ДАТА: Ц.Анандбазар хоёр компаниараа 187 тендерт ялж, 123.3 тэрбум төгрөгийг төрөөс авчээ

Булган аймгаас сонгогдсон УИХ-ын гишүүн Ц.Анандбазар 2020 оны ХОМ-тээ 10 компанид хувьцаа эзэмшдэг гэж мэдүүлсэн байдаг. Эдгээрийг дурдвал:

• “Содмонгол групп” ХХК
• “Мэргэван” ХХК
• “Алханатрейд” ХХК
• “Шинэсоёмбо” ХХК
• “Эс эм жи ойл энд газ” ХХК
• “Сайншанд рефайнери” ХХК
• “Штс” ХХК
• “Бэрс дизайн” ХХК
• “Содмонгол газ” ХХК
• “Эрдэнэт-Ойл” ХХК-иуд болно.

Эдгээр компаниуд бүгд Улсын бүртгэлийн нээлттэй мэдээллийн санд бүртгэлтэй байна. Харин Ц.Анандбазар нь “Содмонгол групп”, “Алханатрейд” компаниудад өөрийн нэрээр хувьцаа эзэмшигч гэж бүртгүүлжээ. Бусад компаниуд нь Ц.Анандбазарын биш дээрх хоёр компанийн аль нэгнийх нь нэр дээр бүртгэлтэй байдаг аж.

-10 КОМПАНИАС ХОЁР НЬ ТЕНДЕРИЙН ТҮҮХТЭЙ-

“Содмонгол”, “Алханатрейд” компаниуд нь 2007 оны тавдугаар сард үүсгэн байгуулагдсан. Хоёул шатахуун болон гадаад худалдааны чиглэлээр үйл ажиллагаа явуулдаг.

УИХ-ын гишүүн Ц.Анандбазарын дээрх 10 компани ямар ямар тендерт оролцож бас шалгарч байсныг тендерийн нээлттэй мэдээллийн сангаас шүүлээ. Ингэхэд зөвхөн “Содмонгол групп” ХХК ба “Мэргэван” ХХК-иудын түүх гарч ирж байна. “Алханатрейд” нь тендерүүдэд оролцож байсан ч шалгарсан удаагүй аж. Үлдсэн долоон компани нь тендер шалгаруулалтад огт орж байгаагүй бололтой.

-“СОДМОНГОЛ ГРУПП” ХХК 122,963,626,440 ТӨГРӨГИЙН 186 ТЕНДЕРТ-

“Содмонгол групп” ХХК 2014 оноос хойш нийт 597 тендерт оролцож байжээ. Эдгээрийнх 186-д нь шалгарсан байдаг юм байна. Энэ 186 тендерээр нийт 122 тэрбум 963 сая 626 мянга 440 төгрөгийг төрөөс авчээ.

“Содмонгол групп”-ийн хувьд сүүлийн жилүүдэд тендерт шалгарах давтамж нь илт олширч ирсэн дүр зурагтай харагдаж буй.

-“МЭРГЭВАН” ХХК 326,700,000 ТӨГРӨГИЙН НЭГ ТЕНДЕРТ-

Харин “Мэргэван” ХХК мөн 2014 оноос хойш нийт долоон тендерт оролцсоноос нэгт нь шалгарсан гэсэн тэмдэглэгээ хийгдсэн байна. Уг тендэрээр 326 сая 700 мянган төгрөгийг төрөөс авчээ.

Дээрх бүх 187 тендерээр Ц.Анандбазарын хоёр компани нийтдээ 123 тэрбум 290 сая 326 мянга 440 төгрөгийг төрөөс авсан байна.

Тэмдэглэл: www.tender.gov.mn сайт дахь холбогдох жагсаалтаас "Шалгарсан” гэсэн ногоон тэмдэглэгээтэй тендерүүдийг түүж, дээрх мэдээллийг бэлтгэв.

Уг нь системийн "Шалгарсан эсэх” гэсэн цэсийг сонгон шүүвэл ногоон тэмдэглэгээгүй тендерүүд ч мөн гарч ирж байгаа юм. Өөрөөр хэлбэл систем өөрөө ногоон тэмдэглэгээгүй зарим тендерүүдийг шалгарсанд тооцон шүүж, үзүүлсэн гэсэн үг. Гэвч тэдгээр лүү орж танилцвал: Дотроо тус компани шалгарсан талаар тэмдэглэсэн ч хэдэн төгрөгөөр гэрээлсэн нь тодорхойгүй, эсвэл бүр ямар компани шалгарсан талаар огт мэдээлэлгүй зэрэг дутагдалтай байсан тул орхив. Оруулсан бол гарчиг дахь 187 гэдэг тоо 245 болж өсөх байсан.

“Содмонгол групп” ХХК-ийн тендерийн түүхтэй энд, “Мэргэван” ХХК-ийнхтай энд дарж танилцана уу.

СЭТГҮҮЛЧИЙН ТЭМДЭГЛЭЛ: УИХ-ын гишүүн Ц.Анандбазарт холбогдох асуудал нийгмийн анхаарал татах сэдэв болоод байна. Ийм учраас улсын тэргүүн бизнесмэнүүдийн нэг түүний компаниудын тендерийн түүхийг сонин болгож бэлтгэлээ. Мэдээлэл жирийн иргэн бүр орж танилцах боломжтой нээлттэй цахим мэдээллийн дата санд үндэслэн бэлтгэгдсэн гэдгийг дахин тэмдэглэе.

Энэ мэдээнд өгөх таны үнэлгээ

Хуваалцаарай Жиргээрэй