Улстөрчидтэй хамааралтай бизнесийнхнээр дүүрсэн уяачдын холбоо, адуутай сайд нарт хүүхдийн амь үнэгүй байх шалтгаан

Хураангуй

• Ерөнхий сайдаас эхлээд танхимд нь арав гаруй сайд адуутай буюу морь уягчид.
• Танхим дотроос Ж.Энхбаяр, Т.Мөнхсайхан, Б.Жавхлан, Ц.Туваан тэргүүтэй уяач сайд нар, танхимын гаднаас М.Энхболд лобби хийсэн.
• Улстөрчидтэй хамааралтай бизнесийн хүрээнийхнээр дүүрсэн уяачдын холбооныхон өв соёл гэж гоёчилсон үгний ард л нуугджээ.

Дэлгэрэнгүй

Лобби хүчтэй байсан учир шалтгааныг тайлбарлан хүргэх шаардлага үүссэн. Засгийн газарт адуутай гишүүд суудаг, Монголын морин спортын уяачдын холбоонд улстөрчидтэй хамааралтай бизнесийн хүрээнийхэн эзэгнэдэг гэдгийг цааш хөвөрдье.

-НЭГ: Сайд нарын дөрөв нь хурдан удмын, дөрөв нь адуутай-

Засгийн газрын сайд нарын хэд нь ХУРДАН МОРЬТОЙ буюу УЯАЧ вэ гэдгээс эхэлье.

Хурдан удмын адуутай сайд нар,

1. Ерөнхий сайд Л.Оюун-Эрдэнэ 23 адуу, хурдан удмын 5 адуутай,
2. Сангийн сайд Б.Жавхлан хурдан удмын 60 адуутай,
3. Гадаад харилцааны сайд Б.Батцэцэг хурдан удмын ТАВАН адуутай,
4. Аж үйлдвэр, эрдэс баялгийн сайд Ц.Туваан “Алдарт уяач” цолтой, хурдан удмын адуугүй, 518 адуутай гэж мэдүүлжээ.
5. Зам тээврийн сайд Б.Дэлгэрсайхан 2019, 2020 онд 44 саяар үнэлэгдэх хурдан удмын ХОЁР адуутай байжээ.

Адуутай сайд нар,

1. ЗГХЭГ-ын дарга Н.Учрал 20 адуутай,
2. Шадар сайд Т.Доржханд 12 адуутай,
3. Эрчим хүчний сайд Б.Чойжилсүрэн ЗУРГААН адуутай,
4. Хот байгуулалт, барилга орон сууцжуулалтын сайд Ж.Батсуурь 85 адуутай,
5. Батлан хамгаалахын сайд С.Бямбацогт 2019-2021 он хүртэл 21 адуутай байжээ.
6. ЦХИХХ-ийн сайд Ц.Баатархүү 2019 онд 66 адуутай байжээ.

Мөн ХОМ-тээ л мэдүүлээгүй болохоос Эрүүл мэндийн сайд Т.Мөнхсайхан, ХХААХҮ-ийн сайд Ж.Энхбаяр нарыг уяач нар гэх мэдээлэл байдаг.

Чингэхлээр Л.Оюун-Эрдэнийн Засгийн газрын бараг тал нь адуутай байна. Танхим дотроос Ж.Энхбаяр, Т.Мөнхсайхан, Б.Жавхлан, Ц.Туваан тэргүүтэй уяач сайд нар, танхимын гаднаас М.Энхболд лобби хийсэн гэх мэдээлэл дуулдав. Танхимын тэргүүн ч ашиг сонирхлын өндөр зөрчилтэй. Түүний дүү Б.Баярнэмэх нь “Сэцэн ханы хүлэг” уяачдын холбооны дэд тэргүүн, “Алдарт уяач” цолтой нэгэн юм.

Сайд нарын хүрээнээс халиад хурдан морьтой парламентын гишүүдийн жагсаалт гаргавал бүр уртаас урт болно. УИХ-ын гишүүн З.Мэндсайхан, Д.Батбаяр, Ө.Шижир, П.Мөнхтулга, Д.Жаргалсайхан, Г.Тэмүүлэн, О.Амгаланбаатар, Ж.Батжаргал, Ж.Бат-Эрдэнэ, Х.Баттулга, Ц.Идэрбат, М.Бадамсүрэн гэхчлэн хөвөрнө.

-ХОЁР: Уяачдын холбоог улстөрчдийн хамаарлууд, бизнесийн бүлэглэлийнхэн удирддаг-

Лоббигоороо Засгийн газраар шийдвэр гаргуулсан Монголын морин спорт уяачдын холбоо нь сум, аймаг бүрд 100 мянга гаруй салбартай. Тус холбоонд ЯМАР ХҮМҮҮС байдаг вэ, улстөрчдийн холбоо хамаарал бий эсэхийг хүргэе.

