Гэр бүлийн маргааны улмаас нэг иргэн өндрөөс унаж амиа алджээ

Өчигдөр буюу /2025-06-09/-нд Баянгол дүүргийн 26 дугаар хороо, Нарны хорооллын … тоот байрнаас эмэгтэй хүн унаж амиа алдсан байна.

Эл хэрэг тухайн 08-09-нийг шилжих шөнө гарсан бөгөөд “Өндрөөс хүн уначихлаа” гэх дуудлага Цагдаагийн байгууллагад 00.00 цагийн орчимд ирсэн байна. Уг дуудлагын дагуу цагдаагийн албан хаагчид ирж шалгахад амиа алдсан нөхцөл байдал тогтоогджээ.

Урьдчилсан байдлаар амь хохирогч эмэгтэйг амиа хорлосон байж болзошгүй хэмээн үзэж буй аж. Хэргийн мөрдөн шалгах ажиллагаа Баянгол дүүргийн цагдаагийн газарт үргэлжилж байна. Эх сурвалжуудын мэдээлж буйгаар гэр бүлийн таарамжгүй харилцааны улмаас эмэгтэй амь насаа хохироосон байж болзошгүй хэмээсэн юм.

Дэлхийн эрүүл мэндийн байгууллагын (ДЭМБ) 2023 оны тайланд дурдсанаар дэлхий даяар жил бүр 700,000 орчим хүн амиа хорлож, энэ нь 15–29 насны залуусын нас баралтын хоёр дахь гол шалтгаан болж байна. Харин Монгол Улсад 100,000 хүн тутамд дунджаар 17–20 хүн амиа хорлож байгаа нь дэлхийн дунджаас өндөр үзүүлэлт юм.

Мөн 2022 оны Хүний эрхийн үндэсний комиссын тайланд дурдсанаар, өсвөр насныхны амиа хорлолт нэмэгдэх хандлагатай болсон бөгөөд сургуулийн орчин, гэр бүлийн дарамт, хүчирхийлэл нөлөөлж байгааг онцолсон байна.

Монгол Улсын хэмжээнд 2025 оны эхний дөрвөн сарын байдлаар 73 хүн амиа хорлосон байна. Тодруулбал, Нэгдүгээр сард 17, Хоёрдугаар сард 18, Гуравдугаар сард 15, Дөрөвдүгээр сард 23 хүн амиа хорлосон гэх тоон мэдээллийг ҮСХ-ны судалгаанаас харж болохоор байгаа юм.

О.ОНОН

Энэ мэдээнд өгөх таны үнэлгээ

Хуваалцаарай Жиргээрэй