аж ахуйтай танилцаж амжсан уу. Ямар санагдсан бэ, өмнө нь энэ тухайд ямар төсөөлөлтэй байсан бэ?

 -[Gopa Noona] Монгол гэр, нүүдэлчин айлд орж үзээгүй байгаа. Интернэтээр Монголын нүүдэлчин, мал аж ахуйн талаар их үзсэн. Монгол гэр их хөөрхөн хэлбэртэй санагдсан, заавал орж үзмээр санагдаж байгаа.

 -[Biki] Монголд нүүдэлчдийн гэр байдаг шиг Солонгост бас тийм үндэсний гэр шиг зүйл бий. Тэр нь одоо бол устаж байгаа. Харин Монголчууд энэ соёлоо гээхгүй халгалж байгаа нь бахархмаар санагдсан.

-Яагаад заавал Монголын говийг зорьж ирсэн юм бол?

 -[Key] Монголын говийг интернэтээс олон удаа харсан. Харсан даруйдаа л очиж зураг авалт хийж үзмээр санагдсан. Яагаад гэвэл Солонгосын хаана ч ийм өргөн газар нутаг байдаггүй.

-[Foxyeon] Би өмнө нь Австралийн элсэн цөлд очиж үзэж байсан. Харин Монголын элсэн цөлд тэмээ байдаг болохоор тэмээ унаж үзмээр санагдсан.

-[Biki] "Tourade" компанитай анх хамтран ажиллах санал солилцож байхдаа шууд говь явмаар буйгаа хэлсэн. Яагаад гэвэл манай "Curvenus" клубийн имижтэй их зохицох юм шиг санагдсан.

 -[Gopa Noona] Солонгос хүмүүсийн дунд Монголын элсэн цөл өдөр ч, шөнө ч үзэсгэлэнтэй гэдэг яриа байдаг. Түүнийг нь сонсоод шууд л явмаар санагдаад, энэ боломжийг алдахгүй гээд ирсэн. Бас од үнэхээр гоё байсан.

-Хэрвээ дараагийн удаа дахин Монголд аялахаар бол хаашаа явах вэ?

 -[Biki] Энэ удаа хугацаа бага зэрэг давчуу байгаа болохоор Хөвсгөл рүү явах байсан ч амжихгүй нь. Хөвсгөлийн өвлийг хармаар байгаа. Өвлийн улиралд Хөвсгөл үнэхээр үзэсгэлэнтэй байдаг гэсэн.

-[Key] Би дараа өвөл л ирмээр байна. Өвөл л ирж байвал, ирсэн газраа дахиж ирсэн ч яах вэ. Учир нь улирлаа дагаад Монголын газар нутгууд өнгөө их өөрчилдөг гэж сонссон.

"Бидний тухай бичсэнийг уншаад инээлдээд л өнгөрсөн"

-Монголд ирээд унага зэллэсэн айлд очсон байсан. Тэгэхээр гүүний айраг ууж үзсэн үү. Хэрвээ үзсэн бол айрагны амт таны урьд мэддэг ямар амттай төстэй байсан бэ?

 -[Key] Эхлээд амсаж үзээд их гайхсан. Ямар нэгэн зүйлтэй зүйрлэж чадахгүй байсан.

 -[Gopa Noona] Солонгост макколи гээд архи байдаг. Макколийг тарагтай хольчихсон юм шиг амттай төстэй санагдсан.

 -Монголчууд нэг талаараа хошин ард түмэн. Интернэтэд оруулсан пост болон сэтгэгдлүүдийг уншиж байгаа юу. Уншсан бол хэрхэн хүлээж авсан бэ?

 -[Biki] Бидэнд монгол хүнтэй уулзах боломж гардаггүй шүү дээ. Харин энд ирсэн цагаасаа хойш үргэлж Монгол хүмүүстэй уулзаж, ярилцаж байна. Уулзаад үзэхэд их гоё, найрсаг болон хөгжилтэй ард түмэн санагдсан. Бас аливаа зүйлийг гялс, гялс амжуулчихья гэж боддог, шуурхай ард түмэн юм шиг.

-[Gopa Noona] Интернэтэд оруулсан постуудыг ер нь орчуулж уншиж үзсэн шүү. Ихэнх сэтгэгдлүүд нь бид нарыг "Үзэсгэлэнтэй", "Гоё байна" гэсэн утгатай байсан. Харин зарим нь хошигносон байсан. Түүнд нь бид инээлдээд л өнгөрсөн. Цаашдаа үргэлж биднийг гоёор харж байгаасай гэж хүсэж байна аа.

-"Tourade" компаниар Монголд аялах ямар байна вэ?

 -[Key] Энэ компантай уулзаад аяллаа эхэлсэн цагаас хойш нэг ч хэцүү зүйл байгаагүй, нэг ч асуудал тулгараагүй. Мөн бүх хоол амттай, бүх байрлаж байгаа газар тухтай. Өмнө нь Монголын талаар бусад хүмүүсийн хэлдэг бүх зүйл эсрэгээрээ санагдаж байна.

 -[Foxyeon] Ирэхийн өмнө хүмүүсийн хэлж байсан "Их хэцүү ш дээ, яах гэж явж байгаа юм бэ?" гэдэг үгсээс тэс ондоо байна. "Tourade" бидний бүх зүйлсийг үнэхээр сайн хангаж өгсөн. Мөн ажилчидтай нь яг л гэр бүл шиг харилцаатай болж, сайхан санагдаж байгаа.

