Ерөнхийлөгчийн хуурай дүүгийн “самарсан” ИНЕГ-ыг өөр нэг нутгийн дүүд нь ДААТГАХ УУ

Манай улсын Иргэний нисэхийн салбар амжилттай байна, Шинэ нисэх онгоцны буудлаа ашиглалтад оруулчихлаа, дэлхийн стандартад хүрлээ гэж та бүхэн бодож байна уу. Гэтэл энэ бүхний цаана юу өрнөж байгаа бол.  

Олон олон асуудал, хэрэг төвөг нь ил болсон ч дээд хүмүүсийн нөмөр нөөлөгт байдаг учраас удаан тэсэлцсэн ИНЕГ-ын дарга Л.Бямбасүрэн арайхийж албан тушаалаа өгөөд алга боллоо. Ингэхдээ эрүүл мэндийн шалтгаанаар гэж өөрийгөө уснаас цэвэрхэн авч гарсан гэх. Ямар ч шалтаг тоочсон түүний явах цаг аль хэдийн болчихсон байв. Гэвч Ерөнхий сайд нь ч, салбарын сайд нь ч тэр нэг л халдаж зүрхлэхгүй байсаар маш их хугацаа алдсан.

-ХУУЧИН НИСЭХ БУУДЛЫГ ХӨСӨР ХАЯЖЭЭ-

Харамсалтай нь энэ хугацаанд ИНЕГ эзэнгүйдээд тун ч удсан байжээ. Учир нь “Би угаасаа явах юм хойно” гэх сэтгэлтэй Л.Бямбасүрэн олон сар, жилийн өмнөөс ИНЕГ-ын удирдлагын ажлыг гаргуунд нь гаргаж хаясан байсан гэх.

Уг нь Засгийн газрын 455-р тогтоол гарч, хуучин нисэх буудлыг нөөц нисэх буудлын болон сургалт, захиалгат, онцгой, тусгай үүргийн нислэг, агаарын хөлгийн засвар, иргэний нисэхийн бусад үйл ажиллагаанд ашиглахаар шийдвэрлэсэн. Гэтэл эх сурвалжийн мэдээлж буйгаар эл нисэх буудлын аэродромын гэрчилгээжүүлэлт гацаж, аюулгүй ажиллагаа нь алдагдаж, эрхзүйн чадамжгүй болсон гэнэ.

Хамгийн хачирхалтай нь үүний цаана хувьчлалын сонирхол байгаа юм биш биз гэх хардлага буй юм. Учир нь 520.3 га эзэмшил газартай 9.5 зм урт бетон хашаатай энэ аварга дэд бүтцийг дээрх ашиглалтын нөхцөлөөр ашиглахгүй байснаар цаг хугацааны явцад дампуурч, төрд тээг болж байна гэгдэнэ. Энэ үед хувьчлалын давалгаа эхлэх вий гэсэн айдас.

-ИНЕГ ДОТРООС ДАРГА БОЛГОХООР ЯРЬЖ БУЙ ХҮМҮҮС ХАМТ ОЛОНДОО НЭР ХҮНДГҮЙ, МУУ НЭРТЭЙ -

Тиймээс Ерөнхий сайд Л.Оюун-Эрдэнийн дараагийн томилгоо хэн байхаас энэ салбарын ирээдүй шийдэгдэх болоод буй гэсэн үг болж байна. ИНЕГ-ын дарга асан Л.Бямбасүрэнгийн дараа түүний ажлыг түр орлон гүйцэтгэгчээр дэд дарга байсан Алтанцомыг томилоод буй. Тэрбээр хөдөлгөөний диспетчерээр ажлын гараагаа эхэлснээс хойш иргэний нисэхийн салбарт тасралтгүй 32 дахь жилдээ ажиллаж буй нэгэн.

Нэмэгдэхүүний байрыг солиод ч нийлбэрийн чанар өөрчлөгдөхгүй гэгчээр Л.Бямбасүрэнг Б.Алтанцомоор солилоо ч ИНЕГ-ын байдал дээрдэхгүй. Тэрбээр Л.Бямбасүрэнгээсээ дутахааргүй асуудал дагуулагч нэгэн юм.

