О.Баасанхүү: Б.Батзориг буруугүй, намынхаа генсекийн заавраар ЖДҮХС-гийн зээлийг олгосон

УИХ-ын гишүүн О.Баасанхүү ЖДҮХС-гийн зээлийн талаар өнөөдөр сэтгүүлчдэд мэдээлэл өглөө.

Тэрбээр ” Б.Батзориг уг нь буруугүй шүү дээ. Намынхаа үүрэг даалгаврыг биелүүлээд, намынхаа ерөнхий нарийн бичгийн дарга нь тушаал өгч хийлгүүлсэн.

Намынхаа генсекийн заавар, зөвлөгөөгөөр хийсэн гэж ойлгоод байгаа. Засгийн газрын ч захиалгаар хийсэн. Тэгээд яагаад сайдаас дээших албан тушаалтнууд нь хариуцлага хүлээдэггүй юм.

ЖДҮХС-тай холбоотойгоор 114 хэрэг нээгээд мөрдөн шалгах ажиллагаа явуулсан. 2016 оноос өмнөх асуудлыг ЦЕГ, үүнээс хойшихыг АТГ, ЦЕГ-ын хамтарсан ажлын хэсэг шалгаж байгаа юм байна. Шалгахад 38.2 тэрбум төгрөгийн санхүүжилтийг зориулалтын бусаар ашигласан. Мөрдөн шалгах явцад 3.3 тэрбумыг нөхөн төлүүлж, 20 аж ахуйн нэгжийн дансыг битүүмжилж, 2.3 тэрбумын зарцуулалт тодорхойгүй алга болсон байна гэсэн байгаа юм. 

Мөн иргэн аж ахуйн нэгжид барьцаалан зээлдүүлэх үйлчилгээ үзүүлж байсан. Банк бус санхүүгийн байгууллага, хадгаламж зээлийн хоршоотой 34 аж ахуйн нэгж байна. 11 нь албан тушаалтантай буюу Их хурлын гишүүдтэй хамаарал бүхий байгаа юм. Үүнээс мөнгө угаасан найман удаагийн үйлдэл тогтоогдсон байна ” гэсэн юм.

Г.ИТГЭЛ

Энэ мэдээнд таны өгөх үнэлгээ

Хуваалцах Жиргэх