Зэвсэгт хүчний нягтлан бодогч 373 сая төгрөг хувьдаа завшжээ

Зэвсэгт хүчний жанжин штабын харьяа цэргийн ангиудад ажиллаж байсан нягтлан бодогч бүсгүй байгууллагын мөнгөнөөс 300 гаруй сая төгрөг хувьдаа завшсан хэргийг өдгөө шүүхийн шатанд хэлэлцэж байна.

Уг бүсгүй нь цэргийн ангид нягтлан бодогч хийдэг байсан бөгөөд хоёр ч ангид ажиллах явцдаа 373 сая төгрөгийн завшсан байна. Ингэхдээ тэрээр цэргийн ангид ажиллаж байгаад гадаад улсад суралцахаар явсан, өөр байгууллага руу шилжсэн, тэтгэвэрт гарсан зэрэг шалтгаанаар тус ангиудад ажилладаггүй, нийт давхардсан тоогоор 500 иргэний нэр дээр хий болон илүү цалин бичиж дээрх мөнгийг шамшигдуулжээ.

Тэрбээр эл их хэмжээний мөнгийг садан төрлийн холбоотой Д-гийн Хаан банкны 50........ дугаартай дансанд шилжүүлж авах аргаар завшиж, их хэмжээний хохирол учруулсан гэмт хэрэгт холбогджээ.

Баянзүрх дүүргийн прокурорын газраас Б-ийн хэргийг шүүхэд шилжүүлжээ. Гэвч Баянзүрх дүүргийн Эрүүгийн хэргийн анхан шатны шүүхээс түүнд дөрвөн жилийн хорих ял оноосон ч шүүхийн шийтгэх тогтоол биелүүлэхийг хоёр жилийн хугацаагаар хойшлуулах шийдвэр гаргасан байна.

Учир нь шүүгдэгч Б нь шүүх хурлын үед жирэмсэн байсан учир шийтгэх тогтоолыг хойшлуулж өгөх хүсэлт гаргасан байжээ. Харин давж заалдах шатны шүүхээс анхан шатны шүүхээс оноосон дөрвөн жилийн ялыг 5,1 жил болгож, мөн л ялыг нь хоёр жилээр хойшлуулахаар шийвдэрлэжээ.

Түүнчлэн Б-ээс 310.725.167 төгрөг гаргуулж Монгол Улсын Зэвсэгт хүчний Жанжин штабт олгохоор шийдвэрлэсэн байна.

 Ж.ДӨЛГӨӨН

Энэ мэдээнд өгөх таны үнэлгээ

Хуваалцаарай Жиргээрэй