Түүнийг анх ИЗНН-ын С.Оюун анкетыг нь сугавчлан явж хөөцөлдсөөр ИНЕГ-т оруулсан гэгддэг. Тэр цагаас хойш тус байгууллагад удаж, элдэв асуудалд холбогдсоор асар нэр хүнд муутай болсон дарга нарын нэг. Хөшигний ард Б.Алтанцомын эхнэр нь ЗГХЭГ-ын дарга Ц.Нямдоржийн хамаатан тул гүйцэтгэгчээс дарга болгож жинхлүүлэхээр зүтгүүлж байгаа гэх шуум бий.

Б.Алтанцомоос гадна ИНЕГ дотроосоо хэдэн хүний нэр даргад яригдаж буй гэх юм билээ. Гэвч мөн л хамт олондоо нэр муутай, байгууллагадаа хэт удсан, сайн мууг нь бүгдийг мэдэх, “зохицуулж” гаршсан хүмүүс гэх.

-ИНЕГ-ЫН ДАРААГИЙН ДАРГА НЬ БАС ХЭНТИЙНХ БАЙХ УУ-

Гэтэл эх сурвалжийн мэдээллээр тус байгууллагын даргад дахин нэг залуугийн нэр яригдах болсон нь Г.Бат гэх залуу. Тэрбээр шинэ нисэх буудлын төслийн удирдагч Н.Энхбатын доор ажиллаж байсан нэгэн аж. Хачирхалтай нь мөн л Хэнтий нутгийнх. Таван жил ажиллаж, хэл ам татлуулсаар ажлаа өгсөн өмнөх дарга Л.Бямбасүрэн мөн л Хэнтийнх билээ. Ерөнхийлөгч У.Хүрэлсүхийн хуурай дүү гэгддэг түүнд хэн ч халдаж чадахгүй, өнөөх нь эрхтэн дархтнуудын халхавчинд даварч суусаар өдий хүрсэн нь тэр.

Гэтэл түүний халааг авах магадлалтай залуу нь мөн л Ерөнхийлөгч, Ерөнхий сайд, Л.Бямбасүрэн нарын нутаг нэгт залуу байгаа нь анхаарал татаж байна. Ийнхүү Ерөнхий сайд Л.Оюун-Эрдэнийн хувьд нутаг ус, жалга довоо харж, нутгийнхаа залууг даргаар тавих бодол тээж яваа гэх. Нутаг нуга харж явж, даргаар тавьсан хуурай дүү нь таван жил шахам “самарсан” ИНЕГ-ыг дахиад нэг нутгийн хуурай дүүдээ даатгах нь зөв үү. Асуудалтай даргаа авчихаад дахиад нутаг нуга харсан Ерөнхий сайдын томилгоогоор ИНЕГ-ыг толгойлуулах уу.

-НУТАГ НУГА БИШ ЧАДВАР, СЭТГЭЛИЙГ НЬ ХАРНА УУ ЕРӨНХИЙ САЙД АА-

Л.Оюун-Эрдэнэ хамгийн залуу Ерөнхий сайдаар сонгогдсон. Түүний шинэчилье, өөрчилье, засъя, залруулъя гээд байгаа нь сайн жишиг. Тиймээс өөрийн гэсэн толгойгоор, асуудалд бодитоор хандаж, энэ том айлд мэргэжлийн, чадвартай, залуу боловсон хүчнүүдээ томилоод, ИНЕГ-ыг арилжааны утгаар нь ажиллуулах хэрэгцээ шаардлага үнэхээр үүсээд байна.

Одоо бол энэ салбар тань мөнгө угаадаг, улс төрчдийн гар хөлийг цайлгаад аргалчихдаг агентлаг болж хувираад буй.

“Би явах нь тодорхой” гэсэн хөндий сэтгэлээр удаан ажиллаж байгаад хаяад явсан Л.Бямбасүрэнгийн гайгаар Иргэний нисэхийн салбарын ажил эзэнгүйдээд удлаа. Ингэсээр байтал энэ том чухал агентлаг сүйдэх нь. Мэргэжлийн, чадварлаг хүнийг нь томилоод өгөөч Ерөнхий сайд аа.

Энэ мэдээнд өгөх таны үнэлгээ

Хуваалцаарай Жиргээрэй