Сонсгол нэртэй ШОУ, ТЭДЭНД хариуцлага тооцоогүй хоёр сар

УИХ-ын Эдийн засгийн байнгын хорооноос Хөгжлийн банкны асуудлаар зохион байгуулж буй ерөнхий хяналтын сонсгол Төрийн ордонд өчигдөр өглөө 09:00 цагаас эхлэн үргэлжилж, орой 20:00 цагт дууслаа.

Сонсголоос бид юу олж мэдэв гэдгийг дүгнэе. УИХ-ын олон ч гишүүд асуулт асууж, халаглалаа ярьж, загнаж, зэмлэж, попорч, зарим нь сэтгүүлчдийг доромжлов. Хөгжлийн банкнаас хамаарал бүхий этгээд нь зээл авсан, АТГ-т шалгуулах 20 улстөрчийн дунд яг одоо парламентад сууж буй зургаан гишүүн байх юм. Үлдсэн нь УИХ-д сууж байсан болон төрийн өндөр албан тушаал хашиж явсан этгээдүүд. Ийнхүү бүтэн өдөржин хуралдсан хурлаас бид 20 улстөрчийн нэртэй л үлдэх шив.

-ГУРВАН НАЙЗ ГИШҮҮНИЙ ИЛ ТОДХОН ХЭРЭГ-

Тэднээс Х.Ганхуяг, Г.Дамдинням, Г.Амартүвшин нарын Хөгжлийн банкны зээлтэй холбоотой асуудлыг олон нийт мэднэ. Х.Ганхуяг, Г.Дамдинням нарын хамтарсан компани Хөгжлийн банкнаас зээл авсан байдаг. Тэр үед УИХ-ын гишүүн Г.Амартүвшин Хөгжлийн банкны захирал байсан.

Хөгжлийн банкны Гүйцэтгэх захирлаар Г.Амартүвшин 2019 оныг дуустлах хугацаанд зургаан сарын гэрээтэйгээр ажилласан.  Тэрбээр УИХ-д нэр дэвших амбицтай байсан учраас 2019.12.31-нд үүрэгт ажлаасаа чөлөөлөгдөх хүсэлт өгсөн байдаг. Одоо бодоход хоёр найздаа зээл олгох гэж тэнд захирлаар түр ажиллаад гарсан л дүр зураг харагддаг. Энэ талаар баримттай мэдээлсэн манай нийтлэлийг энд дарж унших боломжтой.

-АЖЛЫН ХЭСГИЙН ГИШҮҮН НЬ ЗЭЭЛ АВАХАД НӨЛӨӨЛСӨН Л.ЭНХ-АМГАЛАНД ЗУЛГУЙДАВ-

Түүнчлэн УИХ-ын гишүүн, БШУ-ны сайд Л.Энх-Амгалан холбогдож буй. Түүний нэрийг ч өчигдөр Ажлын хэсгээс зарласан. Гэтэл Л.Энх-Амгалан сайд улстөрчийнхөө нэр хүндийг ярьсаар гарч ирж, өөрийгөө гүтгүүлж байгаагаа хэлээд, ажлын хэсгийн ахлагч, УИХ-ын гишүүн Б.Баттөмөр өөрийнх нь нэрийг зарласаныг улс төрийн өрсөлдөгчөө намнасан үйлдэл хэмээн дүгнэв.

Харин УИХ-ын гишүүн Б.Баттөмөр “Монгема” муур, нохойн хоол үйлдвэрлэхээр 11 тэрбум төгрөгийн зээл авсан юм билээ. Л.Энх-Амгалан гишүүн нөлөөлсөн байж болзошгүй гэх мэдээлэл хэвлэлийн хэрэгслүүдэд гарсан тул би хэлсэн юм. Сайн муу хэлүүлж байснаас нэрээ цэвэрлээд аваач гэсэн дээ л хэлсэн. Үүнд бүү эмзэглээрэй. Ажлын хэсгийн таван гишүүн ярилцаад шийдсэн. Би хувьдаа Л.Энх-Амгалан гишүүнийг хүндэтгэдэг, сайн боловсон хүчин тул өнөөдөр сайдын ажил хийж байна" хэмээн зулгуйдав.

