Африкт коронавирусийн халдварын улмаас нас барсан хүний тоо өмнөх долоо хоногоос 72 хувиар өссөн гэж ДЭМБ-ын долоо хоног тутмын тайланд дурджээ.
Харин дэлхий даяар “КОВИД-19”-ийн халдварын улмаас нас барсан хүний тоо өнгөрсөн долоо хоногтой харьцуулахад дөрвөн хувиар буурчээ. Энэ үзүүлэлт Зүүн өмнөд Азид 9 хувь, Америкт 7 хувиар тус тус өссөн байна. Дэлхийн бусад орнуудад “КОВИД-19”-ийн халдварын улмаас нас барсан хүний тоо буурсан байна.
Долоо хоногт дэлхий даяар нийтдээ 44.6 мянга орчим хүн “КОВИД-19”-ийн улмаас нас бараад байна. ДЭМБ-ын мэдээлснээр арванхоёрдугаар сарын 20-ноос арванхоёрдугаар сарын 26-ныг хүртэлх долоо хоногийн хугацаанд дэлхийн хэмжээнд коронавируст халдварын 5 сая орчим шинэ тохиолдол бүртгэгдсэн гэж мэдэгдлээ.
Хамгийн их голомттой нь Америк тив байна. Тэнд халдварын тохиолдол 39 хувиар нэмэгджээ. Мөн Африкт халдварын шинэ тохиолдлын тоо долоон хувиар нэмэгдсэн байна. Бусад бүс нутагт халдварын тохиолдол долоо хоногт буурсан эсхүл бараг өөрчлөгдөөгүй хэвээр байна. Өнгөрсөн долоо хоногт дэлхийн хэмжээнд “КОВИД-19”-ийн халдвар өмнөх долоо хоногтой харьцуулахад 11 хувиар өсжээ.
Цар тахлын нийт хугацаанд дэлхийн хэмжээнд коронавирусийн халдварын 282.8 сая гаруй тохиолдол бүртгэгдэж, халдварын улмаас 5.4 сая гаруй хүн нас бараад байгаа юм.
(Эх сурвалж: Tass)
АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.