О.Баасанхүү: Дэвшихгүй өнжвөл Ц.Элбэгдоржийг өмгөөлнө, араас нь Х.Баттулга, У.Хүрэлсүх нар ороод ирэх биз

МАХН-аас УИХ-д сонгогдсон О.Баасанхүү гишүүн дөрөвдүгээр сарын 22-нд Ардчилсан намын гишүүнчлэлээ сэргээн, үнэмлэхээ гардаж авсан. Тэрээр АН-д орохдоо “Миний бие АН ыг бүлэгтэй болгох, хүчтэй сөрөг хүчнийг бий болгох зорилгоор Ардчилсан намд элсэхээр шийдлээ” хэмээн мэдэгдэж байсан билээ. Өчигдрөөс “Ардчилсан намынхан түүнд тойрог өгөхгүй байгаа” гэсэн мэдээлэл цахим орчинд тархсан юм. Эл асуудалтай нь холбогдуулан бид түүнтэй цөөн хором ярилцлаа.

-НЭР ДЭВШВЭЛ САЙН Л БИЗ, ДЭВШҮҮЛЭХГҮЙ БОЛ БОЛИНО Л БИЗ-

-“Ардчилсан намаас нэр дэвшигчид эхнээсээ тодорлоо. О.Баасанхүү гишүүнд тойрог өгөөгүй байна” гэх мэдээлэл цахим орчинд тархаад байгаа. Үнэн үү?  

-Би харсангүй. Мэдэхгүй. Надад дэвшсэн ч, дэвшээгүй ч нэг их ялгаа алга. Нэгэнт би намд элссэн. Нам нь шийдэх байлгүй дээ гэсэн бодолтой байна. УИХ-д найман жил бие даагч шиг явлаа. Сүүлийн үед улстөрийг томоор харж, багаар ажиллах нь чухал гэдгийг ойлгож байна. Ялангуяа миний сонгогдсон Эрдэнэтийн тойрогт гурван асуудал чухал болоод байна.

-Ямар гурван асуудал?

-Манай Эрдэнэтэд хулгайч, худалч гэсэн хоёр хүн нэр дэвшиж байгаа. Тэр хоёроос Эрдэнэтчүүдээ хамгаалахгүй бол төрд орж ирээд дөрвөн жил манай Эрдэнэтчүүдээр тоглоно. Хулгайч нь хулгайгаа хийгээд, худалч нь худал яриад салахгүй. 2020 онд төр маш хүнд байдал орно. Эдийн засгийн хямрал, өр зээлийн асуудал, хар саарал жагсаалтын асуудал босож ирнэ. Ийм үед хулгайч, худалч хүмүүс төрд орчихвол маш аюултай. Хоёрдугаарт, зарим хүмүүсийн ярьж байгаачлан “Эрдэнэт үйлдвэр” тааламжтай  нөхцөлтэй гээд байгаа боловч зэсийн үнийн уналт, хулгайн асуудал хэцүүднэ. МАН төр барьж байхдаа асар их хулгай хийсэн байна. Хулгайн үр дүнгээс болоод үйлдвэрийн нөхцөл байдал ямар болох нь ойлгомжгүй байна. Энэ асуудалд анхаарал тавьж, үйлдвэрийнхээ ажилчдаа хамгаалах ёстой. Миний хоёр дахь зорилго бол Эрдэнэт хотоо  өмөөрч, эрдэнэтчүүдээ хамгаалах юм. Гуравдугаарт, шинэ Үндсэн хууль энэ сарын 25-наас хэрэгжиж эхэлнэ. Хотын статустай холбоотой өргөн барихад бэлэн болчихсон хуулиуд бий. Шаардлагатай гэж үзвэл ажлаа хийгээд л явна. Тийм учраас та нарын хэлээд байгаа шиг “О.Баасанхүүг ингэх болов уу, тэгэх болов уу” гэдэгт санаа зовсон бодол алга. Дэвшвэл сайн л биз, дэвшүүлэхгүй бол болино л биз. Нам нь дүрэм, журмаараа шийдээд л явах асуудал.

-ЭРДЭНЭТЭЭС ӨӨР ГАЗАР НЭР ДЭВШИХ УТГАГҮЙ. ЭРДЭНЭТЧҮҮДИЙГ ДОРОМЖИЛЖ БОЛОХГҮЙ БИЗ ДЭЭ-

-Орхоноос нэр дэвших бодолтой байгаа юу, таны хувийн бодол?

-Би Эрдэнэтээс өөр газар дэвших утгагүй шүү дээ. Яагаад гэвэл Эрдэнэтчүүдийн доромжилж болохгүй. Гурвын гурван хүнийг Эрдэнэтчүүд сонгосон. “Та бүхэн биднийг төлөөлөөрэй, улс орныхоо төлөө зүтгээрэй” гэж итгэсэн. Гэтэл хоёр нь зугтаад алга болчихсон. Эрдэнэтчүүдийг хаясан. Тиймээс би нөгөө хоёрынхоо өмнөөс ярих хэрэгтэй болчхоод байна. Юу хийсэн, юу хийх гэж байсан, юу хийх вэ гэдгээ би ярих ёстой шүү дээ. Юу амлаж гарсныг нь гишүүндээ сануулж байх ёстой. Манайхан гарахын тулд есөн шидийн зүйл амладаг.

-Үнэгүй байр, өндөр цалин гээд л... ?

