Монголоо “тонож”, харьд зугтаагсад

Өнөөдөр хэн хамгийн жаргалтай байна гээч. Эх орондоо эрх дураараа амьдарч буй монгол хүн. Хэн жаргалгүй байна гээч. Эх орноо “тонож, дээрэмдээд” гадагшаа зугтаагсад. УИХ-ын гишүүн асан С.Жавхлан “Өчигдөрхөн салхины дээр туг барьж, төрийн тамга атгачхаад даналзаж явсан хүмүүс өнөөдөр хулганы гөлчгийнөөс долоон дор болчихсон, орох оготны нүх ч олдохгүй харьд зугтаагаад явж байна” хэмээн тун ч оновчтойгоор бичсэн байх юм.

-ОНГОЦООР БИШ "УАЗ-469”-ААР ЗУГТСАН Т.БАДАМЖУНАЙ-

МАНАН бүлэглэлийн гол зохион байгуулагч гэгддэг Т.Бадамжунайгийн зөвшөөрөлгүй томилгоо, тендер, ер нь юу байдаггүй гэлцдэг байсан цаг саяхан. Энэ хүн өдгөөгөөс хоёр жилийн өмнө 2018 онд "УАЗ-469” машинаар хил даван зугтсан байдаг. Тэрбээр онгоцоор нисэх гавъяа хийгээгүйгээ ухаарч, хоёр гартаа гав зүүлгэхээсээ урьтаж ийн нууцаар хил давсан гэлцдэг. Учир нь тэр 2016 онд МАН-ын Засгийн газар бүрдсэний дараахан маш яаралтай эхлүүлсэн "Max, сүүний анхдугаар аян” -ы хүрээнд зарцуулагдах байсан олон тэрбум төгрөгийг албан тушаалаа ашиглан нөлөөлж, нэр бүхий компанийн захиралд өгсөн хэргээр шалгагдаж эхэлсэн юм. Түүнчлэн 2013 оны хоёрдугаар сард Хөдөө, аж ахуйн сайд байхдаа ЖДҮХС-гийн хүрээнд 2012 оны төсөвт тусгасан 500 сая төгрөгийг зориулалтын дагуу зарцуулаагүй гэсэн асуудлаар хэрэг үүсгэн АТГ-аас шалгаж байсан юм.

-ЭХНЭР, ХҮҮХДЭЭ ДАГУУЛАН ЭРГЭЖ ИРЭХГҮЙГЭЭР ЗУГТСАН Ч.САЙХАНБИЛЭГ-

Монгол Улсын Ерөнхий сайд асан Ч.Сайханбилэг. Нүүрний баясгалан сайтай Ерөнхий сайд аснаа Монгол Улсаа “худалдсан” байж болзошгүй хэрэгт холбогдоод хил даван зугтана чинээ санасангүй явлаа.

Дубайн гэрээг үзэглэхдээ албан тушаалын байдлаа ашиглаж, бусдад давуу эрх олгосон хэмээн шалгуулж байсан тэрбээр 2018 оны дөрөвдүгээр сард баривчлагдаж, Шүүхийн шийдвэр гүйцэтгэх ерөнхий газрын харьяа Урьдчилан хорих 461-р ангид нэг сар саатуулагдсан байдаг. Ингээд цагдан хорионы хугацаа нь дуусмагц шүүхээс түүнийг батлан даалтад гаргаж хийлийн хориг тавьсан. Гэвч тэрээр хил давах арга саам сүвэгчилсээр эрүүл мэндийн ноцтой шалтгаан хэлж, шүүхээс зөвшөөрөл аван эмчилгээ хийлгэх нэрээр хил гарчихсан. Гэвч эргэж ирээгүй, тэндээ “шингэсэн”. Энэ хүн хил давахдаа анхнаасаа эргэж ирэхгүйгээ мэдэж байсан бөгөөд, эхнэр, хүүхдүүд нь ч мөн хамт явж, тэндээ суурьшицгаажээ.

