Интермед мөнгө төлөөгүй бол өвчтөнүүдийнх нь онош, шинжилгээний хариуг өнөөдөр дэлгэнэ

Интермед эмнэлгийн өвчтөнүүдийн мэдээллийг Москвад төвтэй "SpaceBears" бүлгэм хакердаж, 280 мянган хүний хувийн мэдээлэл, утасны дугаар, эмнэлгийн дата зэргийг хулгайлаад буй. Тус бүлгэмийн үйл ажиллагаа нь дата барьцаалж, мөнгө шаардахад чиглэдэг.

Цахим аюулгүй байдлын менежмент, заналхийллийн эсрэг үйл ажиллагаа явуулдаг "HackManac"-ийн мэдээлснээр, аравдугаар сарын 30-ны өдөр тус эмнэлгийн цахим дата руу халдсан гэгдээд байгаа.

"SpaceBears" нь эрүүл мэндийн байгууллагуудад чиглэсэн, нууц, хувийн мэдээллийг хулгайлж, өндөр дүнгээр мөнгө шаарддаг бүлгэм.

Дээрх асуудлын хүрээнд тус эмнэлэгт Цахим хөгжил, инновац, харилцаа холбооны яам хоёр хоногийн өмнө ажиллаж хяналт, шалгалт хийсэн. 

Тэгвэл анх "SpaceBears" бүлгэмийн авсан Интермед эмнэлгийн үйлчлүүлэгчдийн мэдээллийг задруулж, өчигдрөөс ил байршуулж эхэлсэн. Тус мэдээлэлд эхний байдлаар өвчтөний овог нэр, утасны болон регистерийн дугаар мөн зарим үйлчлүүлэгчийнх нь дансны дугаар зэрэг багтаж байна. Тодруулбал энэ сайтад нээлттэй байршуулжээ.

Үүний дараа эл мэдээллийг хар захад байршуулсан этгээд “24 цагийн дараа өвчтөнүүдийн түүх болон шинжилгээний хариуг дэлгэнэ” гэж мэдэгдсэн. Өөрөөр хэлбэл тус эмнэлэг шаардсан мөнгийг нь өгөөгүй тохиолдолд үйлчлүүлэгчдийнх нь нууц мэдээлэл хар зах дээр ил болно гэсэн үг.

Тухайн үйл явдалтай холбогдуулж Интермед эмнэлэг хоёр ч удаа мэдэгдэл гаргаад буй бөгөөд сүүлд буюу өчигдөр үйлчлүүлэгчдээсээ хүлцэл өчиж “өвчний түүх, шинжилгээний хариу зэрэг эмзэг мэдээлэл алдагдсан нь одоогоор тогтоогдоогүй” хэмээн мэдэгдээд байна.

Энэ мэдээнд өгөх таны үнэлгээ

Хуваалцаарай Жиргээрэй