ОХУ эрчим хүчний дэд бүтэц рүү нь халдсаны дараа Украин хариу арга хэмжээ авахаа мэдэгдлээ
ОХУ-ын зэвсэгт хүчин Украины хойд болон өмнөд бүсийн эрчим хүчний дэд бүтэц рүү дроноор халдсаны улмаас 60 мянга гаруй хүн цахилгаан энергигүй болсон байна. Оросын Батлан хамгаалах яам мэдэгдэл хийхдээ зэвсэгт хүчин нь цэргийн зориулалтаар ашиглаж байсан Украины боомтын дэд бүтцэд цохилт өгсөн гэсэн юм.
Украины Ерөнхийлөгч Владимир Зеленский мэдэгдэл хийхдээ хариу арга хэмжээ авч, ОХУ-ын газар нутгийн гүнд дахин цохилт өгөхийг тушаасан гэжээ.
Дайн эхлээд гурван жил долоон сар гаруй хугацаа өнгөрөөд буй одоогийн нөхцөл байдалд хоёр тал бие биедээ өгөх агаарын цохилтоо эрчимжүүлэх болсон. ОХУ Украины эрчим хүч болон тээврийн дэд бүтцийг онилж байгаа бол Украин ОХУ-ын газрын тос боловсруулах үйлдвэр болон цооногуудад цохилт өгч буй.
Зеленский Украины зэвсэгт хүчний командлагч Александр Сирскийтэй хэлэлцсэнийхээ дараа “Украиныг хамгаалахад шаардлагатай арга замаар үйл ажиллагаагаа үргэлжлүүлнэ. Хүн хүч болон нөөц бололцоо нь бэлэн байгаа. ОХУ-ын газар нутгийн гүнд өгөх шинэ цохилтуудыг нэмж төлөвлөсөн” гэж мэдэгджээ.
АНУ-ын Ерөнхийлөгч Доналд Трамп өнгөрсөн сард Украины дайныг дуусгах хүчин чармайлтынхаа хүрээнд дипломат ажиллагаа шаргуу явуулсан. Хоёр тал дайныг дуусгахгүй бол ОХУ-д томоохон үр дагавар бүхий алхам авна мөн Украинд ч хариуцлага тооцож магадгүй гэж тэр мэдэгдсэн юм.
Украины зэвсэгт хүчин ням гарагт /2025.08.31/ мэдэгдэл хийхдээ Москва зуны довтолгоо нь амжилттай болсон гэж мэдэгдсэн ч ямар ч томоохон хотыг эзэлж авч чадаагүй гэжээ. Мөн хяналтдаа авсан газар нутгийнхаа талаарх тоо баримтыг илэрхий хэтрүүлсэн хэмээсэн байна.
Кремль өчигдөр мэдэгдэл хийхдээ Трамп энхийг тогтоох гэсэн хүчин чармайлтад Европын орнууд саад болж байна гэжээ.
Эх сурвалж: Reuters
АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.