Багануураас эртний хотын туурь олджээ

Монгол Улсын Боловсрол соёл шинжлэх ухаан спортын яамны сайдын 2019 оны дөрөвдүгээр сарын 22-ны А/233 дугаар тушаалаар Палеонтологийн эрдэм шинжилгээний хайгуул, археологийн авран хамгаалах малтлага судалгааны ажил хийгдэж байна. Хүннү ба эртний улсуудын соёлын өвийн судалгаа шинжилгээний ажил Багануур дүүргийн тавдугаар хорооны нутаг дэвсгэрт энэ сарын 3-наас эхлэн хийгдэж байгаа юм. Энэ нь Хүннү ба эртний улсын хүрээт довын их хотын туурь Багануур дүүргийн нутаг дэвсгэрээс олдсонтой холбоотой гэнэ.

Шинжлэх ухааны академийн Түүх археологийн хүрээлэнгийн доктор, дэд профессор, Эрдэм шинжилгээний тэргүүлэх ажилтан Г.Эрэгзэнгээр ахлуулсан судалгаа шинжилгээний баг, БНСУ-ын Төвийн бүсийн соёлын өвийн хүрээлэн, Чүнбукийн Үндэсний их сургуулийн хамтарсан баг Хүрээт довын хамгийн том үндсэн их хотын суурийн малтлагын ажлыг хийж байна.

Хүрээт довын их хотын байршлын талбайн ажил гурван жил үргэлжлэх бөгөөд цаашид дүүргийн аялал жуулчлалыг хөгжүүлэх, хүүхэд залуучуудад эх түүхээ сурталчлахад чухал ач холбогдолтой ажил болохоор байгаа аж. Ажлын явцтай Мэргэжлийн хяналтын ерөнхий газар, дүүргийн Засаг даргын Тамгын газар, Өргөө соёлын ордноос очиж танилцан саналаа бодлоо солилцсон байна.

С.ХОНГОРЗУЛ

Энэ мэдээнд өгөх таны үнэлгээ

Хуваалцаарай Жиргээрэй