“Намайг нэр дэвшихээ болиосой гэж байгаа нь МАН, АН-ын бичээч нар, харин ард түмэн тэгж бодохгүй байгаа”

Бүгд найрамдах намын дарга Б.Жаргалсайхантай цаг үеийн асуудлаар ярилцлаа.

-ШИНЭ НАМЫГ ШУДАРГА ЁСНЫ ТӨЛӨӨ ТУУШТАЙ ТЭМЦЭЖ ЧАДАХ ХҮМҮҮС ГЭЖ ХАРСАН УЧРААС ЭВССЭН-

-“ШИНЭ” нам, “Үнэн ба зөв” нам, “БНН” тэргүүтэй 11 нам нийлээд “ШИНЭ” эвсэл байгуулчихлаа. Та чухам яагаад тэдэнтэй эвсэх болов. Гайхаж байгаа хүн цөөнгүй байгаа нь анзаарагдлаа.

-“ШИНЭ” намыг шударга ёсны төлөө тууштай явж чадах хүмүүсийн нэгдэл гэж харсан. Иймээс эвссэн гэж ойлгож болно. Харин МАН ямар ч намтай эвсдэггүй, АН нэг удаа эвсэл байгуулаад авлига, албан тушаалаас болоод салцгаасан. Н.Энхбаярын намтай эвсэх хэцүү. Дэндүү хуучинсаг, хоцрогдсон хүмүүстэй шинэ юмны төлөө яаж хамтрах вэ дээ.

-МАХН үнэгүй байр амласан, түүний араас МАН нийгмийн даатгал төлдөг хүн бүрт байр амлалаа, АН гурван сая төгрөгийн цалин амлачихлаа. Танай эвслийн мөрийн хөтөлбөрт иймэрхүү амлалтын шинж чанартай зүйл тусгагдсан уу. Танай намын мөрийн хөтөлбөрийн онцлог?

-МАН, АН, МАХН-ын нөхөд мөрийн хөтөлбөрөө гаргасны дараа бид хамгийн сүүлд мөрийн хөтөлбөрөө гаргаж танилцуулна. Мөрийн хөтөлбөрийг санаатайгаар харлуулах, мушгин гуйвуулах ажлыг зохион байгуулалттайгаар хийгээд байгаа учир бид тэгж шийдсэн.

-Та миний асуултад хариулсангүй. Танай эвслийнхэн мөрийн хөтөлбөртөө иймэрхүү амлалтын шинж чанартай зүйл тусгасан уу?

-Сонгогчдыг хууран мэхэлж санал авах ажлыг бид хийдэггүй. Үүнийг МАН, АН, МАХН л хийж ирсэн. Хууран мэхлэх ажиллагаа хийсэн хүмүүстэй л хариуцлага ярих хэрэгтэй. Манай мөрийн хөтөлбөрт улс, эх орноо хэрхэн яаж эрс шинэчлэх вэ зэрэг асар олон зүйл тусгагдсан. Хамгийн гол нь амьдрал дээр бодит ажил болон хэрэгжих зүйлсийг мөрийн хөтөлбөртөө оруулсан. Айл өрх бүрийн хаалга, тооноор орох, иргэн бүрийн энгэрийн халаасанд орох хүн төвтэй хөтөлбөр гаргачихсан байгаа.  Шударга ёсон дээр тулгуурласан хүн төвтэй хөтөлбөрийг бид санал болгоно.  

-Ж.БАТЗАНДАНГ ЭЛДЭВ ХУУЛЬ БУС ЮМАНД ОРОЛЦОЖ БАЙГААГҮЙГЭЭР НЬ ҮНЭЛЖ БАЙНА, ХАРИН А.ОТГОНБААТАР ТӨРД ХЭРЭГ БОЛОХ МАГАДЛАЛ ӨНДӨРТЭЙ ЗАЛУУ-

-Танай эвсэл 30 гэр бүл болон тэдний хамаатан садан тавьсан 30 тэрбум ам.долларын өрийг өөрсдөөр нь төлүүлэх арга хэмжээ авна гэж байгаа. Энэ амлалтандаа хүрэх тодорхой гаргалгаа бий юү?

-Яах вэ, судлах ёстой болох байх. 30 тэрбум дотор үнэ тогтворжуулсан, зам тавьсан, цахилгаан станцууд шинэчилсэн өрүүд гээд олон өр хамаарна. Үүнийг бүгдийг нь тэр 30 гэр бүлд тохож болохгүй байх л даа. Хооронд нь ялгаж салгаж байж л төлүүлнэ, өөр арга байхгүй. Хийгээгүй хэргийнх нь төлөө ял өгч болохгүй биз дээ. Үүнтэй л адилхан.

