Сөрөг хүчнийхэн амарч байсан тул хэлэлцэж чадаагүй гэж Францын ерөнхий сайд мэдэгджээ
Францын Ерөнхий сайд Франсуа Байру албан тушаалаасаа татан буугдах эрсдэл тулгараад байгаа. Тэрбээр сөрөг хүчнийхэнтэйгээ хэлэлцэж чадаагүй шалтгаан нь тэд амарч байсан гэж лхагва гарагт /2025.08.27/ хэлжээ. Энэхүү мэдэгдлийнхээ улмаас тэр шүүмжлэл дагуулсан байна. Байру даваа гарагт /2025.08.25/ мэдэгдэл хийхдээ есдүгээр сарын 8-нд засгийн газарт итгэл үзүүлэх санал хураалт явуулна хэмээсэн. Тэрхүү санал хураалтад түүний засгийн газар нуран унах эрсдэлтэй байгаа юм.
Сөрөг хүчний удирдагч нар итгэл үзүүлэх санал хураалтад түүний эсрэг санал өгнө гэж мэдэгдсэн. Байру тэдэнтэй ирэх долоо хоногт уулзаж ятган сэнхрүүлэх гэж оролдоно гэж хэлсэн байгаа. Тэр лхагва гарагт “TF1” телевизийн нэвтрүүлэгт оролцоход сэтгүүлч түүнээс яагаад сөрөг хүчнийхнийг хэлэлцэхийг уриагүй гэдгийг нь асуусан аж. Үүнд Байру “Тэд амарч байсан болохоор. Наймдугаар сард тэд бүгдээрээ амарч байсан” гэж хариулжээ. Түүнийг ингэж хэлсний дараа барууны үзэлтэй намын тэрүүн Марин Ле Пен “Би худал хуурмагт дургүй” гэж Х дээр нийтэлсэн байна. Ногоон намын тэргүүн Марин Тонделиер түүний хэлсэн үгэнд маш их цочирдсон гэжээ.
Эх сурвалж: Reuters
АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.