2100 жилийн өмнөх булшнаас “iPhone” олджээ

Оросын археологич Павел Леусээр ахлуулсан судлаачдын баг Тувад орших Ала-Тей эртний оршуулгын газраас Хүннүгийн үеийн эмэгтэйн булш илрүүлжээ. Ала-Тейд хүрлийн үеэс эхлээд Чингис хааны үе хүртлэх олон булш бунхан хадгалагддаг байна.

Хачирхалтай нь тус булшнаас олдсон бүсний арал нь орчин үеийн гар утас шиг хэлбэртэй байсан ба археологичид түүнийг “iPhone” гэж нэрлэжээ. Харин булшинд байсан эмэгтэйг “Наташа” гэж нэрлэсэн байна. Ойролцоогоор 18 см урт, 9 см өргөн үнэт чулуун бүсний арлыг төрөл бүрийн чулуун шигтгээ суулгаж чимэглэсэн байжээ.

Түүнчлэн энэхүү булшнаас эртний Хятадын зоос гарсан бөгөөд зоосыг анх цутгаж байсан цаг үеийг тооцож үзээд булшны насыг дээд тал нь 2,137 жилийн өмнөх гэж тооцоолсон байна.

С.ХОНГОРЗУЛ