Монгол Улсын иргэн биедээ 6.2 сая рубль буюу 280 орчим сая төгрөг нууж Оросын хилээр гарахыг завджээ

54 настай Монгол Улсын иргэн нийт 6.2 сая рубль буюу 300 гаруй сая төгрөгийг нууж гаалийн хяналтаар нэвтрүүлэхийг завдсан байна. Монгол Улсын иргэн ОХУ-ын Красноярск хотын Хандгайт боомтоор хил нэвтрэхдээ гаалийн хяналтынхны шалгалтын үед сандарч байсан нь сэжиг төрүүлсэн бөгөөд ямар нэгэн бараа, мөнгөн хөрөнгө авч яваагүй хэмээн гаалийн мэдүүлэгт мэдүүлсэн талаар тус улсын дотоодын хэвлэлүүдэд мэдээлжээ.

Үзлэг, шалгалтын үеэр Монголын иргэн багцтай мөнгүүдийг нуруундаа хувцасныхаа дотуур, хар уутанд хийж нуусан байжээ. Оросын гаалийн дүрмийн дагуу 10 мянган ам.доллароос давсан хэмжээний бэлэн мөнгийг хилээр нэвтрүүлэхдээ заавал мэдүүлэх ёстой бөгөөд гаалийн мэдүүлгэд худал бөглөж, нууж бэлэн мөнгө оруулахыг завдсан нь хууль бус үйлдэл гэсэн байна.

6.2 сая орчим рублийг бэлнээр уутлан хууль бусаар нэвтрүүлэхийг завдсан нь ОХУ-ын Эрүүгийн хуулийн 200.1.2-т заасны дагуу “Онц их хэмжээний бэлэн мөнгө хууль бусаар нил нэвтрүүлсэн” гэх заалтын дагуу эрүүгийн ял шийтгэгдэх үндэслэл болох юм. Уг заалтад үндэслэн хууль бусаар нэвтрүүлсэн мөнгийг 10-15 дахин нэмэгдүүлсэн хэмжээний торгууль эсвэл 4 хүртэлх жилээр хорих ял шийтгэдэг бөгөөд бэлэн мөнгийг шүүхийн шийдвэр гарах хүртэл хураан авсан байна.

Өмнө нь Монгол Улсын 38 настай иргэн Хиагтын автозамын боомтоор 3.4 сая рубль бэлнээр нэвтрүүлэхийг завдаж байгаад баригдсан бөгөөд мөн л гаалийн мэдүүлэгтээ худал мэдүүлж дээрх Эрүүгийн хуулийн заалтаар торгуулийн ял шийтгэгдсэн байсан удаатай юм.

Эх сурвалж: Life.ru

Т.БАТСҮРЭН

Энэ мэдээнд өгөх таны үнэлгээ

Хуваалцаарай Жиргээрэй