-Н.АЛТАНХУЯГ УУРССАНДАА СЭТГҮҮЛЧДИЙГ "ГУДАМЖНЫ" ХЭМЭЭН БУХИМДАВ-

Хөгжлийн банкийг шалгах ажлын хэсгийн ахлагч, УИХ-ын гишүүн Б.Баттөмөр тус банкны зээлтэй нэр холбогдсон улс төрд нөлөө бүхий 20 хүнийг АТГ-т шалгуулахаар өгч байгаагаа зарласны нэг нь УИХ-ын гишүүн Н.Алтанхуяг. Түүнийг Дарханы төмөрлөгийн үйлдвэрийн хувьчлалын асуудал дээр давуу эрх олгосон гэж үзэж буйгаа тэр хэлсэн.

Гэтэл эрхэм гишүүн сэтгүүлчдийг "гудамжны" хэмээн доромжлон барин өөрийгөө өмөөрч, "Надад ямар ч хамаарал байхгүй. МАНАН-гийнхан байгаа, хайж ол. Ц.Элбэгдорж, Ч.Сайханбилэг, М.Энхболд байгаа. Үүнээс илүү яаж толгойг нь зааж өгөх юм, та нарт" хэмээн уурсав.

-СОНСГОЛД ҮЗЭГДЭЭГҮЙ С.БЯМБАЦОГТ-

УИХ-ын гишүүн С.Бямбацогт баруун аймгуудын цементийн хэрэглээг хангах чиглэлд “Вестернхолд” компаниар 28 сая ам.долларын зээл авахуулсан нь анхаарал татаж буй. Тус компани түүний төрсөн дүүгийн компани.

Эрхэм гишүүн эл төсөл, авсан зээлийнхээ талаар удаа дараа мэдээлэл хийж, өөрийгөө өмөөрсөн, зээл авахад нь нөлөөлөөгүй гэсэн. Тэрбээр “Вестернхолд” компаниа зээл нь хэвийн төлөлттэй гэсэн ангилалд байгаа 14 компани байгаагийн нэг гэж их л бардам буй.

Тус компани 2019 оны есдүгээр сарын 23-ны өдөр Хөгжлийн банкнаас 28,025,380 ам.долларын зээл авсан нь нэгэнт ил болсон. Түүний хувьд өчигдрийн сонсголд харагдсан ч үгүй. Ажлын хэсгийн ахлагч Б.Баттөмөр түүний хамаарал бүхий этгээдийн авсан уг зээлийг төлөлтөө сайн хийж байгаа энэ тэр гэж магтаж байснаа АТГ-т шалгуулахаар өгч буйгаа зарлах нь тэр.

-СОНСГОЛ НЭРТЭЙ ШОУ, ХЭНД Ч ХАРИУЦЛАГА ТООЦООГҮЙ ХОЁР САР-

ЭЦЭСТ НЬ ДҮГНЭХЭД: Энэ бүхнээс хамгийн анхаарал татсан асуудал нь хоёр, гурван сар сүржигнэж, УИХ-аас шалгах ажлын хэсэг хүртэл гарч ажилласан Хөгжлийн банкны чанаргүй зээлийн асуудлаар өнөөдрийг хүртэл хэнтэй ч хариуцлага тооцоогүй байгаа явдал.

Олон нийтэд таалагдаж, оноо авах гэсэн сүржин мэдэгдлүүд, Хөгжлийн банкны үе үеийн захирлууд, зээлдэгчдийг барьж хорьсон явдал нь зүгээр л дүр эсгэлт байсан төдий. Нэр бүхий УИХ-ын эрхэм гишүүд, улстөрчдөд энэ хугацаанд хариуцлага тооцох байтугай загнаж, зэмлээ ч үгүй. Харин ч өмөөрч, нэрээ цэвэрлээд ав гэх мэтчилэн нэгнийгээ өөгшүүлэх янзтай.

Хөгжлийн банкны захирал асан хэдэн дарга нарын заримыг нь сар гаруй цагдан хорьж, хоёр дахь сар руугаа орж буй. Гэтэл өнөөдрийг хүртэл АТГ Хөгжлийн банкны асуудлаар хэнээс ч мэдүүлэг, тайлбар аваагүй гэдгээ зарлав. Өөрөөр хэлбэл, зээл авсан аж ахуй нэгжүүдийг л хэдэн сар балбаж, зээлээ төлөх нөхцөл боломжийг нь боомилсноос бус зээл гаргаж өгсөн албан тушаалтнууд, захирлууд, тэдэнд нөлөөлсөн УИХ-н нэр бүхий гишүүд, улстөрчдөд хариуцлага тооцох ажил огт урагшлаагүй байна гэсэн үг. Өчигдрийн сонсгол ердөө л худлаа ШОУ байлаа.

Энэ мэдээнд өгөх таны үнэлгээ

Хуваалцаарай Жиргээрэй