ТАНИЛЦ: МҮОНРТ-ийн Ерөнхий захиралд өрсөлдөгчдийн ХЭН НЬ ХЭН БЭ

Өчигдрийн Төрийн байгуулалтын байнгын хорооны хуралдаанаар Монголын Үндэсний олон нийтийн радио телевизийн Үндэсний зөвлөлийн гишүүнийг сонгон шалгаруулах үүрэг бүхий ажлын хэсэг байгуулах талаар хэлэлцсэн. Тодруулбал уг ажлын хэсгийг Улсын Их Хурлын гишүүн Д.Тогтохсүрэнгээр ахлуулан, бүрэлдэхүүнд Улсын Их Хурлын гишүүн Ж.Батсуурь, Ж.Ганбаатар, Ж.Мөнхбат, Л.Энх-Амгалан нар ажиллахаар, ажлын хэсгийн нарийн бичгээр Тамгын газрын Хууль, эрх зүйн газрын ахлах зөвлөх Б.Хатантуул ажиллахаар төсөлд заажээ.

МҮОНРТ-ийн удирдах дээд байгууллага нь Үндэсний зөвлөл (ҮЗ). ҮЗ нь олон нийтийн ашиг сонирхлыг төлөөлөх, орон тооны бус, зургаан жилээр томилогддог 15 гишүүнтэй (Ерөнхийлөгч 4, Их Хурал 7, Засгийн газар 4-ийнх нь нэрийг дэвшүүлдэг) ба Ерөнхий захирлыг томилох, чөлөөлөх, түүнтэй гэрээ байгуулах үүрэгтэй.

МҮОНРТ-ийг Ерөнхий захирал Л.Нинжжамцыг эсэргүүцэж, ажлаа өгөхөд хүргэсэн МҮОНРТ-ийн хамт олны хувьд дараагийн захирал томилох асуудлыг маш анхааралтай ажиглаж буй. Тиймдээ ч шинээр томилогдох Үндэсний зөвлөл нь телевизийн удирдлагын багийг сонгоосой гэж хүсч буй аж. Өөрөөр хэлбэл МҮОНРТ-ийн удирдлагуудыг томилох үйл ажиллагааг шинээр бүрэлдэх Үндэсний зөвлөл гүйцэтгэх нь зүйтэй гэдэг саналыг тус байгууллагын төлөөлөл илэрхийлсэн байна.

Тэгэхээр ажлын хэсгээс тус телевизийн удирдах зөвлөлийн 15 хүнээс долоог нь сонгон шалгаруулна. Учир нь 7-ийнх нь бүрэн эрхийн хугацаа дуусч буй юм. Сонгон шалгаруулалтын материалыг энэ долоо хоногийн сүүл хүртэл хүлээж аваад ирэх долоо хоногоос байнгын хорооны хуралдаанаар хэлэлцээд, УИХ-аас томилох юм.

МҮОНТВ-ийн захирлын сонгон шалгаруулалт зарлагдсан. Тус албан тушаалд нэр дэвшигчдийн материалыг өчигдөр хүртэл хүлээн авч дууссан. Зарим хэвлэл мэдээллийн хэрэгслээр хамт олны шахалтаар ажлаа өгсөн Л.Нинжжамц захирал дахин нэр дэвших гэж байна гэх мэдээлэл гарсан ч энэ нь худлаа байлаа.

Ямартаа ч бүрэн эрх нь дуусч буй Үндэсний зөвлөлийн долоон гишүүнээр хэний талын, ямар хүмүүс солигдож орж ирэхээс шалтгаалж МҮОНРТ-ийн гүйцэтгэх захирал нь хэн гэгч эрхэм, эсвэл хатагтай болох нь шууд хамаарна гэсэн үг юм. Ингээд МҮОНРТ-ийн Гүйцэтгэх захирлын албан тушаалд нэр дэвшиж буй 17 нэр дэвшигчийн хэн нь хэн болох талаар мэдээллийг хүргэж байна.

