Өчигдрийн /2025.06.20/ Засгийн газрын хуралдаанаар нэг хачирхалтай шийдвэр гарав. ЗГХЭГ-ын дарга С.Бямбацогт "Ордуудтай хэлцэл хийхээр байгуулагдсан Ж.Батзандан, Н.Учрал нарын ажлын хэсгийг нэгтгэж ЗГХЭГ-ын дэд даргаар ахлуулсан ажлын хэсэг байгуулахаар боллоо" гэж мэдэгдсэн юм.
Өөрөөр хэлбэл хоёрыг нийлүүлээд нэгийг байгуулж байгаа гэж ойлгогдож байна. Тийм ч биз. Гэхдээ Засгийн газар ажлын хэсгийг ажлын хэсэгтэй биш ажлын хэсгийг дэд хэсэгтэй нь нийлүүлж байгаа нь санаатай шийдвэр үү, санамсаргүй хэрэг үү.
Тодруулбал, ЗГ-ын БЭТ Ж.Батзандангийн ахалдаг ажлын хэсэг нь стратегийн ордуудтай хэлцэл хийх үүрэг бүхий Н.Учралын ахалж байсан ажлын хэсгийн доор харъяалагддаг дэд ажлын хэсэг юм. Тэднийг нэгтгээд зогсохгүй тэдний ажлыг шалгах ажлын хэсэг байгууллаа гэж ойлгогдохоор.
ЗГ-ын албан мэдээнд, "Стратегийн ач холбогдол бүхий ашигт малтмалын ордын тусгай зөвшөөрөл эзэмшигчтэй хэлэлцээ хийх талаар гарсан хууль тогтоомж, Засгийн газрын шийдвэрийн биелэлтийг шалгаж, дүгнэлт гаргах ажлын хэсэг байгууллаа" гэсэн байгаа юм.
Шинэ ЗГ нь Ж.Батзандан, Н.Учрал нарыг стратегийн ордуудтай хэлэлцээ хийгээд дуусчихсан гэж үзсэн үү. Эсвэл хэлэлцээ хийх ажлыг нь шинээр нэгтгэгдсэн ажлын хэсэг нь үргэлжлүүлэн хийх үү.
Ямартай ч энэ хоёрыг нэгтгэхдээ ЗГХЭГ-ын шинэ дарга С.Бямбацогтоор ахлуулсангүй. ЗГХЭГ-ын тэргүүн дэд дарга Д.Мөнх-Эрдэнэд ч өгсөнгүй. Бүр ЗГХЭГ-ын дэд дарга Б.Батцэцэгээр ахлуулж буй нь ч хачирхалтай. С.Бямбацогтыгоо чадваргүй гэж үзсэн үү, өнөөх нь стратегийн ордуудын хувийг авч ирэх ажлаас татгалзсан уу гэдэг асуулт байна.
Стартегийн ордуудтай хэлцэл хийх ажлын хэсэг чинь холион бантан болчихлоо, ямар ч байсан. Нэгтгэмээр байсан юм бол өчнөөн ажлын хэсэг манайд бий.
- "Ухаа худаг"-ийн асуудлыг шийдэх ажлын хэсгийг О.Алтангэрэл,
- "Онтрэ"-гийн хэлэлцээрийн ажлын хэсгийг О.Батнайрамдал, Ц.Туваан, О.Алтангэрэл гэсэн хүмүүс,
- Стратегийн ордуудын эзэмшигчидтэй хэлэлцээ хийх ажлын хэсгийг Н.Учрал,
- Стратегийн ангилалд нэмж бүртгэх 39 ордын асуудлыг У.Туваан,
- Оюу толгой, Тавантолгой, Цагаан суварга, Асгатын ордуудын төрийн эзэмшлийн хувь хэмжээг тогтоох ажлын хэсгийг П.Мөнхтулга гэхчлэн...
Өмнөх Засгийн газрын "тавдугаар сарын 1" гэсэн огноо тавьж, хувийн хэвшлүүдтэй бүрэн хэлэлцээрт орж дуусгахыг зорьж байсан билээ. Энэ огноо бүр замхарсан. Өдгөө өчнөөн ажлын хэсэг л үлдэж. Ажлын хэсгүүдийн дарга нар, бүрэлдэхүүний 50 хувь нь солигдоно. Хийж байсан ажлуудыг нь шалгах, цаашаа үргэлжлүүлэх өчнөөн ажил овоорчихлоо.
Ажлын хэсгүүдээс хамгийн дуулиантай нь О.Алтангэрэл, Ж.Батзандан нарынх байв. О.Алтангэрэл "Ухаа худаг"-ийн асуудлыг УИХ-аар хэлэлцүүлэхээр шилжүүлж чадсан. Харин Ж.Батзандан дөрвөн сар гаруй ажиллахдаа 16 стратегийн орд эзэмшигчдийн ихэнхтэй нь уулзаж амжсан. Л.Оюун-Эрдэнэ Ж.Батзанданг зүгээр ч нэг томилчхоогүй. Хүнд хүчир ажлыг зөөлөн хүн хийгээд, барахгүй. Хувь улстөрчийн характер боловсон гэхээсээ дайрангуй, давшлангуй дүрийг стратегийн орд эзэмшиж, баялаг ашиглагчдын өөдөөс тавьсан нь тодорхой. "Олон судалгааны ард гарч, өчнөөн маапаантай асуудлыг ухаад гаргаж ирж байна" гэдгээ хэлж байв. Ихээхэн улс төрийн ойлголцол шаардах энэ ажил хөшигний ард хэрхэн хөвөрч байсныг гарч ирээд ярих шаардлагатай.
АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.