Шилэн данс: Нэг бүсийн зөвлөгөөнийг ₮116 саяар хийж, төсвийн мөнгөөр “туйлж” байна

Бүсийн зөвлөлийн хуралдааныг бүс бүрд зохион байгуулах Засгийн газрын шийдвэр гарсан. Энэ хүрээнд "Хангайн бүсийн зөвлөл" Архангай аймагт дөрөвдүгээр сарын 14-нд хуралдсан. Үүний дараа дөрөвдүгээр сарын 28-нд Булган аймагт "Хойд бүсийн зөвлөл" хуралдав. Харин өчигдөр /2025.05.12/ "Говийн зөвлөлийн хуралдаан"-ыг Дорноговь аймагт зохион байгууллаа.

Эдгээр хуралдаанд Монгол Улсын Ерөнхий сайд, УИХ-ын гишүүд, Засгийн газрын гишүүд, төрийн захиргааны байгууллагууд оролцож буй.

Анзаарвал маш том бүтэц, өргөн бүрэлдэхүүн тухайн бүс нутагт очиж, тулгамдаж байгаа асуудлуудыг хэлэлцэж байна. Нөгөө талд эдгээр хуралдааныг зохион байгуулахад зарцуулж буй төсөв анхаарал татна.

Шилэн дансны мэдээллээс харвал Булган аймагт зохион байгуулсан "Хойд бүсийн зөвлөлийн хурал"-д л гэхэд 116 сая 935 мянга 100 төгрөг зарцуулжээ.

Тодруулбал, А/261 дүгээр захирамжид үндэслэн

• 10,000,000 төгрөг
• 14,619,400 төгрөг
• 13,208,800 төгрөг
• 7,383,100 төгрөг
• 5,600,000 төгрөг
• 10,312,000 төгрөг
• 7,500,000 төгрөг
• 6,000,000 төгрөг
• 8,619,000 төгрөг
• 7,400,000 төгрөг
• 15,792,000 төгрөг
• 10,500,000 төгрөг зарцуулсан тухай мэдээлэл Булган аймгийн ЗДТГ-ын шилэн дансны тайланд тусгагдсан байна. Өөрөөр хэлбэл тухайн аймгийн төсвөөс энэ зөвлөгөөний зардал гарсан гэсэн үг.

Харин Архангай болон Дорноговь аймаг эл мэдээллээ тайлагналгүй нууцалжээ. Гэсэн ч дээр дурдсан хэмжээний зардал гарсан болов уу.

Одоо зөвлөлийн хуралдаан зохион байгуулаагүй хоёр бүс үлдсэн. Ингээд нийт дүнгээр нь тооцвол хагас тэрбум төгрөгийн зардал харагдаж байна. Үүнийг үргүй зардал гээд хэлчхэж болно. Учир нь цаасан дээрээ шарласан, хэрэгжээгүй, гараанаас ч гараагүй олон төсөл хөтөлбөрийг бид мэднэ. Эхлэл нь яг л ийм дүр зургаар явдаг. Тэгээд замхардаг.

Хагас тэрбум төгрөгөөр юу хийж болох вэ. Эсвэл зуу гаруй сая төгрөгөөр нэг аймаг юу хийж болох вэ. Мэдээж хурал зөвлөгөөн нэгдүгээр асуудал биш. Бүр 1001 дүгээр асуудал. Гэтэл Засгийн газар нь бүрэн бүрэлдэхүүнээрээ, тойргийнх нь гишүүдийг, төрийн байгууллагын төлөөллүүдтэй нь авч очоод нэг бүсийн зөвлөгөөнийг л гэхэд 116 сая төгрөгөөр хийж, төсвийн мөнгөөр “туйлж” байна.

Энэ мэдээнд өгөх таны үнэлгээ

Хуваалцаарай Жиргээрэй