М.АМАРБАЯР: “Эрдэнэс тавантолгой” компанийн Хэвлэл мэдээлэл, олон нийттэй харилцах хэлтсийн дарга М.Амарбаяр. МАН-ын генсек Д.Амарбаясгалангийн зөвлөхөөр ажиллаж байгаад “Эрдэнэс тавантолгой” руу орсон. Ерөнхийлөгч болон Г.Занданшатар, мөн “Эрдэнэс тавантолгой” компанийн захирал Б.Ганхуягаар дамжуулж дэмжлэг авч, МҮОНРТ-ийн гүйцэтгэх захирлаар очих боломж харагдаж байна. Тэрбээр ТВ5 телевизэд олон жил сэтгүүлчээр ажиллаж байсан, туршлагатай сэтгүүлч юм.

С.БАЯРМӨНХ: УИХ-ын дарга Г.Занданшатарын зөвлөх. Түүнээс өмнө ГХЯ-ны дипломат үйлчилгээний газрын даргын албыг хашиж байсан. Монголын шар сонин үүсгэн байгуулагч хүн. Үндэсний зөвлөлийн гишүүдийг УИХ-аар томилдог гэдэг утгаараа МҮОНРТ-ийн захирал эрх барьж байгаа намд маш их хамааралтай байдаг. Дараа нь УИХ-ын даргад маш их хамааралтай гэдэг утгаараа С.Баярмөнхийг Г.Занданшатарын дэмжлэгтэй гарч ирж мэдэх бодит хүн гэж харж болно. МАН-ын залуу гишүүд С.Баярмөнхийг дэмжихгүй, Л.Нинжамцын өрөөсөн дугуй хэмээн спикертээ уурласан гэгдэж буй.

Т.БАТ-ОРГИЛ: 2020 оны УИХ-ын сонгуульд ХҮН-аас бие дааж нэр дэвшээд гарч чадаагүй. ХҮН намыг анх үүсгэн байгуулалцсан гэдэг. Мөн дуучин мэргэжилтэй бөгөөд ардын жүжигчин Н.Сувд гуайн хүү. Нэр дэвшигчдээс хамгийн онцолж болох либериал хүн. Эдийн засгийн чиглэлийн супер мэдлэгтэй, хэлний боловсрол өндөр, бизнес удирдаж байсан туршлагатай. Гэхдээ ямар ч намын дэмжлэггүй орж ирж байгаа нь сонин үзэгдэл болж байна.

Б.БҮРЭНБААТАР: Залуу сэтгүүлч. Өвөрхангайн харьяалалтай түүнийг Д.Тогтохсүрэн гишүүн дэмжинэ. Энэ хүн МСНЭ-ийн захирал Х.Мандахбаяртай үзэлцдэг, шударга бус зүйлд дуугарчихдаг хүн. Тэрбээр МСНЭ-ийн ерөнхийлөгч Х.Мандахбаярыг огцруулж, сэтгүүлчдийн онц их хурал хуралдуул хэмээн өнгөрсөн оны есдүгээр сард хэвлэлийн хурал хийж бужигнуулж байлаа.

Р.ГАНДИЙМАА: МҮОНРТ-д ММ агентлагт 17 жил тасралтгүй ажиллахдаа орчуулагч-редактораас сурвалжлагч, редактор, тоймч, продюсер, Монголын Мэдээ сувгийн захирал болтол ахисан чадварлаг сэтгүүлч. Тэрбээр мэргэжлийн үнэ цэнэтэй карьераа устгуулсандаа биш цаашид өөр шигээ шулуун шударга, асуудлыг хав дарж гөлөгнөдөг биш нүүр тулж хэлж чаддаг зоригтой, зүрхтэй сэтгүүлч нөхдийнхөө эр зоригийг мохоохгүй гэсэндээ Л.Нинжжамцтай тэмцэж буйгаа илэрхийлсэн.

Г.ГЭРЭЛ: МҮОНРТ-ийн дэд захирлаар ажиллаж байсан энэ бүсгүй одоо Ерөнхий захирлын үүрэг гүйцэтгэгчээр түр ажиллаж буй. Тэрбээр 2001 оноос Үндэсний телевизийн эфирт ажиллаж эхэлсэн байдаг. МУИС-ийг олон улсын харилцааны сэтгүүлч мэргэжлээр төгссөнөөс хойш тасралтгүй телевизийн салбарт ажиллаж буй юм. Түүнийг Ж.Мөнхбат тэргүүтэй гишүүд дэмжиж байгаа юм билээ.