Тус холбоо нэг ерөнхийлөгч, зургаан дэд ерөнхийлөгч, нэг ерөнхий нарийн бичгийн дарга, 56 тэргүүлэгч гишүүнтэй.

ММСУХ-ны Ерөнхийлөгч Д.Дагвадорж “Тавантолгой транс” ХХК-ийн Ерөнхий захирал, УИХ-ын гишүүн асан, алдарт “Ажнай” Д.Бат-Эрдэнийн хэтэвчний найз буюу “Нүүрсний” хамтрагчид юм. Эрүүгийн хуулийн тусгай ангийн 17.1 дүгээр зүйлийн 2 дахь хэсгийн 2.3 дахь заалтад зааснаар эрүүгийн хэрэг үүсгэн яллагдагчаар татан мөрдөн шалгах ажиллагаа явуулсан гэгдэж байсан ч, нам гүм байна. 2023 дөрөвдүгээр сард Д.Дагвадоржийн нүүрсний гэх хэрэг хүрээгээ тэлж, Улсын гарди Б.Гончигдамбатай холбогдсон. Улмаар Б.Гончигдамба гардийг шалгаж эхэлсэн бөгөөд АТГ-аас гэрт нь нэгжлэг хүртэл хийж байсан удаатай.

1. ММСУХ-ны Дэд ерөнхийлөгч Ц.Туваан Ерөнхий сайд Л.Оюун-Эрдэнийн Хамтарсан Засгийн газрын Аж үйлдвэр, эрдэс баялгийн сайд. Өөрийгөө 700 гаруй адуутай хэмээн ярьж байсан бөгөөд “Алдарт уяач” цолтой, хурдан морины хорхойтон.
2. ММСУХ-ны Дэд ерөнхийлөгч Х.Бат-Эрдэнэ “Алтай” констракшн” ХХК-ийн Ерөнхий захирал. Хөгжлийн банкнаас зээл авч, түүгээрээ шүүгдэж байсан билээ.
3. ММСУХ-ны Дэд ерөнхийлөгч Ө.Пүрэвбаатар УИХ-ын гишүүн П.Мөнхтулгын аав, АН-ын Дэд дарга С.Баярцогтын худ. Тэрбээр, Сангийн сайдаар ажиллаж байсан. Өдгөө “Хөх чоно групп” ХХК-ийн Ерөнхий захирлын статустай.
4. ММСУХ-ны Дэд ерөнхийлөгч Х.Улам-Өрнөх УИХ-ын гишүүн, Эрүүл мэндийн сайд асан Д.Сарангэрэлийн хүү.  
5. ММСУХ-ны Дэд ерөнхийлөгч С.Гал-Эрдэнэ УИХ-ын гишүүн Х.Баттулгын хуурай дүү гэгддэг. Төмрийн хүдрийн бизнес эрхэлж, БНХАУ-ын иргэдийн хулхидсан хэргээр бичигдэж, гэр бүлийн хүчирхийллийн асуудлаар цагдаагийн байгууллагад шалгагдаж байв.
6. ММСУХ-ны Дэд ерөнхийлөгч Ц.Гончигсүрэн аймгийн алдарт уяач. 2016 онд “Хүрээ цам” даншиг наадамд битүү адуу аман хүзүүдүүлж моринд хорхойссон гэдэг. "Электрагом" ХХК захирал.
7. ММСУХ-ны Ерөнхий нарийн бичгийн дарга Ч.Хишигбаатар

