Монгол Улсын Ерөнхийлөгчийн Эрүүл мэнд, спорт, нийгмийн бодлогын зөвлөх Т.Мөнхсайхан өнөөдөр Дэлхийн эрүүл мэндийн байгууллага /ДЭМБ/-ын Монгол дахь Суурин төлөөлөгч Сергей Диордица-тай уулзлаа.
Уулзалтаар архи, согтууруулах ундааны хэрэглээг бууруулах чиглэлд Монгол Улсын Ерөнхийлөгчийн гаргасан “Засгийн газарт чиглэл өгөх тухай” зарлиг, түүний хэрэгжилтийг хангах хүрээнд хамтран ажиллах талаар санал солилцлоо.
Ерөнхийлөгчийн зөвлөх Т.Мөнхсайхан өндөр хатуулагтай архи, согтууруулах ундааны хэрэглээг бууруулах чиглэлд олон улсын туршлага, судалгааны үр дүнд үндэслэн бодлогын тодорхой арга хэмжээг авч хэрэгжүүлэхээр болсон талаар танилцууллаа.
ДЭМБ-ын Монгол дахь Суурин төлөөлөгч Сергей Диордица хэлэхдээ, дэлхийн бусад орнууд архи, согтууруулах ундааны зохисгүй хэрэглээг бууруулахад чиглэсэн урт хугацааны бодлого хэрэгжүүлдэг бөгөөд Монгол Улс ч энэ асуудалд анхаарал хандуулж, Ерөнхийлөгчийн зарлиг гарч байгааг сайшаан тэмдэглэв. Мөн хүн амын эрүүл мэндэд сөргөөр нөлөөлж буй суурь асуудлуудын нэг болох архины өндөр хэрэглээ, түүний сөрөг үр дагаврыг бууруулах, зарлигийг хэрэгжүүлэхэд хамтран ажиллаж, мэргэжил, арга зүйн зөвлөгөө, дэмжлэг үзүүлэхэд бэлэн байгаагаа илэрхийлэв.
АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.