-“Сургууль барина, танай хүүхдийг сургууль цэцэрлэгт оруулж өгнө” гэх мэтээр амладаг. Амласан амлалтаа биелүүлээгүй бол битгий сонго. Мөн тойрог сольж байгаа хүмүүсийг ч сонгохгүй, хөөж явуулах хэрэгтэй. 1996 оноос төрийн өндөр дээд албан тушаалд тасралтгүй сууж ирсэн, өмнө нь УИХ-ын гишүүнд дахин дэвших гэж байгаа хүмүүс Эрдэнэтэд нэр дэвших биз. Нэр дэвших эрх нь хэнд ч нээлттэй. Гэхдээ та төрд байхдаа юу хийсэн бэ, ямар хууль санаачилсан бэ, ямар ажлын хэсэгт орсон бэ, Эрдэнэт үйлдвэрийн ажилчдын төлөө юу хийсэн бэ, Эрдэнэт хотын төлөө юу хийсэн бэ, иргэдийн төлөө хэрхэн дуугарсан бэ гэдгийг нь асуух хэрэгтэй. Юу ч хийгээгүй хүнийг одоо болиулах хэрэгтэй. 30 жил хууртлаа шүү дээ. Сонгууль дөхөөд ирэхээр 30 мянган төгрөгөнд л хууртаад байгаа байхгүй юу. Тийм учраас УИХ-д яагаад нэр дэвшиж байгаа вэ гэхээс илүү, иргэд тэр хүнийг яагаад сонгож байгаа вэ гэдэг нь чухал.

-АРДЧИЛСАН НАМД ОРОХДОО ТОЙРОГ ЯРИЛЦСАН ЗҮЙЛ БАЙХГҮЙ-

-Та Ардчилсан намд орохдоо аль тойргоос нэр дэвшихээ анхнаасаа ярьж тохироогүй гэж үү?

-Надад улстөрийн амбиц алга. Би нэг нүүртэй л байхыг хүсдэг. Тэгж ярилцсан зүйл байхгүй ээ. Зарим хүмүүс намайг Ардчилсан намд орсон гэж ярьдаг. Яг үнэндээ Ардчилсан намд орох, Ардчилсан намаас нэр дэвших нь хоёр өөр асуудал байхгүй юу. Аль нэг намын хүнийг дэвшүүлж болохгүй гэсэн учраас намд нь орж байгаа юм. Бодит байдлыг та нар мэдэж байгаа шүү дээ. МАХН найман удаа намайг хөөсөн. Нэр дэвшүүлэхгүй гэх мэтээр найман жил буланд шахлаа. Тэгсэн хэрнээ нам дамжсан улстөрийн биеэ үнэлэгч хүмүүсийг хажуудаа авч ирчихээд төрийн сонгуульд ч, Ерөнхийлөгчийн сонгуульд ч сойгоод явж байгаа нь үнэндээ л утгагүй.

-100 сая төгрөгийн дэнчингээ намдаа өгчихсөн үү?

-Энэ асуудлаар Сүхбаатар дүүрэг дээр яллагдагчаар татаж байгаа юм билээ. Шалгаад аль хэдийн худлаа гэдгийг нь тогтоосон. Одоо зөвхөн зохион байгуулалттай байсан уу үгүй юу гэдгийг нь тогтоохоор явж байгаа юм билээ. Тиймээс энэ худал мэдээллийг хэвлэл мэдээллийн хэрэгслээр дахин хөөргөж битгий тараагаарай, тэгвэл гэмт хэргийн хамтрагч болно шүү гэж хэлмээр байна.

-АРДЧИЛСАН НАМД ОРСОНДОО ХАРАМСААД БАЙХ ЗҮЙЛ АЛГА-

-Ардчилсан намд орсондоо харамсаж байна уу?

-Юу гэж харамсах вэ дээ. /инээв.сурв/ Би 1994 оноос Ардчилсан намын гишүүн байсан хүн. 2011 онд Н.Энхбаяр даргатай нийлээд нам байгуулсан. Дүрэм, журмаа бичээд л явж байсан. Дараа нь тэр хүн энэ намыг хувьдаа авах гэж оролдсон. Оролдлого нь ч бүтэлгүйтэж байх шиг байна. Нэг хүний гайгаас болж бүхэл бүтэн нэг улстөрийн хүчин улстөрийн тавцангаас арчигдах нөхцөл байдад үүсчихлээ. За яах вэ, мөрөөдөлд нь саад хийгээд яахав. Миний ах байсан, намайг улстөрд оруулсан хүн. Сонгуульд дөхөж байхад энэ хүнээр оролдоод яахав, тайван сонгуульдаа оръё. Харин намайг дэгээдэж унагаах олон хор найруулж байгаа сурагтай. Үгүй, тэгээд унагаа л даа. Боливол болил доо. Би бол өмгөөлөгч хүн. Сонгуульд аэр дэвшихгүй бол Ц.Элбэгдоржийг өмгөөлчихнө. Араас нь Ц.Баттулга, У.Хүрэлсүх ороод ирэх байлгүй дээ. Тэднийг бас өмгөөлөөд л явчихна. Би Монгол Улсын Ерөнхийлөгч байсан хүнийг өмгөөлж байсан хүн шүү дээ. Надад мэргэжил, ажил, зорьсон зорилго бий. Тиймээс чичрээд байгаа зүйл надад алга.

-Танай намаас Орхонд ямар хүмүүс нэр дэвших сурагтай байна вэ?

-Мэдэхгүй байна. Намын ҮБХ-ны гишүүнээр саяхан сонгогдлоо. Намын дотоод асуудалд орж чадахгүй байна. Намын ҮБХ 16-нд хуралдаж бүх зүйл тодорно. Түүнээс наана би тайлбарлаад яахав.

-Цаг гарган ярилцсанд баярлалаа.

-Баярлалаа.

Энэ мэдээнд өгөх таны үнэлгээ

Хуваалцаарай Жиргээрэй