Б.Амарсайхан гадагш зугтаан 40 хонох зуур Ц.Санжаачойпэл батлан даалтаар 2 удаа гарахыг оролдож, хэрэг царцанги байдалд шилжжээ

Таванбогд группийн үүсгэн байгуулагч Ц.Баатарсайханы хүү Амарсайхан бусдын биед халдаж, хүндээр гэмтээгээд эх орноосоо гарч |2025.07.20| яваад, даруй 40 хонож байна.

Тэдэнтэй хамт танхайрч, бусдын биед хохирол учруулсан УИХ-ын гишүүн асан Цэрэнпунцагийн хүү Санжаачойпэл, “Эрэл”-ийн Эрдэнэбатын хүү Тэмүүлэн, Лувсандоржийн Алтан-Очир нарыг саатуулан шалгаж буй юм. Урьдчилсан байдлаар тэднээс сэтгэцэд нөлөөлөх эм бэлдмэл хэрэглэсэн нь тогтоогдсон. Харин "Говь" ХК-ийн Гүйцэтгэх захирал С.Амарсайхан гадагш гарч зугтсан тул энэ төрлийн шинжилгээ авагдаагүй юм.

-Б.Амарсайхан хил давж зугтсан нь мөрдөн шалгах ажиллагаа удаашрах гол шалтгаан болжээ-

Бүлэг танхайн хэргийн оролцогч, прокуророос яллагдагчаар татсан Б.Амарсайханы гадаад паспортыг ХЗДХ-ийн сайд хүчингүй болгуулах шийдвэр гаргасан. Өдгөө ЦЕГ-ын Интерполын улаан булангаар эрэн сурвалжлах хүсэлтийг илгээсэн байдаг.

Интерполын улаан булан нь яллагдагч этгээдийг хорих, шүүхэд шилжүүлэхээр эрэн сурвалжилдаг. Ингэснээр паспорт нь хүчингүй болсны дээр улаан булангаар эрэн сурвалжлуулсан тохиолдолд аль ч улсын хилээр түүнийг нэвтэрсэн албадан буцаагдах юм.

Гэтэл одоог хүртэл баригдахгүйгээр яваа нь тэр өөр Улсын иргэншилтэй, тэр паспортоо ашиглан өөр орнууд руу дамжин явж байх магадлалтай болчхоод байна.

Түүнийг Монголд ирж, хэрэгт холбогдох байцаалт, шинжилгээ зэргийг өгвөл энэ хэргийн мөрдөн байцаалт дуусаж прокурор руу шилжих учиртай. Эсхүл Ц.Санжаачойпэл, Э.Тэмүүлэн, Л.Алтан-Очир нар гэмт буруугаа хүлээсэн тохиолдолд Б.Амарсайханаас тусгаарлан шийдвэрлэнэ.

"Таван богд" группийн үүсгэн байгуулагч Ц.Баатарсайханд хууль зүйн хувьд хамаагүй. Гол нь тэдний гэр бүл монголд Үндэстэн дамнасан корпорац лугаа бэхэжсэн, гадны олон нэр хүндтэй бизнесүүдийг монголд төлөөлөх эрх хүлээдэг зэрэг нийгмийн шинжтэйд л асуудал нь байгаа юм. Энэ тохиолдолд ёс зүйн хариуцлага зайлшгүй яригдах л ёстой гэсэн шүүмж өрнөөд байгаа юм.

Уг асуудлаар "Таван богд" групп, "Говь" ХК-ийн зүгээс ямар нэгэн шийдвэр гаргаагүй, тодорхой тайлбар хийгээгүй хэвээр байгаа юм. Б.Амарсайхан хил давж зугтсан нь уг хэргийн мөрдөн шалгах процесс удааширсан гол шалтгаан болчхоод байна.

-Гадаад руу эмчилгээнд явсан хохирогч залуу одоогоор Монголд ирээгүй байна-

Хохирогч Д.С-ийн хувьд 25 настай. Зодуулсны улмаас хавсарсан олон гэмтэл авч, яаралтай хүнд хагалгаанд орох шаардлага гарсан тул ар гэрийнхнийх нь хүсэлтээр хэрэг гарснаас гурав хоногийн дараа буюу долоодугаар сарын 23-ны өдөр гаднын улс руу эмчилгээнд явсан.

Одоогоор Монгол ирээгүй байгаа юм. Түүний аав Д.Дашзэвэг хамгийн сүүлд цахим сүлжээнд "Б.Амарсайхаан чи эр хүн шиг ирж биднээс уучлалт гуй, хариуцлагаа хүлээ. Зугтлаа гээд би чамайг мартахгүй, зогсохгүй, цөхрөхгүй шүү. Ирэхгүй байсаар байгаад бүх хэрэг нь замхраад амар сайхандаа жаргажээ гэдэг үлгэрийг чамд хэн ч зохиож өгөхгүй шүү" хэмээн бичсэн байдаг.

Улмаар хохирогчийн ар гэрт 450 сая төгрөгөөр тохиролцох санал тавьсан ч хүлээж аваагүй гэгдсэн юм.

Мөнхүү хөшигний ард нэг сонирхолтой өнцөг яваа нь, хохирогч залуугийн аав хурандаа Д.Дашзэвэг монгол дахь хууль хүчнийхний хар тамхи худалдан борлуулах нууц сүлжээний талаар мэдээлэл өндөртэй хэмээн ярих болов...