Харин тэргүүлэгч гишүүдэд,

• П.Энхмөнх Тод манлай уяач. УИХ-ын гишүүн “бидон” Д.Ганбатын орон тооны бус зөвлөхөөр ажиллаж байсан. Хүчингийн гэмт хэрэгт нэр холбогдон хоёр жил гадаадад амьдарч байгаад ирсэн түүхтэй.
• Н.Батсүмбэрэл УИХ-ын гишүүн.
• П.Сэргэлэн ХХААХҮ-ийн сайд асан, Кувейт Улсад суугаа Элчин сайд. Түүнийг М.Энхболд уяачдын холбоонд ч, улстөрд ч хөтлөн оруулсан гэгддэг.
• Б.Ганхөлөг УИХ-ын гишүүн асан Г.Батхүү агсны хүү.
• Х.Бадамсүрэн “Эрдэнэт үйлдвэр” ТӨҮГ-ийн Ерөнхий захирал асан. 2021 онд “Манлай уяач” цолоо Х.Баттулгаас гардсан. Түүний төрсөн дүү Х.Дагвадорж ч морь уяач.
• Б.Бадраа Өмнөговь аймгийн ИТХ-ын дарга асан. УИХ-ын гишүүн Р.Сэддоржийг Өмнөговийн Засаг дарга байхад нь "Нүүрсний хэрэг"-т шалгагдаж байсан.
• Д.Гантулга УИХ-ын гишүүн асан, хүчингийн хэрэгт холбогдож бүрэн эрх нь түдгэлзэж байв.
• Э.Анар МАН-ын дарга асан М.Энхболдын хүү.
• П.Батсайхан “АПУ” ХХК-ийн Ерөнхий захирал. 2021 онд нисдэг тэргээр хурдан морины уралдаан дагаж баярхаж байлаа.
• Д.Цэрэнжигмэд “Макс групп” ХХК-ийн Ерөнхий захирал буюу "Макс" Д.Ганбаатарын төрсөн ах.
• Д.Хишигжаргал буюу Дамбын Хишгээ “Моодун хаан групп” ХХК-ийн Ерөнхий захирал. 
• Н.Мөнхдаш “Бурхан халдун групп” ХХК-ийн Ерөнхий захирал, УИХ-ын гишүүн М.Сарнайгийн авга ах.
• Г.Батболд ЭТТ ХК-ийн нүүрс олборлолтыг гүйцэтгэгч “Монгол майнинг энд эксплорэйшн” ХХК-ийн Ерөнхий захирал, УИХ-ын гишүүн Ц.Даваасүрэнгийн хуурай дүү гэгддэг.
• Хожабергены Нурлат ЭТТ ХК-нд ажиллаж байгаад нүүрсний дуулианаар саатуулагдсан. Гаалийн байцаагч З.Сырымбектэй хамтран Казахстанд хаус хороолол барьсан дуулианы эзэн.
• Тордайн Ариунболд “Алтан дорнод Монгол” ХХК-ийн Ерөнхий захирал Тордайн Ганболдын төрсөн ах.
• Д.Хатанбаатар “Монгол наадам цогцолбор” ОНӨТҮГ-ын дарга асан, ИНЕГ-ын Санхүү, хөрөнгө оруулалтын газрын дарга.

Ангилбал, уяачдын холбоогоор дамжуулан улстөрд орогчид, "нүүрс"-ний хэрэгт шалгагдагчид, группийн боссууд, өдгөө албан тушаал хашигчид гэж болохоор байна.

-ГУРАВ: Уяачдын холбооны удирдлагад улстөрийнхөн оролцоотой явж иржээ-

Үүх түүхийг нь сөхье. Монголын морин спорт уяачдын холбоо байгуулагдсан цагаасаа л улстөрчидтэй нэвт холбоо сүлбээтэй явж ирсэн.

• 2001 онд ерөнхийлөгчөөр "Ажнай" Д.Бат-Эрдэнэ, тэргүүн дэд ерөнхийлөгчөөр Г.Батхүү сонгогдож байв.

• 2005 онд хурлыг Ц.Дашзэвэг удирдаж, ерөнхийлөгчөөр "Ажнай" Д.Бат-Эрдэнэ сонгогдож байв.

• 2008 онд хурлыг УИХ-ын гишүүн Су.Батболд удирдаж, ерөнхийлөгчөөр нь Шадар сайд М.Энхболд сонгогдож байв.

• 2019 онд С.Баасанхүү хурал даргалж, Ерөнхийлөгчөөр МУТМУ Ц.Батсайхан сонгогдсон.

• 2024 онд М.Энхболд даргалж, Ерөнхийлөгчөөр Д.Дагвадорж сонгогдсон.

Уяачдын холбооны Ерөнхийлөгчийн сонгуульд үеийн үед улстөрчид оролцож, сонгогдож, удирдаж ирсэн гэсэн үг.

Сэтгүүлчийн тэмдэглэл: Уяачид, хурдан морьтой хүмүүс гэдгийг ерөөсөө л улстөрийнхөн, бизнесийн хүрээнийхэн гэж ойлгоход болохоор байгаа биз. Товчхондоо хүүхдийн эрхийг, амь насыг нь хамгаалах шийдвэрийг тэднээс хүлээх үндэслэл энд огтхон алга. Өөрсдийн зугаа цэнгэл, бохир хүслээ өв соёл гэж гоёчлон ярьж, жавар тачигнасан хүйтэн, хаврын хахирганд хүүхдийн амиар наадах сонирхол цухалзах нь аргагүй юм.

Энэ мэдээнд өгөх таны үнэлгээ

Хуваалцаарай Жиргээрэй