₮65 тэрбумын өртөгтэй тендерт өрсөлдөгчгүй шалгарсан "Билгүүнмонгол констракшн" ХХК хэнийх вэ

Чингэлтэй дүүргийн худалдан авах ажиллагааны албанаас 65 тэрбум төгрөгөөр тус дүүргийн нутгийн захиргааны байрны барилгыг бариулах тухай тендер зарласан байдаг.

Тодруулбал, Чингэлтэй дүүргийн нутаг дэвсгэрт 4.8 га талбай газарт хоёр давхар зоорьтой, есөн давхар бетон суурьтай барилгыг барих юм байна. Ингэхдээ гурван блокоос бүрдэнэ гэж заажээ. Нийт өртөг болох 65 тэрбум төгрөгийг Орон нутгийн төсвийн хөрөнгө оруулалтаас гаргах бөгөөд энэ онд санхүүжүүлэх өртөг нь 19.7 тэрбум байхаар төлөвлөсөн байна.

Улмаар дээрх тендерийн сонгон шалгаруулалтад "Билгүүнмонгол констракшн" ХХК ганцаар оролцож тендерт 64.8 тэрбум төгрөгийн үнийн санал ирүүлэн шалгарсан байна.

Чингэлтэй дүүргийн ИТХ-аар 2021 оны 12 сарын 17-ны тогтоолоор, Нийслэлийн Засаг даргын 2022 оны хоёр сарын 22-ны өдрийн захирамжаар, Барилга хот байгуулалтын сайдын 2022 оны 37 дугаар тушаалаар батлагдсан томоохон төслүүдийн нэг атал яагаад ганцхан компани оролцох болов, ганц оролцсон компанийг яагаад эргэлзээгүйгээр шалгаруулсан гэдэг нь анхаарал татав.

Иймд "Билгүүнмонгол констракшн" ХХК-ийн мэдээллийг нягталж үзье.

• /2012-06-07/-нд үүсгэн байгуулагдсан
• Ашгийн төлөө
• Барилгын материалын худалдаа, Гэр ахуйн цахилгаан барааны худалдаа, Гадаад худалдаа, Аялал жуулчлал, Барилгын засвар засал чимэглэл гэх таван төрлийн үйл ажиллагааны чиглэлтэй
• Х.Дунгармаа үүсгэн байгуулсан бөгөөд Л.Анхбаатар хамтран эзэмшдэг байна.

2025 оны эхний таван сарын байдлаар дөрвөн тендерт оролцож гуравт нь шалгарчээ. Тухайлбал, Чингэлтэй дүүргийн захиргааны барилгаас гадна Сүхбаатар дүүрэгт 18.7 тэрбум төгрөгийн өртөгтэй 13-р хороо, Дүүргийн нутаг дэвсгэрт цэцэрлэгт хүрээлэн, спорт цогцолборын барилга барих, 9.7 тэрбум төгрөгөөр Дүүргийн нутаг дэвсгэрт цэцэрлэгт хүрээлэн, спорт цогцолборын гадна цахилгаан дулаан механик гадна тохижилт, гадна гэрэлтүүлэг дэд өртөө барих тендерт шалгараад байна. Эл гурван тендерийн нийт өртөг нь 93.4 тэрбум төгрөг гэсэн үг.

Хачирхалтай нь одоогоор шалгараад байгаа энэ гурван тендерт ямар ч өрсөлдөгчгүйгээр дангаараа оролцоод шалгарчхаж.

Харин 2024 онд нийт найман тендерт оролцож үнийн саналаа илгээснээс гуравт нь шалгарсан. Нийт үнийн дүн нь 26.6 тэрбум төгрөг. Тухайлбал,

• 19.5 тэрбумын өртгөөр “Сэлбэ сэргэлт” төслийн Сэлбэ-Дунд голын үерийн хамгаалалтын барилга байгууламжийн угсралт (БЗД, 43 дугаар хороо, СБД, 1-р хороо, I ээлж ПК18+00-ПК25+33)
• 1.7 тэрбумын үнийн дүнтэй Нийслэлийн хөрөнгө оруулалтын газраас зарласан Цэцэрлэгийн барилгын дуусгал, 240 ор (Улаанбаатар хот, Хан-Уул дүүрэг, 16 дугаар хороо)
• 5.4 тэрбумын өртөгтэй Нийслэлийн хөрөнгө оруулалтын газраас зарласан Сургуулийн барилгын дуусгал, 640 суудал (Улаанбаатар хот, Хан-Уул дүүрэг, 16 дугаар хороо) тендерт шалгарсан байна.