П.Цэрэнпунцаг "Хүүгээ саатуулан шалгах хугацаан дээр асуудал үүсгэхгүй" хэмээн дуугарсан ч ...

Хэргийн гол оролцогч, шөнийн цэнгээний газрын гаднах камерын бичлэгт бүлэг зодооныг эхлүүлж буйгаар бичигдсэн УИХ-ын гишүүн асан Ц.Цэрэнпунцагийн хүү Ц.Санжаачойпэл. Б.Амарсайханаас бусад нь буюу Э.Тэмүүлэн, Л.Алтан-Очир нартай анх 48 цагийн хугацаатай цагдан хоригдож суллагдаад /2025-07-23/-ны өдөр прокурор эсэргүүцэл бичсэнээр үргэлжлүүлэн дахин 30 хоног цагдан хорихоор болсон.

Гэтэл тэрхүү 30 хоногийн баривчилгаандаа тэвчээртэй ч сууж чадаагүй. Эрүүл мэндийн шалтгаантай хэмээн өмгөөлөгчөөрөө шүүхэд хүсэлт гаргуулж долоо хоног гадуур явав. Эцэст нь прокурор эсэргүүцэл бичсэнээр 30 хоногоо дуустал баривчлагдах шийдвэр гаргаснаар дахин цагдан хоригдсон байдаг.

Улмаар дахин шүүх хурал болж бүлэг зодооны хэрэг үйлдсэн эл гурван этгээдийн баривчлагдах хугацаа дахин 30 хоногоор сунгагдсан. Иймд Э.Тэмүүлэн, Л.Алтан-Очир нар есдүгээр сарын 23-нд, Ц.Санжаачойпэлийнх есдүгээр сарын 29-нд баривчлах хугацаа дуусна.

Хөшигний ард П.Цэрэнпунцагийг "Хүүгээ саатуулан шалгах хугацаан дээр асуудал үүсгэхгүй" хэмээн дуугарсан гэгдэж буй. Гэхдээ Ц.Санжаачойпэлийн ар гэрийг төлөөлж, өмгөөлөгчдийн баг идэвхтэй ажиллаж байгаа гэх мэдээлэл бий.

-Хэргийн явц цаашид хэрхэх вэ-

Хэргийг мөрдөн шалгаснаас хойших хугацаанд Ц.Санжаачойпэлийг хоёр ч удаа батлан даалтаар гаргах оролдлогыг хийв.

Харин “Эрэл”-ийн Б.Эрдэнэбатын хүү Тэмүүлэн, тэдний найз гэгдэх Л.Алтан-Очир нарын хувьд батлан даалтын хүсэлт шүүхэд нэг ч удаа өгөөгүй. Хоёр ч цагдан хоригдох хугацаагаа сунгууллаа.

Харин дээр дурдсанчлан Б.Амарсайхан хар тамхины шинжилгээгээ өгөх, мөн болсон процессыг ирж тайлбарлан мэдүүлэг өгөх шаардлагатай ч эх орондоо ирээгүй байна. Ингэж байж хэргийн мөрдөн шалгах ажиллагаа дуусаж, прокурорын шатанд шилжих учиртай. Гэтэл хэргийн үйл явцыг удаашруулж байгаа янзтай нэг оролцогч нь гадаадад хууль бусаар тэнүүчилж, нөгөө гурав нь цагдан хоригдож байна. Хохирогчийн биеийн байдлыг тодорхой болгож, тохиролцоо хийж, ялаас мултрах гээд байна уу гэх асуулт ургав.

Бүлэг зодооны хэрэг үйлдэж, хүний биед хүнд хохирол учруулсан, мөн энэ үедээ хар тамхи хэрэглэсэн байж болзошгүй тэднийг цагдаагийн байгууллагаас ганц зүйл ангиар яллагдагчаар татах хүсэлтийг прокурорт хүргүүлсэн байдаг. Энэ нь 1-5 жил зорчих эрхийг хязгаарлах, эсхүл нэг жилээс таван жил хүртэл хорих ялтай Эрүүгийн хуулийн тусгай ангийн 20.16 дугаар зүйл буюу "Олон нийтийн амгалан тайван байдал алдагдуулах".

Хар тамхи хэрэглэсэн, хүний биед онц ноцтой гэмтэл учруулсан гэм бурууд мөн л ял үүрүүлэх учиртай. Үүнийг Цагдаагийн байгууллагынхан уламжлаагүй, Прокурорынхон шүүхэд шилжүүлэхдээ ялын саналд өөрчлөлт оруулна гэж найдах л үлдэв.

Тодотгон хэлэхэд, Ц.Цэрэнпунцаг, Б.Эрдэнэбат, Ц.Баатарсайхан нар бол яах аргагүй Монголын толгой хөрөнгөтнүүд. Хөвүүддээ шударгаар гэм буруугаа үүрч, зохих шийтгэлийг үүрүүлэх мессежийг өгөх ёстой. Магадгүй хохирогчийг "мөнгөөр зодох", тохирох, аргалах оролдлого хийвээс шударга бус байдал гаарч, нийгэм даяар "баяны хүү хэнийг ч дээрэлхэж болох" хандлагад шилжинэ. Үүнийг дагаад шүүх засаглал ч "мөнгөнд сохорсон" болж хоцрох вий.

Энэ мэдээнд өгөх таны үнэлгээ

Хуваалцаарай Жиргээрэй