-[Biki] Би бас Монголд ирсэн цагаас хойш "Tourade"-ийнхэнд маш их баярлаж байгаа. Би лав Солонгост очоод эргэн тойрны бүх хүмүүстээ Монгол руу явж үз. Тэгэхдээ заавал Tourade гээд компаниар яваарай гэж хэлнэ.

-Бидний байгаа энэ газар буюу Цагаан суваргатай төстэй байгалийн тогтоц Солонгост байдаг уу. Өөрийн мэдэх газар нутагтай зүйрлэхгүй юү?

 - Төстэй, жижигхэн газар нь байх нь байдаг ч яг ийм нь дэлхийн хаана ч байхгүй байх

. -Монголд ирээд сурсан үг байгаа юу?

 - [Key] Сайн уу?

 - [Gopa Noona] Ах аа.

 - [Biki] Болд. /Манай захирлын нэр.орч/

 - [Foxyeon] Баярлалаа.

• 

• 

"Био 00, зөөврийн душ авч явдаг. Жуулчид замдаа гайхан дуу алдсаар байдаг"

Зураг авалтын үеэр БНСУ-ын моделиудын аяллыг хариуцаж байгаа "Tourade" компанийн төлөөлөлтэй товч ярилцлаа.

-Сайн байна уу. Та өөрийгөө болон аялал жуулчлалын компаниа танилцуулахгүй юү?

 -Сайн байцгаана уу. Намайг С.Болд гэдэг. Манайх бол "Tourade" буюу "Гүн-Үйлс" гэдэг нэртэй компани. Монголд аялал жуулчлалын чиглэлээр үйл ажиллагаа явуулаад арав гаруй жил болж байна.

Манай компани цар тахрлаас хойш үйл ажиллагаагаа эрчимжүүлэх тал дээр анхаарч, Өмнөд Солонгос улсаас топ модел болох Ssun Biki болон түүний багийг Монголд урьж авчран, энэхүү аяллыг зохион байгуулж байна.

-Энэхүү аяллыг хэзээнээс төлөвлөсөн бэ?

-Хагас жилийн өмнөөс төлөвлөсөн. Бид хагас жилийн өмнө Biki болон түүний багтай холбоо барьж, Монгол Улсад аялах сонирхолтой байгааг нь мэдэж авсан. Тэд говиор аялах хүсэлтэй байсан тул энэ удаагийн аяллаа говьд зохион байгуулж байгаа.

-Таны бодлоор Монгол Улсад аялал жуулчлал хэр хөгжиж байна вэ?

 -Засгийн газраас зохион байгуулж буй ‘’Welcome to Mongolia’’  аяны хүрээнд манай аялал жуулчлалын салбар нэлээд ивэвхжиж байх шиг байна.

-Жуулчидтай ажиллахад Монгол Улсаараа бахархдаг зүйл юү вэ?

 -Мэдээж бахархмаар зүйлс олон. Онгоцноос жуулчдаа тосож аваад л явж байхад манай хээр тал, нүүдэлчин соёлыг хараад уулга алддаг. Их сонирхолтой санагддаг шиг байгаа юм. Өмнө нь авч байгаагүй шинэ мэдрэмж авдаг шиг санагддаг.

-Бахархмаар зүйлсийн хажуугаар сэтгэл дундуур зүйлс ч бас байдаг байх.

-Мэдээж сул тал байгаа. Дэд бүтцийн хувьд сул талтай. Гэхдээ цаашдаа илүү сайхан хөгжих байх аа.

-Танай компани ихэвчлэн ямар төрлийн аялал зохион байгуулдаг вэ?

 -Манайх голдуу тусгай аяллууд их зохион байгуулдаг. Тэр нь юу вэ гэхээр, экстрим аяллууд, хуримын болон моделуудын зураг авалтын аялал зохион байгуулдаг. Ихэвчлэн БНСУ-аас жуулчид авчирч байгаа.

 -Өөрсдийн компаниас үл хамаарсан, ичмээр ч гэмээр зүйл хэр тохиолддог вэ?

 -Яах вэ, ичмээр гэж хэлэхээс илүүтэйгээр хөгжилтэй зүйлс их болдог.

Жишээ нь замд явж байхад жуулчид бие засах шаардлагатай болох үед био 00-оо гаргаж угсарч амжихгүй. Иймд байгальд бие засуулах хэрэгтэй болдог. Тэр нь жуулчдад сонин боловч нэг талаараа экстрим санагддаг шиг байгаа юм.

-Яах ч аргагүй 00-ийн асуудал ихээхэн тулгамддаг. Танай компанийн хувьд био 00-оор шийддэг гэсэн үг үү?

- Тийм. Манайх өөрсдийн био 00, зөөврийн душ, зөөврийн цахилгаан цэнэг хураагуур зэрэг байгалд ээлтэй хэрэгсэл ашиглаж, үйлчилгээний машинаа дагалдуулж аялдаг болохоор тав тухтай гэж хэлж болно.

 -Энэ удаагийн аялал нь бизнес, зураг авалттай холбоогүй, цэвэр аялал жуулчлалын зорилготой юу?

 -Харилцан бие биедээ ашигтай гэж болно. Моделууд маань манай үйл ажиллагаа болон Монгол Улсыг Өмнөд Солонгос улсад сурчалчлан таниулна. Харин манай зүгээс Монгол орноороо тав тухтай аялуулах л зорилготой.

Сурвалжлах баг: Ц.Даваасүрэн, Б.Мягмарбаяр, О.Улсболд