Б.Ундармааг ялаас чөлөөлснийг прокурор ЭСЭРГҮҮЦЭЖ, Дээд шүүхэд ханджээ

–АНХ УДАА ГЭМТ ХЭРЭГ ҮЙЛДСЭН, ГЭМ БУРУУГАА УХААРСАН, ХОХИРЛОО ТӨЛСӨН ХЭМЭЭН ТҮҮНИЙГ СУЛЛАСАН-

УИХ-ын гишүүн байх хугацаандаа бүрэн эрх, албан тушаалын байдлаа урвуулан ашиглаж, ЖДҮХС-аас өөрийн хамаарал бүхий “Доктор мэйж” компанидаа 800 сая төгрөгийн зээл авсан хэмээн анхан шатны шүүхээс буруутгагдаж, 2.6 жилийн хорих сонссон Б.Ундармаа шүүхийн шийдвэрийг эсэргүүцэн давж заалдсан.

Улмаар өнгөрсөн аравдугаар сарын 22-нд давж заалдах шүүх хурал болж, анхан шатны шүүхийн шийтгэх тогтоолд өөрчлөлт оруулж Б.Ундармааг 40 сая төгрөгөөр торгож, СУЛЛАХ шийдвэр гаргасан байдаг.

Бүхэл бүтэн ард түмнээс мандат авсан, Үндсэн хуулиар бүрэн эрх нь баталгаажсан УИХ-ын гишүүн албан тушаалаа урвуулсан асуудлыг шүүхээс “зөөллөж”, “анх удаа гэмт хэрэг үйлдсэн, гэм буруугаа хүлээн зөвшөөрсөн байдал, гэмт хэргийн улмаас учирсан хохирлоо нөхөн төлсөн, мөн эрүүл мэндийн байдлыг харгалзан үзсэн” гэх тайлбар өгсөнд олон нийт ч нэлээд бухимдсан.

-ПРОКУРОР ДАВЖ ЗААЛДАХ ШАТНЫ ШҮҮХИЙН ШИЙТГЭХ ТОГТООЛЫГ ХҮЛЭЭН ЗӨВШӨӨРӨХГҮЙ ГЭЖЭЭ-

Гэтэл коронавирус дотоодод тарж, бүх нийтийн бэлэн байдал, хөл хорионоос болоод УИХ-ын экс гишүүн Б.Ундармаагийн ЖДҮ-ын хэрэг, “Капитал” банкны үрэгдүүлсэн 350 тэрбум төгрөгийн асуудал сураггүй болж, анхаарлын төвөөс гарсан байна.

Нийслэлийн прокурорын газраас түүний нийтийн албанд томилогдох эрхийг таван жилээс найман жил хүртэл хугацаагаар хасаж, арван мянган нэгжээс дөчин мянган нэгжтэй тэнцэх хэмжээний төгрөгөөр торгох, эсхүл хоёр жилээс найман жил хүртэл хугацаагаар хорих ял шийтгүүлэхээр яллах дүгнэлт үйлдсэн байдаг.

Тиймээс Нийслэлийн прокуророос оноохоор төлөвлөсөн ялыг нь хэрэгсэхгүй болгосон Давж заалдах шатны шүүхийн шийтгэх тогтоолыг хүлээн зөвшөөрөхгүй хэмээн Дээд шүүхэд эсэргүүцэл бичжээ. Шүүх шийдвэр гаргахдаа хууль зөрчсөн, хуулийг буруу хэрэглэсэн гэж үзвэл прокурор эсэргүүцэл бичих хуулийн заалттай юм.

-ДЭЭД ШҮҮХИЙН ШИЙДВЭРЭЭР Б.УНДАРМАА БУЦААД ХОРИГДОЖ Ч МЭДНЭ-

Тодруулбал Давж заалдах шатны шүүхийн шийтгэх тогтоолыг гардуулж өгснөөс хойш прокурор Эрүүгийн байцаан шийтгэх хуулийн 304 дүгээр зүйлийн 304.1-д заасны дагуу 14 хоногийн дотор эсэргүүцэл бичих хуулийн хугацаатай юм. Тэгэхээр Б.Ундармаад холбогдох хэргийн шийтгэх тогтоолд 11-р сарын дундуур прокурор эсэргүүцэл бичсэн байх нь. Гэхдээ прокурорын эсэргүүцлийг үндэслэлгүй гэж үзвэл дээд шатны прокурор буцаан авч болох аж.

Прокурор эсэргүүцэл бичсэнээр шийтгэх тогтоолын биелэлтийг түдгэлзүүлдэг. Өөрөөр хэлбэл Дээд шүүх прокурорын эсэргүүцлийг хэрхэн хүлээж авахаас шалтгаалж, тэр хүртэл Б.Ундармаад давж заалдах шатны шүүхээс оногдуулсан 40 саяар торгох болон суллах шийдвэр нь хэвээр үргэлжилнэ гэсэн үг.

Прокурорын эсэргүүцэл бичсэн хэргийг Дээд шүүх буюу хяналтын шатны шүүх хуралдаанаар хэлэлцэнэ. Прокурор эсэргүүцэлдээ анхан шатны шүүхийн шийдвэрийг хэвээр үлдээ гэсэн үү, эсвэл давж заалдах шатны шүүхээр дахин хэлэлцүүл гэсэн үү гэдгээс шалтгаалж Дээд шүүх энэхүү хэргийг шийдвэрлэх нь.

Энэ мэдээнд таны өгөх үнэлгээ

Хуваалцах Жиргэх