Тойм: Т.Доржханд шантааж хийж, Евразийн хэлэлцээр зурагдаж, төсвийн тодотголынхоо эцсийн хэлэлцүүлэг хийв

Өнгөрч буй долоо хоногт улстөрийн тогоонд өрнөсөн үйл явдлыг тоймлон хүргэж байна.

14 мега төсөл 4 болов: Засгийн газраас зарласан 14 мега төслүүдийг бүгдийг нь хэрэгжүүлэх боломжгүй гэдгээ зарлалаа. Эхлээд дөрвийг нь үргэлжлүүлж, тавд нь хөрөнгө оруулалт хайж, таван төслийг хойшлуулахаар болов. Чингээд өмнөх Хамтарсан Засгийн газрын том зорилтууд унаж байна. Мөн Нийслэл Улаанбаатар хотод хэрэгжүүлэх 24 төслийн заримыг нь хойшлуулах нөхцөл байдал үүссэн.

Евразийн түр хэлэлцээр: 3х3 сагсан бөмбөгийн дэлхийн аварга, төсвийн тодотгол зэрэг нийгмийн томоохон асуудлуудын дуулианы хажуугаар энэ хэлэлцээрт гарын үсэг зурав. Одоо Хэлэлцээрийг Монгол Улсын Их Хуралд өргөн мэдүүлж, соёрхон батлуулна. ЕАЭЗХ-ны гишүүн 5 улсад мах, арьс шир, ноос ноолууран бүтээгдэхүүний 15 тэрбум доллар буюу 47,5 их наяд төгрөгийн зах зээл бий гэж үзэж буй. Монголын үйлдвэрлэгчид, бизнес эрхлэгчдэд 200 сая гаруй хүн амтай, ЕАЭЗХ-ны гишүүн орон болох ОХУ, Беларусь, Казахстан, Киргиз, Армени улсуудад гаалийн татваргүй 367 төрлийн бараа бараа бүтээгдэхүүн экспортлох аж. Тухайлбал, дизель түлш, керосин, мазут, тослох материалын гаалийн 5 хувийн албан татварыг тэглэж, түлшний үнэ гэхэд литр тутамд 147 төгрөгөөр буурсан гэв. 

Төсөв: Г.Занданшатарын Засгийн газрын хамгийн түрүүнд амжуулах ажил бол төсвийн тодотгол. Тулгамдсан асуудлынхаа ард ирэх долоо хоногт гарч, эцэслэн батална. Өчигдөр эцэслэн батлуулахаар байнгын хороо руу шилжүүлсэн юм.

Нүүрсний үнэ буурсантай холбоотойгоор төсвийн орлого 39 хувиар буурсан. Иймд “Хэмнэлтийн тодотгол”-оор төсвийн зардлыг 1 их наяд 508.4 тэрбум төгрөгөөр бууруулахаар тооцоолсон. “Төсвийн хэмнэлтэд тооцох тухай” тогтоолд туссан 535.9 тэрбум төгрөгийг нэмж тооцвол нийт 2 их наяд 44.2 тэрбум төгрөгөөр зарлага буурахаар байна. 2025 оны төсөвт тодотгол хийснээр нэгдсэн төсвийн тэнцвэржүүлсэн орлогыг 3 их наяд 260 тэрбум төгрөгөөр бууруулж, 30 их наяд 209.9 тэрбум төгрөг, нэгдсэн төсвийн нийт зарлагын хэмжээг 1 их наяд 856.5 тэрбум төгрөгөөр бууруулж, 31 их наяд 575.1 тэрбум төгрөгт хүргэж, нэгдсэн төсвийн тэнцвэржүүлсэн тэнцэл 1 их наяд 365.2 тэрбум төгрөг буюу дотоодын нийт бүтээгдэхүүний 1.5 хувийн алдагдалтай болно

Т.Доржхандын шантааж: МАН доторх хагарал энэ долоо хоногт үргэлжлэв. Эцэстээ ХҮН намын дарга Т.Доржхандын улаан, цагаан шантааж болон хувирлаа. Тэрбээр, "П.Наранбаярыг сайдаас буулгавал, Засгийн газраас гарна" гээд хэлчихсэн. Энэ бол ил цагаан шантааж юм. Нэг сайдын шалгагдаж асуудлыг хаацайлж, Засгийн газрын суудлаар барцаалж болохгүй. Нэг талаас, П.Наранбаярын хийсэн үйлдэл АТГ-т шалгагдахаас өөр аргагүй сэдэв мөн шүү дээ. 120 сургуулиас нийт 1.2 тэрбум төгрөгийн хамаарал бүхий ТББ руугаа татна том асуудал. Энэ дагуу шалгагдаж байгаа гэсэн. Нөгөө талаас, П.Наранбаярыг буулгах сонирхлын бүлэг улайрлаа үргэлжлүүлсээр байв. Боловсролын сайдад хэд амбицалж байгаа нь нууц хэвээр.

У.УЯН

Энэ мэдээнд өгөх таны үнэлгээ

Хуваалцаарай Жиргээрэй