Хүүхэд хулгайлах оролдлого хийсэн этгээд өмнө нь ч хүүхдүүдийг сүрдүүлж байсан гэв

Дархан-Уул аймгийн Дархан суманд бага насны хүүхдийг хүчээр авч явах оролдсон хэрэг гарсан талаар цагдаагийн байгууллагаас өчигдөр мэдээлсэн.

Тодруулбал, 2025 оны долоодугаар сарын 25-ны өдөр 12:30 цагийн орчимд Дархан сумын 9 дүгээр багийн нутагт орших орон сууцны байрны гадна 30 орчим насны эрэгтэй хүн 4-5 настай эмэгтэй хүүхдийг гараас нь хөтөлж, авч явах гэж оролдсон тухай дуудлага цагдаагийн байгууллагад ирсэн байна.

Дуудлагын дагуу цагдаагийн байгууллагаас шуурхай шалгалт явуулж, тухайн этгээдийг олж тогтоох чиглэлээр хойшлуулашгүй ажиллагаа эхлүүлсэн. Хэрэг гарсан газар орчмын хяналтын камер, гэрчүүдийн мэдүүлэг болон бусад баримтуудыг үндэслэн сэжигтэн этгээдийг богино хугацаанд эрэн сурвалжилж, олж тогтоожээ.

Мөн албаны бус эх сурвалжийн мэдээлж буйгаар сэжигтэн этгээд нь өмнө нь хэд хэдэн удаа бага насны охидыг өөрийн амьдардаг байрны подвол руу дагуулж орохыг завдаж,мөн гадаа тоглож буй хүүхдүүд рүү хутга барин дайрч, айлган сүрдүүлж байсан аж.

Одоогоор тухайн этгээд нь хүүхдийг хууль бусаар авч явах оролдлого хийсэн нь нотлогдож байгаа бөгөөд хэргийн талаар Эрүүгийн хэрэг хянан шийдвэрлэх тухай хуулийн 16.2 дугаар зүйлд заасан нөхцөл байдлыг бүрэн шалгаж, нотлох баримтыг цуглуулж эхлээд байна.

Хэрэгт холбогдуулан дараах зүйл, ангиудаар шалгаж байна:

• Монгол Улсын Эрүүгийн хуулийн 12.3 дугаар зүйл – “Хүнийг хууль бусаар эрх чөлөөнд нь халдах”
• Монгол Улсын Эрүүгийн хуулийн 12.5 дугаар зүйл – “Хүүхдийг хууль бусаар авч явах, нуух”

Энэ мэдээнд өгөх таны үнэлгээ

Хуваалцаарай Жиргээрэй