Э.ДАГИЙМАА: МСНЭ-ийн Телевизийн салбар хариуцсан захирлын сонгуульт ажилтай, салбартаа хүлээн зөвшөөрөгдсөн, чадалтай, чадвартай сэтгүүлчдийн нэг юм. Сү.Батболдыг хотын дарга байхад Нийслэлийн Засаг даргын Тамгын газрын Хэвлэл мэдээлэл, олон нийттэй харилцах хэлтсийн даргаар ажиллаж байсан. БОАЖ-ын сайд Д.Сарангэрэл түүнийг дэмжиж оруулж ирж байгаа гэнэ. Гэхдээ дэмжигдэх магадлал тун бага.

Ш.ОТГОН-ӨЛЗИЙ: Ц.Элбэгдоржийн үед Ерөнхийлөгчийн хэвлэлийн албанд нь ажиллаж байсан товчхон CV-тэй. Тэрбээр сүүлийн жилүүдэд Монгол брэндийн асуудлыг хөндөн ярих болсон амбицтай залуусын нэг.

Н.БОЛОРМАА: Монгол дахь “Play boу” сэтгүүлийн эрхлэгч. Тус сэтгүүлийг үүсгэн байгуулагч Хью Хефнертэй хамгийн сүүлийн уулзалтийг хийж, оройн зоогт уригдаж, монгол ноолуур бэлэглэсэн монгол эмэгтэй сэтгүүлч гэгддэг юм билээ.

А.ЭНХТУУЛ: МҮОНР-д эдийн засгийн албаны редактороор ажиллаж байсан гэдэг.

С.АДЪЯАСҮРЭН: Харилцаа холбооны зохицуулах хорооны даргаар ажиллаж байсан энэ хүний тухай мэдээлэл ч олдсонгүй. Ямартаа ч МАН-ын угшилтайгаар албан тушаалд очиж, хашиж байсан нэгэн бололтой.

Н.ДЭМБЭРЭЛ: УИХ-ын дарга Г.Занданшатарыг дагадаг бүтэхгүй түүхтэй улсуудын нэг. Тэрбээр М.Энхболдын хэвлэлийг нэгэн үе хариуцаж явсан. Г.Занданшатарыг ЗГХЭГ-ийн дарга байхад нь “Үндэсний брэндийн зөвлөл” нэрээр баахан мөнгө аваад ёстой л үрэн таран хийсэн бүтэхгүй түүхтэй нөхөр. МАН-ын зүгээс Г.Занданшатарын энэ хүнийг бүтэхгүй түүхтэй учраас дэмжихгүй гэх байр суурьтай байгаа сураг дуулдсан.

Б.ЦОНДОВДОРЖ: ММ агентлагт сэтгүүлчээр ажиллаж байсан сэтгүүлч. Тэрбээр 2020 оны УИХ-ын сонгуулиар 14-р тойрог буюу Төв аймагт “Шинэ  эвсэл”-ээс  нэр дэвшсэн ч амжилтад хүрээгүй юм.

Тү.БАТЗОРИГ, То.БАТЗОРИГ: Энэ хоёр эрхмийн хувьд хоёулаа МҮОНРТ-д ажиллаж байсан түүхтэй гэхээс өөр дорвитой мэдээлэл тун алга. То.Батзоригийн хувьд МҮОНРТ-ийн Байгууллага хөгжлийн газрын захиралаар ажиладаг юм байна.

Б.ЭРДЭНЭБААТАР: олноо “Хөх толбо”-ын хэмээн алдаршсан нэрт сэтгүүлч, нийтлэлч Батын Эрдэнэбаатар.

Д.ХАЖИДМАА: Сонирхолтой нь бүхэл бүтэн МҮОНРТ-ийн Үндэсний зөвлөлд өрсөлдөж буй энэ бүсгийн талаар гүүгл хайлтаас нэг ч мэдээлэл олж чадсангүй.

Энэ мэдээнд өгөх таны үнэлгээ

Хуваалцаарай Жиргээрэй