-“ШИНЭ” намын дарга Ж.Батзанданг сүүлийн үед олон нийт “попрогч” гэж хардаг, үнэлдэг болчих шиг. Та түүнийг яаж үнэлдэг вэ?

-ШИНЭ” намын дарга Ж.Батзандан улс төрд орж ирээд арав гаруй жил болчихлоо. Хөдөлгөөн байгуулахаас эхлээд маш их тэмцэж ирсэн. Өнөөдрийг хүртэл тэмцэж байна. Хоёрдугаарт, тэр элдэв эрүүгийн гэмт хэрэг, хууль бус юманд оролцож байсангүй. Үүгээр нь хүндэлж, үнэлж байгаа хэрэг л дээ.

-Тэгвэл “Үнэн ба зөв” намын дарга А.Отгонбаатарыг?

-А.Отгонбаатар бол одоо гарч ирж байгаа залуу үеийн нэг яах аргагүй мөн. Энэ залуу хэнд ямар муу зүйл хийчихсэн юм бэ. Чи залуу байна, хэн ч биш байна гээд доромжлоод байх ямар шаардлагатай юм бэ. Бид залуу халаагаа бэлтгэх ёстой шүү дээ, улс төрд дагуулж яваад. А.Отгонбаатар бол сайн залуу. Залуу хүн гэхэд нийгмийн идэвхтэй, дандаа бусдын төлөө үг дуугардаг. Цаагуур чинь ард түмний төлөө дуугардаггүй, сэтгэл зүрхээ хөдөлгөдөггүй өчнөөн мянган хүн байна. Би л болж байвал болоо гэсэн юм шиг сууцгаадаг биз дээ. Бусдыг шүүмжилж, доромжлохоос өөр юу ч хийдэггүй болж. Тэднийг бодвол А.Отгонбаатар төрд хэрэгтэй хүн болох магадлал өндөртэй залуу. Мэдээж суралцах зүйл олон байлгүй яахав.

-НАМАЙГ НЭР ДЭВШИХЭЭ БОЛИОСОЙ ГЭЖ БАЙГАА ХҮМҮҮС НЬ МАН, АН-ЫН БИЧЭЭЧ НАР, АРД ТҮМЭН ХАРИН НЭР ДЭВШЭЭСЭЙ ГЭЖ БОДОЖ БАЙГАА-

-АН сонгуулийн санхүүжилтээ ил тод зарласан. МАН нэр дэвшигчдээсээ мөнгө авахгүй, ёс зүйг нь харна гэж байгаа. Танай намын хувьд сонгуулийн мөнгөө яаж босгох вэ?

-Улс орныг удирдан жолоодох, УИХ-ын гишүүн болох хүн хулгай дээрэм хийдэггүй, ёс зүйтэй, эх оронч, сэхээтэн, оюунлаг хүн байх ёстой. Сонгууль эхлээгүй байхад мөнгөний цоорхойгоор харж байгаа хүмүүс УИХ-ын гишүүн болоод авлига, дээрэм, хулгайг цэцэглүүлнэ. Тиймээс шударга бус асуудал намуудын  сонгуульд оролцох санхүүжилтээс эхэлдэг. Энд тэнд, мөнгө тараагаад эхэлснийг сонссон. Мэдэж байгаа. Удахгүй тэдэнтэй хариуцлага ярина. Ил зарлана. Арван мянган төгрөг тараагаад сонгуульд гарчихна гэж бодоод байна. Монгол хүний эрх чөлөө, тусгаар тогтнолыг аравхан мянган төгрөгөөр худалдаж авч болдог юм уу, ер нь. Үнэлшгүй зүйл.

-Та УИХ-ын сонгуульд хэд дэх удаагаа нэр дэвших гэж байна вэ. Нэр дэвшихээс залхахгүй байна уу. Ингэж бодох хүмүүс ч бий байх?  

-Намайг нэр дэвшихээ болиосой гэж харж байгаа хүмүүс нь МАН болон АН-ын бичээч нар. Тэд л фейсбүүк, твиттерээр бичээд сууж байгаа. Харин ард түмэн тэгж бодохгүй байгаа. За яахав, миний гарах гарахгүй нь чухал биш. Шударга ёс ялаасай, ард түмний төр бий болоосой. Олигархууд болиосой. Ард түмнийг төлөөлж чаддаг төртэй болох юмсан. Тэрнээс хувь хүн Б.Жаргалсайхан сонгуульд орох, гарах нь нэг их чухал биш.

