УЛС ТӨР

Ерөнхийлөгч У.Хүрэлсүхийг Казахстан улсад албан ёсоор айлчлахыг урив

Гадаад харилцааны сайд Б.Батцэцэг Бүгд Найрамдах Казахстан Улсад хийж буй албан ёсны айлчлалынхаа хүрээнд тус улсын Ерөнхийлөгч Касым-Жомарт Токаевт бараалхсан байна.

Уулзалтын үеэр Казахстан Улсын Ерөнхийлөгч К-Ж.Токаев Монгол Улс нь Казахстаны найдвартай стратегийн түнш гэж онцлоод манай хоёр ард түмэн түүхэн нягт холбоотой. Хоёр улс олон улсын тавцанд харилцан бие биеэ дэмждэг сайхан уламжлал тогтсонд сэтгэл хангалуун байгаагаа илэрхийлжээ.

Мөн Ерөнхийлөгч К-Ж.Токаев Монгол Улсад казах үндэстнүүд нь өөрийн хэл, соёл, ёс заншлаа хадгалахад маш таатай нөхцөлд оршин суудагт Монгол Улсын төр засаг, монголын ард түмэнд гүн талархал илэрхийлж, Монгол Улсын Ерөнхийлөгч У.Хүрэлсүхийг Казахстан Улсад албан ёсоор айлчлахыг урьсан байна.

Ирэх 2022 онд хоёр улсын хооронд дипломат харилцаа тогтоосны 30 жилийн ой тохиож байгаатай холбогдуулан энэхүү ойг ёслол төгөлдөр тэмдэглэх талаар талууд санал солилцов.

Мөн худалдаа, хөрөнгө оруулалт, эдийн засгийн хамтын ажиллагаа нь хоёр орны нөөц бололцоог бүрэн дүүрэн ашиглаж чадахгүй байгааг дурдаад цаашид энэхүү салбарын харилцан ашигтай хамтын ажиллагааг урагшлуулах талаар санал солилцож, ялангуяа худалдаанд саад бэрхшээл учруулж буй тээвэр логистикийн асуудалд анхаарч ажиллахаар боллоо гэж Гадаад харилцааны яамнаас мэдээллээ.

Энэ мэдээнд өгөх таны үнэлгээ
Like
Love
Haha
Wow
Sad
Angry
Таг

Холбоотой мэдээ

Хариулт үлдээх

АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.

Back to top button