Тендерт хэрхэн шалгарсан мэдээллийг нягталж үзэхэд мөн л дангаар оролцож, шалгарсан байна.

Эргэн сануулахад өнгө үзэмжгүй хэмээн нэрлэгдээд буй Сэлбэ голын дэргэдэх ханыг эл компани барьж буй. Өнгөрөгч оны зургадугаар сарын 20-ноос Сэлбэ голын голдирлыг өөрчлөн барьсан “S’Outlet” дэлгүүрийн буулгасан талбай орчимд нийт 1.5 км урт, 4.1-6.1 метр өндөр, төмөр бетонон хийцтэй үерийн түшиц хана барих ажлыг эхлүүлсэн байдаг. Өнөөдрийн байдлаар нэг км түшиц ханыг хийсэн бөгөөд үлдсэн ажлыг ирэх зургадугаар сарын 30-нд дуусгах төлөвлөлттэй байгаа хэмээн мэдээлсэн. "Уг түшиц ханын өндрийг 100 жилд болох үерийн түвшнээр тогтоосон. Өөрөөр хэлбэл, 1966 онд болсон үертэй дүйцэхүйц буюу 100 жилд нэг удаа тохиолдох үерээс сэргийлэхийн тулд уг түшиц ханын өндрийг тогтоосон" гэж ам гараад буй.

Уг компани 2023 онд ганцхан тендерт үнийн санал илгээж шалгарсан байна. Тодруулбал, Сүхбаатар дүүргийн захирагчийн ажлын албанаас зарласан 9 тэрбум төгрөгийн өртөгтэй Дүүргийн 13 дугаар хороонд цэцэрлэгт хүрээлэн спорт цогцолбор барих тендерт шалгарчээ.

Харин 2022 онд зургаан тендерт үнийн санал илгээж хоёрт нь шалгарсан байна. Тухайлбал Нийслэлийн худалдан авах ажиллагааны газраас зарласан 10 тэрбумын үнийн дүнтэй Сургуулийн барилга, 640 суудал /Улаанбаатар хот, Хан-Уул дүүрэг, 16 дугаар хороо/, 4.5 тэрбум төгрөгийн өртөг бүхий Цэцэрлэгийн барилга, 240 ор /Улаанбаатар хот, Хан-Уул дүүрэг, 16 дугаар хороо тендерт тус тус шалгарчээ. Нийт үнийн дүн нь 14.5 тэрбум төгрөг гэсэн үг.

Сүүлийн гурван жилийн дотор Улсын төсвөөс болоод Орон нутгийн хөрөнгө оруулалтаас санхүүжүүлсэн 1.4 их наяд төгрөгийн ажил гүйцэтгэсэн болж таарлаа.

Үүнээс гадна 47 тэрбум төгрөгийн өртгөөр Чингис хаан музейн барилгын ажлыг уг компани гүйцэтгэсэн байна. Тодруулбал, 2020 оны дөрөвдүгээр сарын 02-нд музейн барилга угсралтын тендерт шалгарч 2021 оны есдүгээр сард хүлээлгэн өгсөн байдаг.

Сэтгүүлчийн тэмдэглэл: Нээлттэй мэдээллээс нягталж үзэхэд удирдах албан тушаалтан, эзэмшил дээр Х.Дунгармаа, Л.Анхбаяр гэх хүмүүсийн нэр бүртгэлтэй хэдий ч бусад мэдээлэл болох зураг, намтар гэх мэт нь тодорхой бус байв. Нийслэлд зарлагдсан өндөр өртөгтэй тендерт ямар ч өрсөлдөгчгүйгээр орж шалгардаг эл компанийн ард яг хэн байна вэ?

Энэ мэдээнд өгөх таны үнэлгээ

Хуваалцаарай Жиргээрэй