Баримт: Б.Сугарсүрэн мэлзсэн ч түүнээс дөрвөн төрлийн хориотой бодис илэрчээ

2024 оны долоодугаар сарын 5-8-ны өдөр бодибилдингийн Азийн аварга шалгаруулах тэмцээнд болсон. Тэмцээнд оролцсон таван монгол тамирчнаас допинг илрээд байгаа юм. Энэ талаар Монголын бодибилдингийн холбоо мэдээлэхдээ М.Пүрэвсүрэнгийн нэрийг нууж, дөрвөн хүнийг л зарласан.

Нөгөө талаас нэр нь зарлагдсан тамирчин Б.Сугарсүрэн өчигдөр хэвлэлийн бага хурал хийж, "Надаар туг тахиж, допингтой гэх яриа гаргалаа" мэтээр хэлсэн юм.

Тэрбээр цаашлаад "Холбооны ерөнхийлөгч Ш.Амарсайхан оруулахгүй гэж байсан тамирчин нь Дэлхийн аварга болонгуут өөрийнхөө нэрийг цэвэрлэхийн тулд надаар туг тахисан. Би өнөөдөр эх орныхоо нэрийг гаргах гэж шударга явсны төлөө ийм хэл аманд орлоо. Өчигдөр орой над руу хүмүүсээр яриулсан. Тохиролцох гээд байх шиг байгаа юм. Гэтэл сайтуудаар намайг допинг хэрэглэсэн гэж мэдээлэл цацчихаад, одоо юугаа тохиролцдог юм" зэргээр ярьжээ.

Үүнээс харахад Б.Сугарсүрэн өөрийгөө допинг хэрэглээгүй гэж хэлээд байх шиг. Үнэн хэрэгтээ түүний шинжилгээний хариу баримтаар бидэнд олдлоо.

IFBB буюу Олон улсын фитнесс, бодибилдингийн холбооны Батбуянгийн Сугарсүрэнд нэгдүгээр сарын 10-ны өдөр хаягласан тус бичигт,

• Станозолол метаболин
• Кленбутерол метаболин
• Болденон метаболин
• Торасемид зэрэг дөрвөн допинг илэрсэн талаар бичсэн байна.

Түүнчлэн А, Б сорьцыг долдугаар сарын 7-ны өдөр авч, хэрхэн дугаарлаж хадгалсан зэрэг процессыг ч дэлгэрэнгүй дурджээ.

Ингэхээр Б.Сугарсүрэн өөрөө мэлзэж, холбоо нь ч нэг тамирчныг зарлалгүй нууж буй мэтийн үйлд явдлаас тамирчин хүний шударга бөгөөд ёс зүйт хандлага харагдахгүй байна.

Г.САНСАРМАА

Энэ мэдээнд өгөх таны үнэлгээ

Хуваалцаарай Жиргээрэй