У.ХҮРЭЛСҮХИЙН ШАХАЛТ: “Эдгээр сайд нарыг чөлөөлбөл ПАРЛАМЕНТЫН ГАДНААС томилгоог хий”

Эрх баригч намын залуу үеийнхэн Л.Оюун-Эрдэнийг МАН-ын даргаар батламжилсныхаа дараа ҮХЦ дээрх давхар дээлний агуулгыг түргэвчилж, засгаа сэлгэн томилохоор нэгдээд байсан. Гэвч шинэ оны өмнөхөн товлогдсон ҮХЦ-ийн маргаан хойшилж, өнөөг хүртэл тов нь зарлагдаагүй байгаа юм. ҮХЦ-ийн маргааныг Ерөнхийлөгчийн зүгээс хойшлуулах чиглэл өгсөн нь ч үндсэндээ тодорхой болсон.

Тэрбээр 2020 оны УИХ-ын сонгуулийн дараа танхимаа бүрдүүлэхдээ ҮХНӨ-ийн дагуу "дан дээл"-тэй сайд нарын бүрэлдэхүүнийг ханган томилоод байсан. Улмаар Л.Оюун-Эрдэнэд Ерөнхий сайдын албан тушаалаа хүлээлгэн өгөхдөө ч тэр ҮХНӨ-ийн "давхар дээл"-тэй ажиллах сайд нарын тоог бариулах чиглэл өгч байв.

Гэвч танхимын гаднаас томилогдсон сайд нар УИХ дээр салбарын асуудлаа хамгаалж чаддаггүй, хэт сул ажиллаж байна гэх шалтгаанаар эрх баригчид өөрдийн хийсэн тогтолцооны өөрчлөлтөө эвдэхээр завдаж буй.

Харин Ерөнхийлөгчийн зүгээс “Сайд нар одоо л нэг ажлын эвээ олж байхад огцруулах байдлаар дахин шинэ хүн томилбол ажил чинь бүр явахгүй байх эрсдэлтэй. Эсвэл чадамжгүй ажиллаж байгаа сайд нараа парламентын гаднаас сэлгэн томил. МАН өөрсдийн баталсан ҮХНӨ-ийг хоёр жил хүрэхгүй хугацааны дараа үгүйсгэвэл ирээдүйн улс төр чинь юу болох вэ” гэх агуулгаар цэцийн маргааныг хойшлуулах чиглэл өгсөн гэх мэдээлэл байна.

Өөрөөр хэлбэл, Ерөнхийлөгч давхар дээлтэй сайд нарын тоог нэмэхийг дэмжээгүй. Уг асуудал олон нийтэд ил яригдаж эхэлбэл сөрөг байр суурь илэрхийлнэ гэдгээ МАН-ын залуу удирдлагуудад сануулсан гэсэн үг.

Тиймээс ч намрын чуулганы сүүлээр олон нийтийн шүүмжлэлийг ихээр хүлээж буй, хэт сул ажиллаж байгаа хэд хэдэн сайдыг чөлөөлж, танхимын гаднаас чөлөөлөх хувилбар сүүлийн өдрүүдэд идэвхтэй яригдаж байгаа аж.

Хамгийн эхэнд чөлөөлөгдөх эрсдэлтэй сайдаар утааны агуулгаар Н.Уртнасан, ачаа эргэлт, гадаад харилцааны асуудлаар Л.Халтар, Б.Батцэцэг, Н.Ёндон нар нэрлэгдэж буй. Мөнхүү Батлан хамгаалахын сайд Г.Сайханбаярыг сэлгэн томилох хувилбар дээр үндсэндээ тохирчээ. Эрүүл мэндийн сайд С.Энхболдыг чөлөөлөх эсэх дээр Ерөнхий сайд Л.Оюун-Эрдэнэ эцсийн байдлаар хариу өгөөгүй байгаа гэх мэдээлэл байна.

Эрх баригчид ҮХЦ-ийн маргааныг явуулах эсэх дээр Ерөнхийлөгчийн шахалтад орж, эхний ээлжид гаднаас хэд хэдэн сайд сэлгэн томилох хувилбар дээр тохиролцсон нь үнэн бол дээрх сайд нарыг намрын чуулганы сүүлийн өдрүүдэд чөлөөлөх чигтэй байна гэсэн үг. Нөхцөл байдал ингэж эргэвэл танхимын гаднаас дахин сэлгэн томилгоо хийхээс өөр аргагүй юм.  Нөгөө талд сайд нарыг чөлөөлөх асуудал бүр нам зогсож ч мэдэхээр нөхцөл байдалд оржээ.

СЭТГҮҮЛЧИЙН ТЭМДЭГЛЭЛ: Л.Оюун-Эрдэнийн танхим Х.Нямбаатар, Л.Энх-Амгалан, Б.Жавхлан гэсэн давхар дээлтэй сайд нар дээр багахан манлайлал үүссэн. Ихэнхдээ танхимын тэргүүндээ хэт нэмэргүй, салбарын сайд нар хийчих агуулга дээр өөрөө гарч ирсээр буй нь үнэн. Дотоод байдлаараа аргал түлээгээ ч Ерөнхий сайд нь өөрөө оруулж, хогоо ч өөрөө шүүрдсэн, хэт “тамиргүйдүүлэх” бүтэцтэй яваа нь үнэн. 

Гэвчиг Ерөнхийлөгчийн хориглосончлон, одоо л нэг ажлын эвээ олж яваа сайд нараа члөөлж, дахин шинэ хүн оруулж ирэхээр ажилдаа дадах хугацааг нь дахиад л хүлээнэ гэсэн үг. Намрын чуулганы хугацаанд тэд санаснаа хийж амжихгүй бол хаврын чуулганаар хүлээгдэх сэдвүүдийн нэг болно. Тэр хүртэл улс төрийн нөхцөл байдал яаж ч өөрчлөгдөж болох юм. Ер нь сайд нараа чөлөөлчихмөөр байвч энэ нь танхимын тэргүүний санаан зоргоор явчих асуудал биш байгаад л бүх учир байна.

Энэ мэдээнд өгөх таны үнэлгээ

Хуваалцаарай Жиргээрэй