“Монголтелевиз” ХХК “Юнивишн”-ээс “АЙЖ”, ШӨХТГ-т гомдол гаргажээ

“Гацуурт”-ын Л.Чинбат, Соёлын сайд Ч.Номингийн хамаарал бүхий “Монголтелевиз” ХХК ШӨХТГ-ийг хийх ёстой ажлаа хийхгүй байна хэмээн шүүхдэлцэж байгаа аж. Тодруулбал Монголд анх удаа IPTV, интернэт, суурин утасны гурвалсан үйлчилгээг нэвтрүүлсэн, “Юнител” группийн харьяа компани “Юнивишн” ХХК-ийг IРТV буюу гурвалсан үйлчилгээний зах зээл дээр давамгай байдалтай аж ахуй нэгжээр тогтоолгох нэхэмжлэл ШӨХТГ-т гаргажээ.

Ингэхдээ “Юнивишн” ХХК-ийг IРТV буюу гурвалсан үйлчилгээний зах зээл дээр давамгай байдалтай аж ахуй нэгжээр тогтоогдоогүйгээс болж бусад аж ахуй эрхлэгч зах зээлд гарч ирэхэд саад учруулах, тэдгээрийг зах зээлээс шахан гаргах зорилгоор бараа бүтээгдэхүүнээ бодит зардлаас доогуур үнээр борлуулах, бараа бүтээгдэхүүнд үндэслэлгүйгээр хэт өндөр үнэ тогтоох, зохиомлоор тухайн бараа бүтээгдэхүүний хомсдол бий болгох, бараа бүтээгдэхүүний үйлдвэрлэл, борлуулалтыг зогсоох, хэмжээг хязгаарлах зэргээр өрсөлдөөнд харш үйл ажиллагаа явуулах боломж бүрдээд байна хэмээсэн байна.

Гэвч ШӨХТГ-аас тэдний нэхэмжлэлийг биелүүлээгүй учраас ШӨХТГ-ыг эргүүлээд шүүхэд өгчээ.

“Монголтелевиз” ХХК нь телевизийн өргөн нэвтрүүлгийн үйлчилгээ эрхлэх эрх бүхий аж ахуй нэгж бөгөөд өөрийн “Монгол HD” сувгийг Олон сувгийн дамжуулах үйлчилгээ эрхлэгчидийн сүлжээгээр дамжуулан нийт хэрэглэгч, үзэгчидэд хүргэдэг билээ. Улмаар Ori стрийминг буюу OTT үйлчилгээг нэвтрүүлсэн. Тус үйлчилгээгээр зөвхөн “MongolHD” сувгаар гардаг кино контентууд үздэг. Үзэгчдийн хамгийн түгээмэл үздэг контент нь “The Voice of Mongolia” байсан бол сүүлд “Ододтой бүжиглэе шоу” болоод буй. Давуу тал нь бүх төрлийн төхөөрөмжүүд дээр үзэх боломжтой.

-ДАВАМГАЙ БАЙДАЛТАЙ АЖ АХУЙ НЭГЖ НОЁЛОХ БАЙДЛАА ХУУЛЬ БУСААР АШИГЛАВАЛ ӨНДӨР ТОРГУУЛЬ ТӨЛНӨ-

А компани Б компанийг давуу байдалтай аж ахуй нэгжээр тогтоолгох нь ямар ашигтай вэ. Тухайлбал Б компани давамгай байдалтай аж ахуй нэгжээр тогтоогдчихсон байлаа гэж бодъё. Энэ тохиолдолд Өрсөлдөөний тухай хуулийн долдугаар зүйл буюу Давамгай байдлаа хууль бусаар ашиглах боломжгүй болно. Өөрөөр хэлбэл,  үнээ өөрийнхөөрөө хэт өндөр тогтоох, манайхаас өөр газар байхгүй юм чинь гэх хандлагаар үйлчилгээг нь хязгаарлах ч юм уу, үнэ нэмэх, зохиомол хомсдол үүсгэх, үгсэн хуйвалдаж үнэ тогтоох гэх мэт үйлдлүүдийг хориглоно гээд заачихсан байна. Улмаар дээрх үйлдлүүд хийхдээ ШӨХТГ-аас хамааралтай, зөвшөөрөл авдаг болно гэсэн үг аж.

Түүнчлэн давамгай байдалтай аж ахуй нэгж дээрх хуулийн заалтад хориглосон төрлийн үйл ажиллагаа явуулвал өндөр торгуультай байдаг аж.

Жишээ дурдахад саяхан ШӨХТГ-аас “Хүчит шонхор” захыг 20 сая төгрөгөөр торгосон. Тус зах давамгай байдалтай аж ахуй нэгжээр тогтоогдсон байдаг бөгөөд давуу байдлаа ашиглаж ноёлох үйл ажиллаага явуулж, Өрсөлдөөний тухай хуулийн долдугаар зүйлийг зөрчсөн учраас бүтэн жилийн борлуулалтын орлогын дөрвөн хувиар торгосон юм.

-“МОНГОЛТЕЛЕВИЗ” ХХК, “ЮНИВИШН” ХХК-ИЙН ХЭРЭГЛЭГЧ БОЛОХООС ӨРСӨЛДӨГЧ БИШ ГЭЖ ШҮҮХЭЭС ҮЗЖЭЭ-

“Монголтелевиз” ХХК-ийн эл нэхэмжлэлийн анхан болон давж заалдах шатны шүүхийн шийдвэр ШӨХТГ-ийн талд гарсан байдаг. Өөрөөр хэлбэл Юнивишн ХХК-ийг IРТV буюу гурвалсан үйлчилгээний зах зээл дээр давамгай байдалтай аж ахуй нэгжээр тогтоогоогүй нь ШӨХТГ-ийн зөв гэж шүүхээс үзсэн.

Тодруулбал, “Монголтелевиз” ХХК нь Харилцаа холбооны зохицуулах хорооноос авсан телевизийн сувгийн үйлчилгээний тусгай зөвшөөрөлтэй. Харин “Юнивишн” ХХК нь олон сувгийг дамжуулах үйлчилгээний тусгай зөвшөөрөлтэй. Тиймээс эдгээр компаниуд нь зах зээлд шууд өрсөлдөгч аж ахуй нэгж биш. Нэг нь нөгөөгийнхөө хэрэглэгч юм. Тиймээс “Монголтелевиз” ХХК-ийн ашиг сонирхол зөрчигдөж байгаа зүйлгүй гэж үзжээ.

Харин Дээд шүүхээс анхан болон давж заалдах шатны шүүхийн шийдвэрийг хэрэгсэхгүй болгож, анхан шатны шүүхэд хэргийг буцаажээ. Тэгэхээр анхан шатны шүүхээс хэргийг дахин хэлэлцэхдээ “Монголтелевиз” ХХК-ийн нэхэмжлэлийн шаардлагыг хүлээж авч мэдэх л юм.

Б.ЦЭЛМЭГ

Энэ мэдээнд таны өгөх үнэлгээ

Хуваалцах Жиргэх