Уригдаж ороод "хөөгдөж" гарах өвгөн сайд

Төрд нэг улаан хэрүүлч хүн байснаа гэнэт тэр нь дуугүй болчихоор гайхдаг ажээ. Тэр гайхшруулалтын эзэн бол Ц.Нямдорж. Ил ингэж чимээгүй болсон ч далд хамгийн хортой нь байжээ.

Улс төрийн үүх түүхээрээ Н.Энхбаяр, С.Баяр, М.Энхболд, С.Батболд, У.Хүрэлсүх, Л.Оюун-Эрдэнэ гээд МАН-ын үе үеийн томчуудад тэр хэзээ ч тал алдаж байсангүй. Олон нийтдээ ч яаж ийгээд таалагдах эв голдрилоо олсоор ирсэн. Насаараа шахам төрийн ордонд тухалсан тэрбээр Эрдэнэтэд ялагдсаныхаа дараа ч энэ хавиасаа явчхаж төвдөөгүй. Төрийн ордонд У.Хүрэлсүхийн зөвлөх нэрээр нэг өрөө эзэлж хэсэг суусан.

Л.Оюун-Эрдэнэд ч Ц.Нямдорж өмөг түшигтэй, сайн зөвлөгч, ирлэж өгдөг ах нь юм шиг явсан үе бий. Учир нь, тэдний ярьдаг, олон нийтэд попордог сэдэв нэг байв. Тэд Т.Чимгээ, Б.Содномдаржаа нарыг суллуулах, “Эрдэнэт үйлдвэр”-ийн 49 хувийн асуудал дээр “нэг хоолойтой” байсан. Тэр ч утгаараа залуу Ерөнхий сайд танхимаа бүрдүүлэхдээ Ц.Нямдоржийг “түшигтэй” гэдэг агуулгаар гал тогоогоо бариулав.

Өнөөх хашир нь харин Ерөнхийлөгчийн сонгуулиас өмнө Т.Чимгээ, Б.Содномдаржаа нарыг суллуулсныхаа дараа бүр нэг дуугаа хураачхаад байв. ЗГХЭГ дээр очоод, улам бүр нуугдан нугдайв. Яагаад Ц.Нямдорж дуугүй болчхов. Зурагтны удирдлага авч, буйдангийн араар орон, чимээгүй болсон хүү ямар нэгэн хэрэг тарьсан байдаг даа.

Яг түүн шиг “Эрдэнэт үйлдвэр”-ийн агуулгаа ч ярихаа болив. Хувь хүний өшөө хорслоо төрийн ажлаа ил гаргаж асгадаг байдлаа ЗГХЭГ-т очоод лав гаргасангүй. Тэр нэгэнт чимээгүй бүгчихсэн тул ЗГХЭГ-т ирдэг бүх галыг нэг бол Х.Нямбаатар үүрч, нөгөө бол Л.Оюун-Эрдэнэ өөрөө авч гардаг болов. Юун нөгөө өмөг түшиг болох. Нэг өвгөн сайд авчхаад, өнөөх нь уурлачихаар өмнүүр орж аргадах ажлыг хийсээр, танхим нь зутарсан дүр зураг харагддаг.

Хашир өвгөн сахал Д.Эрдэнэбилэгийн хүн Б.Долгион Ерөнхий сайдын зөвлөхөөр ирэхэд ч дуугарсангүй. Тангараг там тасарч явсан Ерөнхийлөгч асан Х.Баттулга засагт ойртоход ч асуудалгүй шадарлуулав. Бүр анх ЗГХЭГ дээр очихдоо Х.Баттулгад нэгэн цагт МАН-ын томчуудад тал засаж явсан шигээ сүжирч, эв горимыг нь олсон гэх яриа ч тасарсангүй.

Зундаа тэр баахан ууртай байж, “Засгаа задалчихна шүү” гэж Ерөнхий сайдаа айлгасан нь ил далд яригдсаар удав. Л.Оюун-Эрдэнийн ил цагаан хамгаалдаг Б.Болор-Эрдэнэ тэргүүтэй агентлагийн дарга нарыг хөшигний ард сайтар чангалахаа ч бас мартаагүй байна.

Эцэстээ Л.Оюун-Эрдэнийн танхимаа зайлшгүй задлах хамгийн чухал шалтгаанаар Ц.Нямдорж нэрлэгдсэн гэх.

МАН Их хурлынхаа дараа ТНБД нарыг сэлгэн томилох чиг барьсан ч Гадаад харилцааны яамны гал тогоог түшиж буй хүүгээ солиулахгүй гэж "гүрийжээ". Угийн хашир хүн учраас ТАЗ-өөс огт сонгон шалгаруулалт зарлагдахгүй үеэр зарлуулж томилогдсон тул энэ үедээ “хий”-гүй болж таарсан байна.

 Энэ мэтээр Засаг дотроо бүр нэг багтахаа байсан, нэг тийм бүрзгэрдүүхэн уур амьсгал бий болгогч нь яах аргагүй Ц.Нямдорж болжээ. Гэвч ЗГХЭГ-аас бүр ор хоосон жийгдчихийг тэр хүсэхгүй. ҮХЦ дээрх давхар дээлний маргааныг Ерөнхийлөгчөөр түр хойшлуулж, өөрөө цэцийн гишүүний суудал хүссэн гэх. Эрх баригч намын бүлгийн хурал дээр хаан заан шиг тачигнаж суудаг Ц.Нямдоржийн үгийг Д.Тогтохсүрэн тасалж, үл хүндэтгэсэн талаар ч хэвлэлүүд бичив. Ингэж урьж авчирсан хүнээ явуулахын түүс болж, ужгирсан улсуудаасаа салахын тулд тогтолцоогоо өөрчлөхөд хүрсэн нь Л.Оюун-Эрдэнийн хамгийн том алдаа гэлтэй.

Г.ИТГЭЛ

Энэ мэдээнд өгөх таны үнэлгээ

Хуваалцаарай Жиргээрэй