-ДОКТОР, ПРОФЕССОР, СЭХЭЭТНИЙ ТӨЛӨӨЛӨЛ БОЛСОН 180 ХҮН МАНАЙХААС НЭР ДЭВШИХЭЭР БЭЛДЭЖ БАЙНА-

-Шударга ёс ялаасай гэснээс та хэр шударга хүн бэ?

-За мэдэхгүй ээ. Өөрийгөө хүндэлдэг, үнэлдэг зан бол агуу тэнэг хүний л зан. Хүний үнэн худлыг амьдрал, цаг хугацаа харуулдаг юм.

-БНН сонгуулийн өмнөхөн идэвхжээд бусад үед нь таг чимээгүй болчихдог гэх шүүмжлэлд байнга өртдөг. Ер нь танай намд танаас өөр улстөрч байна уу, ганц хүний нам ч гэгддэг шүү дээ?

-Чимээгүй байгаагүй ээ. Ингээд л буруу яриад байх юм. Би намын даргын хувьд, улстөрч хүний хувьд зөндөө л нэвтрүүлэг хийж байгаа шүү дээ. Нийгмийн болох болохгүй асуудлуудыг хөндсөн. Манай намаас 180 хүн сонгуульд орох гээд бэлдээд байж байна. Доктор, профессор, сэхээтэн хүмүүсийн төлөөлөл манай намд бий.

-Намаа шинэчлэх, залуу үеэр сэлгэх цаг нь ирсэн гэж боддог уу?  

-Нам шинэчлэгдэхгүй. Нам өөрийн зорилго зорилтоо биелүүлэх гээд л явж байгаа.  Тэрнээс биш хуучинсаг үзэл бодолтой хүмүүс биш. Хөгжил дэвшлийн зуунд хөгжлийн төлөө л явах нь бидний зорилго.

 -АН СОНГУУЛЬ ДАЛИМДУУЛАН ЭРДЭНЭТ ҮЙЛДВЭРЭЭС ХУЛГАЙЛЖ БАЙСНЫГ МАН АРД ТҮМЭНД ЭРГҮҮЛЖ ӨГСӨН-

-Эрх баригч намд оногдсон дөрвөн жил дууслаа, тэдэнд та ямар дүн тавих вэ?

-Эрх баригчдад би гурав гэдэг дүн тавина. Саалийн үнээтэй, олон нялх хүүхэдтэй айл байжээ. Үнээгээ саагаад цагаан идээ боловсруулж идээд байж байтал хөрш айлын хүн ирээд хулгайлчхаж гэнэ л дээ. Үүнтэй яг адил АН сонгууль далимдуулан “Эрдэнэт үйлдвэр”-ээс хулгай хийх гэж байсныг МАН ард түмэнд эргүүлэн өгсөн. Тийм биз. Төрийн өмч гэдэг чинь ард түмний өмч. Мөн МАН нам дотроо зөв зүйлсийг хийж байна. Нам доторх хуучин олигархуудтайгаа хатуу тэмцээд эхэлчихлээ. Ардчилсан нам харин тэгж тэмцэхгүй байгаа. Ардчилсан намын тавьсан өрийг МАН цэгцлээд энэ хүнд хэцүү цагт унах гэж байсан эдийн засгийг тогтоогоод бариад л байна. Сая ямар ч байсан ахмадуудын тэтгэврийг тэглэчихлээ.

Харин “Май энэ байна” гээд хэлчих зүйл Ардчилсан намд бий юү. Дээр нь АН утааны асуудлыг шийднэ, шийдэхгүй гэж өчнөөн мөнгө, зарж эцэст нь шорон оронд орсон. Тэгээ биз дээ. Хоёр ч дарга нь гадаад руу зугтаад гарчихсан байж байна. Хэрэв МАН олонх суудал аваагүй бол бид хамаг юмаа хулгайч нарт алдах байсан.

Ардын намынхан гарч ирсэн. Утааны асуудлаа шийдсэн. Энэ жил бие биенээ харахтайгаа өвөлжөө биз. Ирэх жил Дархан, Эрдэнэт, Налайх болон бусад аймгуудыг утаагүйжүүлмээр байна. Шахмал түлшийг улам сайжруулж, хот хөдөөгүй түгээлт хийх тогтолцоо бий болгох хэрэгтэй.

Ний нуугүй ярихад ийм байна. Би ардын намд долигонож байгаа юм биш шүү. Бодит үнэнийг л ярьж байна. Сонгуулиар эдэнтэй би өрсөлдөнө. Адилхан өрсөлдөгч.

