Ж.Хатанбаатар, Ё.Баатарбилэг нарын ургийн мод ургаж, Архангайнхан үүрлэсэн Допингийн эсрэг үндэсний төв

Сүүлийн хэдэн өдөр үндэсний их баяр наадмын барилдааны допингийн асуудал маргаан дагуулж, олон олон асуулт эргэлзээ үүсгээд байна. МҮБХ нь “битгий таамаглал дэвшүүлж, бөхчүүдийн нэр хүндэд халдацгаа” гэх утгатай сүржин даржин мэдэгдэл гаргасан. Харин допингийн эсрэг байгууллага нь өдгөө ч нүдэн балай, чих нь дүлий таг чиг.

MONADA буюу Монголын үндэсний допингийн эсрэг байгууллага гэх сүржин нэртэй ч анир чимээгүй оршин тогтнох нэгэн төв байдаг. Эл байгууллага мэргэжлийн байгууллагын үүргээ гүйцэтгэж чадахгүй байна гэж шүүмжлүүлсээр ирсэн ч хариуцлага, ёс зүй гэдэг хэмжүүрийн уланд хүрчихсэн хэвтэнэ.

Энэхүү байгууллагын тухай хөндөх цаг болсныг салбарынхан нь сануулсаар байгаа ч, дорвитой үр дүн алга.

-Н.Энхбаяр, Ё.Баатарбилэг хоёрын сүүдэр дор шадарлаж явсан Ж.Хатанбаатар 13 жил допингийн эсрэг төвийг удирдав-

Үндэсний допингийн эсрэг байгууллагын ерөнхийлөгч Ж.Хатанбаатар. 2010 оноос хойш 12 жилийн хугацаанд удирдаж, бодлогыг нь зангидаж ирсэн. Гэхдээ тэр энэ байгууллагыг удирддаггүй юм шиг нам гүм суусаар.

Жамбалын Хатанбаатарын хувьд: Ерөнхийлөгч асан Н.Энхбаяртай тун ойр шадарлаж явсан. Мөн нэг нутаг усных гэдгээс эхлээд “Бурхан багшийн сургааль” номыг хамтран орчуулж, сүм хийд, энергийн төвүүд, элдэв ренбүчи нартай холбогдож явсцгаасан. МАХН-ыг байгуулахад намынх нь гишүүн болж, Эрүүл мэндийн яамны ТНБД албан тушаалд сууж билээ.

Тухайн үедээ нэг их удалгүй яамны сайдтайгаа тохирдоггүй, эмнэлгийн дарга нарын томилгооны хэл амтай холбоотойгоор ажлаа өгч байв. Дараа нь Ё.Баатарбилэг УИХ-ын гишүүнээс БСШУС сайд болох үед Ж.Хатанбаатар зөвлөхөөр нь ажиллаж шадарласан.

Улстөрийн хүрээлэлд дунд тэдэнтэй ой дотно шадарлаж явсаар эцсийн мөчид Үндэсний допингийн эсрэг байгууллагад удирдагчаар ирж суусан түүх нь энэ.

-Хоёр хүүгээ төрийн цалинтай золгуулж, хүргэнээрээ удирдуулж ард нь сууна-

Байгууллагаа арван жил удирдах хугацаандаа хоёр хүүгээ бас хүргэнээ гээд бараг гэр бүлээ бүгдийг нь шургуулах нь холгүй сууна. Тодруулбал,

Өөрийн хүү Х.Дэлэгийгээ Удирдах зөвлөлд буюу эрх барих этгээдүүд дунд багтааж амжсан байдаг.

Нийт арав гаруй ажилтантай үйл ажиллагаа явуулдаг байгууллагын Сургалт, сурталчилгаа, судалгаа, допингийн эсрэг мэдээлэл, урьдчилан сэргийлэлтийн албаны даргаар хүү Х.Занабазар нь ажилладаг. Эл байгууллагаас тэрбээр 500 гаруй мянган төгрөгийн цалин сар бүр авч суудаг.

Үндэсний допингийн эсрэг байгууллагын Гүйцэтгэх захирал Д.Мөнхболд. Түүнийг Ж.Хатанбаатарын хүргэн гэгддэг. Тэр хадам аав нь энэ байгууллагын ерөнхийлөгч сэтэртэй ч, ямар ч үүрэг оролцоогүй юм шиг нам гүм суухад хамаг цаас бичиг дээр хүргэнийх нь гарын үсэг заларч, удирдах албан тушаалтны орыг залж суугаа билээ.

Үүсгэн байгуулсан цагаас нь өнөөдрийг хүртэл хугацаанд ажиллаж буйг нь буруутгаж боломгүй ч нэг хүүгээ Удирдах зөвлөлд, нөгөөг нь допингоос урьдчилан сэргийлэх албаны даргаар тавьсан нь хөндлөнгийн хүн харсан ч ашиг сонирхлын зөрчил гэдэг илт. 

-Ё.Баатарбилэгийн эгч удирдах эрх баригчдынх нь эгнээнд ороод удаж байна-

Допингийн эсрэг үндэсний төв гэгчээ цэвэрлэхгүй бол ерөөс Архангайнхны ургийн мод ургачихсны жишээ бол БСШУС-ын сайд асан, УИХ-ын гишүүн Ё.Баатарбилэгийн эгч. Түүний эгч Ёндонпэрэнлэйн Цэрмаа эрх барих этгээдүүдийн жагсаалтад ороод удаж байна. Ё.Цэрмаа ч мөн тус байгууллагаас сар бүр 500 гаруй мянган төгрөгийн цалин авдаг.

Мөн Ё.Баатарбилэгийн найз ч бий гэх эх сурвалжийн мэдээлэл бий.

Допингийн эсрэг тэмдэг гэх тодотголтой энэ байгууллагад улсын төсвөөс жилд хагас тэрбум гаруй төгрөг хуваарилагддаг. Ерөнхийлөгч Ж.Хатанбаатар, Гүйцэтгэх захирал Д.Мөнхболд, нягтлан С.Батцэцэг, Х.Занабазар, Д.Энхсанаа, С.Нямжав, Ч.Энхмаа, Б.Гэрэлт-Од, Н.Ишбазар, Б.Амартүвшин, Д.Эрдэнэтогтох, Т.Балдорж гэсэн хүмүүс төсвийн мөнгөөр цалинжиж сууна.

Энэ мэдээнд өгөх таны үнэлгээ

Хуваалцаарай Жиргээрэй