Допинг: Улсын биш Ховд, Хөвсгөл, Говьсүмбэрийн наадамд түрүүлж, үзүүрлэж, шөвгөрсөн ДӨРВӨН БӨХӨӨС ИЛЭРЧЭЭ

Үндэсний их баяр наадмын хүчит бөхийн барилдаанд зодоглосон 32 бөхөөс допингийн шинжилгээ авсан.

Шинжилгээний хариу ирсэн ч тодорхой тооны сэжигтэй тохиолдол илэрч, тэдгээрийг магадлан шинжлэх үйл ажиллагаа явагдсан юм.

Тэгвэл, магадлан шинжилгээний хариу бүрэн иржээ.

Ингэснээр:

• Хөвсгөл аймгийн Тосонцэнгэл сумын харьяат, аймгийн заан Э.Мөнхтөр
• Хөвсгөл аймгийн Галт сумын харьяат, аймгийн начин Б.Сүх-Эрдэнэ нарын шинжилгээнд допинг илэрсэн байна.

Тэд Хөвсгөл аймгийн баяр наадамд зодоглосон. Э.Мөнхтөр үзүүрлэж, Б.Сүх-Эрдэнэ шөвгөрсөн юм.

Түүнчлэн,

• Говьсүмбэр аймгийн Сүмбэр сумын харьяат, аймгийн начин О.Амгаланбямба
• Ховд аймгийн Чандмань сумын харьяат, аймгийн арслан Б.Базарсад нараас илэрчээ.

О.Амгаланбямбын хувьд Говьсүмбэр аймгийн наадамдаа шөвгөрсөн. Харин Б.Базарсад Ховд аймгийн наадамдаа долоо даван түрүүлжээ.

Үндэсний их баяр наадмын тухай хуульд өөрчлөлт орсноор, допингийн шинжилгээг улсын наадмаас гадна орон нутгийн наадамд шөвгөрсөн бөхчүүдээс авч байхаар болсон. Энэ хүрээнд аймгуудын наадмын шөвгийн дөрөвт үлдсэн бөхчүүд шинжилгээнд хамрагдсан.

Иймд, энэ жил улсын наадамд 5-9-ийн даваанд зодоглосон аль ч бөх допинг хэрэглээгүй байна.

Харин Хөвсгөл, Говьсүмбэр, Ховд аймгийн наадамд допингтой бөхчүүд зодогложээ.

Г.САНСАРМАА

Энэ мэдээнд өгөх таны үнэлгээ

Хуваалцаарай Жиргээрэй