-МАН-ын ахмад гишүүдийн цаашдын карьерийг та өөрийн цахим хуудаснаа тодорхойлсон. Ц.Нямдорж, Ө.Энхтүвшин хоёрыг Хойд Солонгос руу явуул, амьдрал үзэг гэсэн байдаг. Үүнээс үүдэж таныг чухам сонгуулийн өрсөлдөгчөө өөрөөсөө холдуулж байна гэж ч байсан?

-Би тэнд өрсөлдөгчөө байхгүй болгох тухай юу ч дурьдаагүй. Тэтгэвэртээ гарах болчихсон нь үнэн л биз дээ. Тэдэнтэй юунд нь өрсөлдөх юм бэ. Надад тэдэнтэй өрсөлдөх шаардлага байхгүй. Ц.Нямдорж, Ч.Улаан, Лүндээжанцан гэсэн ахмадуудыг зүгээр л элчингийн зөвлөхөөр явуулчхаач дээ. Тэд 70 хүрчихлээ. Одоо дараачийн үе нь гарч ирэг л дээ. Энэ үүднээс л тэгээд биччихсэн.

-ДЭЛХИЙН ЭДИЙН ЗАСАГ ХЯМРАЛД ОРООД БАЙХАД Ч.УЛААН САЙД НООЛУУРЫН ҮНИЙГ 100 МЯНГАД ХҮРГЭНЭ ГЭЖ ЮУ ЯРИАД БАЙГАА ЮМ БЭ-

-Үндэсний үйлдвэрүүдэд дэмжлэг болгож 300 тэрбум төгрөгийн хөнгөлөлттэй зээл олгоно. Тэгээд малчдын ноолуурыг 100 мянган төгрөгөөр үйлдвэрлэгчид авна гэж ХХААХҮ-ийн сайд Ч.Улаан мэдэгдсэн. Энэ салбарт ажилладаг хүний хувьд та ямар байр суурьтай байна вэ?

-Ноолуурын үнийг 100 мянгад хүргэнэ гээд тэр Ч.Улаан сайд одоо юу яриад байгаа юм бэ. Ч.Улаан өөрөө ямар ноолуурын үйлдвэртэй юм. Өнгөрсөн жил ноолуур 60-70 мянган төгрөгний ханштай байсан шүү дээ. Дэлхийн эдийн засаг хямарчхаад байхад яагаад заавал 100 мянган төгрөгөөр авна, авахгүй гэж яриад байгаа юм бэ. Хөдөө аж ахуйн салбараа ерөөсөө ярихгүй зөвхөн малчны тухай яриад байх юм. Үйлдвэрлэгчид бид нар хүн биш юм уу. Тэгвэл хөрөнгө оруулахаа больчихъё л доо. Үйлдвэрлэгч бид өрөнд орон байж яаж 100 мянган төгрөгөөр ноолуур авах юм бэ. Энэ жил ноолуурын ханш 20-30 мянган төгрөг байх төлөвтэй байна. 70 мянган төгрөгний зөрүүтэй ноолуур аваад бид нар яах юм бэ. Бид зээл аваад 100 мянгаар ноолуур авлаа гэхэд тэр өрийг хэн төлөх юм. Ийм хариуцлагагүй юм ярьж болохгүй.

-Ярилцлагынхаа төгсгөлд улс төрийн сэдвээс жаахан хазайя. Цахим хуудсаараа дамжуулсан таны хурц шүүмжлэлүүд бусдад хүрдэг. Сошиалд хичнээн цагийг зарцуулж байна?

-Цахимд нэг их цаг зарцуулаад байдаггүй. Шаардлагатай зүйлсийг бичээд л орхидог. Миний бичсэн зүйл таалагдвал тэр л биз. Таалагдахгүй бол битгий унш. Үүнд чинь уурлаад боож үхэх гээд байх шалтгаан юу байгаа юм бэ. Би ч бусдын адил таалагдсанаа уншиж, таалагдаагүйг нь зүгээр л хаядаг. Зарим хүмүүсийг хараад байхад дургүйцэж үхэх гэж байж л бусдын хаяг руу орж уншаад боож үхэх гээд байдаг юм. Тэгж өөрийнхөө насыг хороох ямар хэрэгтэй юм.

-Цаг зав гарган ярилцсанд баярлалаа.

Гэрэл зургийг: Ц.Мягмарсүрэн

Энэ мэдээнд өгөх таны үнэлгээ

Хуваалцаарай Жиргээрэй