-БУРХАН БАГШИД НҮГЛЭЭ НАМАНЧЛАХ ӨДРӨӨР АМРАХ ХУУЛЬ БАТЛУУЛСАН ГИШҮҮН ХИЛ ДАВАН ЗУГТСАН НЬ-

УИХ-ын гишүүн асан Д.Оюунхорол нөхрийнхөө хамт хил даван “зугтаад” 4 сар өнгөрч байна. Тэрбээр хөл хорионы ид дуулианы үеийг далимдуулж Хонгконг руу ниссэн тусгай үүргийн онгоцоор хил гарч явсан байдаг. АТГ-аас түүнийг  Байгаль Орчин, ногоон хөгжил, аялал жуулчлалын сайдаар  ажиллаж байх хугацаандаа эрх мэдэл, албан тушаалаа урвуулан ашиглаж, бусдад давуу эрх олгон улсын төсөвт хоёр тэрбум орчим төгрөгийн хохирол учруулсан үндэслэлээр Эрүүгийн хэрэг үүсгэн шалгаж байсан. Улмаар яллагдагчаар татах хүсэлтээ прокуророос гаргаад байсан юм. Иргэдээ нэг өдөр ч болов хийсэн гэм нүглээ бурханд наминчилж, бодол санаагаа цэгцэлж, залбирах боломж олгож, Бурхан багшийн их дүйчин өдрөөр бүх нийтээр амрах хуулийн төсөл батлуулж чадсан, “унтаахай” хочит гишүүн маань ийнхүү хил даван одсонд итгэхэд бэрх шүү.   

 -МОНГОЛЫН ХУВЬ ЗАЯАГ ШИЙДЭХ ТӨСӨЛ ГЭРЭЭЛЧХЭЭД АЛГА БОЛСОН САЙД АСАН-

Эрдэс баялаг, эрчим хүчний сайд асан Оюутолгойн гэрээг батлахад голлох үүрэг гүйцэтгэсэн Д.Зоригт. Энэ хүн 2012 оноос хойш гадагшаа гараад сураггүй, таг болсон. Тэр 2012 оны УИХ-ын сонгуульд өөрөө болон нам нь “унасны” дараагаас гадагшаа явах мөрөө хөөсөн. Уг нь Оюутолгойн гэрээтэй холбоотой асуудлаар өдгөө хоригдчихоод байгаа томчуудтай хамт шоронд байж байх ёстой хүн. Монголын эдийн засагт томоохон үүрэгтэй төслийг удирдаж, гэрээлчхээд огт юу ч болоогүй юм шиг алга болсон нь муухай. Түүнийг эх орноо “худалдсан” гэх хэргийнхээ төлөө хэзээ нэг цагт баригдахаа мэдээд оргон зайлсан гэж хэвлэлүүд бичдэг. Харин тэр өөрийгөө АНУ-руу сурахаар явсан учраас намайг буруутгаж, яллах хэрэггүй хэмээн хариу барьж байсан санагдана. Оюутолгойн ордын гэрээнээс идээд  барахгүй их мөнгө халааслаад алга болсон гэх олны хардлагыг үгүйсгэж байсан бол энэ хүн эх орондоо байх байлаа. Гэвч одоо алга.

Монголын хууль хяналтынхан гэвч өдийг хүртэл яаж ч чаддаггүй, тэднийг авч ирэх хүч нь хүрдэггүй. Албаныхаа цахим хуудаст интерполоор эрэн сурвалжилж байна гэсэн зар байршуулсан болоод хаядаг нь нууц биш. Харин “ял завшсан” тэд Монгол Улсыг “зарж үрж” олсон мөнгөөрөө туйлж, гадаадын тансаг хауст товхиноод удлаа. Гэхдээ хамгийн харамсалтай нь тэд эх орон, элгэн садандаа эргэн ирж, эрхлэн хөрвөх нүүргүй болж дээ.

Энэ мэдээнд өгөх таны үнэлгээ

Хуваалцаарай Жиргээрэй